Skip to Content

93 Views

ئاشكرابوونا  وێنەیەكا – با – ی   لدەرڤەی ركەهێ‌ … ئەمین بۆتانی

ئاشكرابوونا وێنەیەكا – با – ی لدەرڤەی ركەهێ‌ … ئەمین بۆتانی

Be First!
by February 23, 2019 General, Poems
image_print

( هەكە ئاشتیێ عەبدەك هەبیت، بێ شك ئەڤدلسەلامە)
ئەڤ هەلبەست؛ دیاری بۆ جانێ‌ شێخێ‌ شەهیدان “ئەڤدلسەلامێ‌ بارزانی”
كەد و رێچا وی، بەهەشتا هزرا وی، تژی نوور و نێرگز…


خودانێ‌ پیر
هێڤدكەتە زیر و زناران،
كەڤر كەڤر ڤێڕادچیت و
حیكمەتا تەقن و غوبارێ‌
بۆ هەستییان ڤەدگێڕیت،
بەلگ بەلگ
داتینیت پرچا داروباران.
وێ‌ گاڤێ‌
چیایێ شرینێ‌
مژومۆران دكرە ناڤ مەشكا فەساحەتێ‌،
دەوا جامێری یێ
لبەر دنیایێ دادنا و
نڤیشكا جەسارەتێ
هەلدگرت بۆ تەنگاڤی یا.
دناڤبەرا
جەبرا پیسیێ و
ئختیارا تافیلبوونێ‌؛
وی گومانا ئاڤێ‌.
دناڤبەرا
جەبرا كیڤیبوونێ‌ و
ئختیارا كەهییان؛
وی نەمانا راڤێ‌.
دناڤبەرا جەبرا هەوارێ‌ و
ئختیارا بێدەنگیێ؛
وی ستران.
هێی شێخێ‌ من
تە خۆلی یا نەساخا
كرە بن قرۆمكێن هناران،
ژێكجودا كر
خێ یا شەرەