ژ ئێزدیه‌كی بو چنار سه‌عد:

سوپاس هه‌وه‌ ژ جڤاكه‌كێ‌ داخراو ئه‌م كرینه‌ چڤاكه‌كێ‌ مودرن!!

 (چنار سه‌عد) دگوتاره‌كێ‌ دا كو سایتێ‌ ڕووداو ب زمانێ‌ ئینگلیزی به‌لاڤكریه‌,  ل سه‌ر هێرشا گرۆپا  تیرۆرستیا (داعش) بۆ سه‌ر چیایێ‌ شنگال و برنا ژن و كه‌چێن ئێزدی ب دیل,  بۆچۆنێن خۆ داینه‌ خۆیاكرنِ كو ب ڕاستی بۆچۆنێن گه‌له‌ك شاش و بێ‌ ڕامانن, هزر و بۆچۆنێن كه‌سه‌كی تاریپه‌رێس و توندڕه‌ون یان ژی هنده‌ك مه‌ره‌مێن دی ل پشتن. (چنار سه‌عد) كو ئه‌نداما سه‌ركردایه‌تییا پارتی دیموكراتی كوردستانه‌ دگوتارا خۆدا دبێژت: ئه‌گه‌ر (داعش) نه‌با كێ‌ ژنێن ئێزدی دنیاسین؟ هه‌روه‌سان دبێژت: كاره‌سات و مالوێرانییا تیرۆرستێن (داعش) ئیناینه‌ سه‌رێ‌ ئێزدیان بووینه‌ ده‌سته‌كه‌فت بۆ ئێزدیان! دبێژت ژی: ئه‌گه‌ر (داعش) نه‌با كێ‌ (نادیه‌ موراد) دنیاسی؟ ب ڕاستی بۆچۆنه‌كه‌ سه‌یره‌ نه‌مازه‌  سه‌ركرده‌یه‌كه‌ ژن , ژنه‌كه‌ كورد, هزرێن وێ‌ ئه‌ڤه‌بن به‌رامبه‌ر ئێش و ئازارێن دایك و خوشكێن وێ‌! ئه‌ڤ خانمه‌ ل جیاتی هاوخه‌مییا خۆ بۆ ئێزدیان و كه‌چ و ژنێن ئێزدی  ده‌رببڕت و هه‌وڵ بده‌ت برینێن كه‌چ و ژنێن ئێزدی تیمار و ده‌رمان بكه‌ت یان ب ده‌نگ و نڤێسینێن خۆ هان و هه‌وارا كه‌چ و ژنێن ئێزدی و ده‌رد و ئازارێن ئێزدیان بگه‌هینته‌ نه‌ته‌وێن ئێكگرتی و ئێكه‌تیا ئه‌وروپی و ڕێكخراوێن مافێن مرۆڤی : ل جیاتی داخوازا چاره‌سه‌ریێن پێدڤی بۆ ڕزگاربوویێن ده‌ستێ‌ (داعش) بكه‌ت یان بانگه‌وازه‌كێ‌ بده‌ته‌ دۆستێن گه‌لێ‌ كورد و مرۆڤدۆستێن جیهانێ‌ بۆ ڕزگاركرنا كه‌چ و ژنێن ماینه‌ دیل دده‌ستێن ڤێ‌ گرۆپا توندڕه‌و دا، نه‌مازه‌ ئه‌و ب خۆ ژنه‌ و چاك ده‌رد و ئازارێن ژنان تێ‌ دگه‌هیت ب تایبه‌تی ده‌مێ‌ زۆرداریا سكسی لێ‌ دهێته‌كرن كو كارتێكرنه‌كه‌ مه‌زن ل سه‌ر سایكۆلۆژیا وان هه‌یه‌, ل جیاتی هه‌وڵ بده‌ت برینێن كه‌چ و ژنێن ئێزدی تیمار و ده‌رمان بكه‌ت مخابن! دهێت و بێ‌ شه‌رمانه‌ وێ‌ كاره‌ساتێ‌ و ده‌رد و مه‌ینه‌تان ب ده‌ستكه‌فت ل قه‌له‌م دده‌ت!

بۆ (چنار سه‌عد) و هه‌موو سه‌ركرده‌ و هه‌ر كه‌سه‌كی وه‌ك وێ‌ هزردكه‌ن دبێژم: مخابن! مخابن نه‌ك توو سه‌ركرده‌ به‌لكو مخابن توو ئه‌ندامه‌ك بی دناڤ پارته‌كه‌ كوردی یا سیكۆلاردا!! مخابن یێن وه‌ك ته‌ دناڤ مه‌دا هه‌بن، مخابن و مخابن و مخابن!!  دڵنیامه‌ هندی یێن وه‌ك ته‌ هه‌بن كوردستانامه‌ نه‌ ئاشته‌واییا جڤاكی و نه‌ یا سیاسی ب خۆڤه‌ نابینت, پێكڤه‌ ژیان و تۆله‌رانس ژی تنێ‌ دێ‌ بابه‌ته‌ك بت ل سه‌ر ڕووپه‌لێن په‌ڕتووك و ڕۆژنامه‌ و گۆڤاران و ل سه‌ر سایتێن ئه‌له‌كترۆنی دێ‌ په‌یاسان كه‌ت, قه‌ت و قه‌ت نابته‌ دیفاكتۆ. خانما ب ناڤ سه‌ركرده‌, ب ڤێ‌ چه‌ندێ‌ ژی ناڕاوه‌سست, پێڤه‌ دچت و دبێژت: ژبه‌ركو ئێزدی به‌ری هنگی جڤاكه‌كی داخراوبوون, نۆكه‌ ژبه‌ر وێ‌ نه‌هامه‌تییا هاتییه‌ سه‌رێ‌ وان ئازادییه‌كه‌ زێده‌تر بۆ  ژنێن ئێزدی په‌یدابوویه‌ و تێكه‌لی خه‌لكه‌كی دی و جڤاكه‌كی دی بووینه‌! دیاره‌ ڤێ‌ خانمێ‌ دڤێته‌ ب رێ‌ یا ڤێ‌ گوتارا خۆ بێژته‌ ئێزدیان مه‌  و … شیا هه‌وه‌  ژ جڤاكه‌كێ‌ داخراو بكه‌ینه‌ جڤاكه‌كێ‌ ڤه‌كری و مودێرن! ئه‌گه‌ر نه‌‌و مه‌به‌ست ژ خه‌لكه‌كێ‌ دی و جڤاكه‌كێ‌ دی چییه‌؟ مه‌به‌ست چییه‌ گرتن و ب دیل برنا كه‌چ و ژنێن كورد و ب كارئینانا وان وه‌كو كه‌نیزه‌ ژ لایێ‌ تیرۆرستێن (داعش) ڤه‌ و زۆرلێكرن و لاقه‌كرنا وان , ب (ده‌ستكه‌فت) و (ئازادی) ل قه‌له‌م دده‌ت؟!

گه‌له‌ك شه‌رمه‌ خانم توو دبێژی ئه‌و كه‌چا ژ ده‌ستێن (داعش) ڕزگاربوویی نۆكه‌ ل جیهانێ‌ دگه‌ڕیت و دچیته‌ نه‌ته‌وه‌یێن ئێكگرتی, ئه‌گه‌ر (داعش) نه‌با كیَِ (نادیه‌ موراد) دنیاسی؟ ئه‌ڤه‌ پرسیاره‌كه‌ شه‌رمنانه‌یه‌, ژ ڕه‌وشتێن كورده‌واری گه‌له‌ك دووره‌!! گه‌لۆ كی هه‌یه‌ دڤێت یا هاتییه‌ سه‌رێ‌ (نادیه‌ موراد) بهێته‌ سه‌رێ‌ وێ‌ دا ناڤدارببت؟ ما قه‌ی گه‌لۆ یا هاتییه‌ سه‌رێ‌ ڤێ‌ خوشكێ‌  هندكه‌؟!! كه‌چه‌ك ب ته‌مه‌نێ‌ گولێ‌ ژلایێ‌ دڕنداڤه‌ بهێته‌ گرتن و زۆر لێ‌ بهێته‌ كرن و هه‌موو خه‌ون و ئۆمێدێن وێ‌ و هزاره‌ها ژن و كه‌چێن وه‌ك وێ‌ بهێنه‌ بن ئاخكرن، یا ژ ده‌ستێن دڕندان ڕزگاربوویی و ده‌ڕد و ئازارێن په‌پڕه‌وكه‌رێن ئاریینه‌كێ‌ ڕه‌سه‌نێ‌ كوردی دگه‌هینته‌ جیهانێ‌ بۆ هندێ‌ مه‌ژی مافێ‌ ژیانێ‌ هه‌بیت، تنێ‌ مافێ‌ ژیانێ‌ و به‌س!! هێشتا توو وی مافێ‌ ژیانێ‌ ژی بۆ مه‌ ب ڕه‌وا نابینی؟ بێگومان یا ب دلێ‌ ته‌ نینه‌ ڤێ‌ كاره‌ساتێ‌ وژدانا مرۆڤدۆستێن جیهانێ‌ هه‌ژاندی, ته‌ نه‌دڤیا هه‌وارا ئێزدیان سنوور بڕیبانه‌ داهه‌ر وه‌كو كۆله‌یان ته‌ ڕه‌فتار دگه‌ل كربا, ته‌نه‌دڤیا خه‌لكێ‌ زانیبا ئه‌و كاره‌ساته‌ چه‌وا چێبوو, ته‌ نه‌دڤیا كۆمكوژیا ئێزیان ب (جینۆساید) ببایه‌ بڕیار، ته‌ نه‌دڤیا و نه‌ڤێت سه‌رۆكێ‌ ئێك ده‌وله‌تێ‌  پێشوازی ل (نادیه‌ موراد)كربا و بكه‌ت, ته‌نه‌دڤیا و نه‌دڤیا و نه‌دڤیا … ئه‌زێ‌ پشت ڕاستم ژی توو ئێزدیان ب هاوڵاتی پله‌ دوو ژی نا هه‌ژمێری!! سه‌باره‌ت (ناكۆكی و پێكدادانێن ترسناك ژی…) ئه‌وێن ته‌ ل داویا گوتارا خۆ ئاماژه‌ پێدایی كو د ناڤبه‌را گه‌نج و پیر و ژن و زه‌لامێن ئێزدی دا دێ‌ په‌یدابن، ئه‌ز ته‌ دلنیا دكه‌م خانم كو ئه‌و پێكدادان ڕووناده‌ن، ئه‌و یا ب سه‌رێ‌ ئێزدییان هاتی هه‌موو ئێزدی هه‌ڕشاندینه‌ و ناخێ‌ هه‌ر ئێزدییه‌كی ب ڕوومه‌ت برینداركریه‌, كه‌یفا كه‌سێ‌ ب وان ده‌ستكه‌فتان و وێ‌ ئازادییا توو ژێ‌ دبێژی نه‌هاتییه‌ نه‌ ژنا و نه‌ژی زه‌لاما, به‌رۆڤاژی بۆچۆناته‌ ئه‌و كاره‌ساته‌ دناخ و دلێن  ئێزدیان دا هاتییه‌ نكراندن تاكو مرنێ‌ ناهێته‌ ژبیركرن!! نه‌فره‌تا ل بناسكار و ئه‌نجامده‌رێن كاره‌ساتێ‌ دبارینن. مایه‌ بێژم ئه‌ڤ خانمه‌ هۆسا یا ئاخفتی  هه‌چكو ڤیایه‌ ب شێوه‌یه‌كی ژ شێوان شانازی یێ‌ ب وێ‌ كاره‌ساتێ‌ بكه‌ت!!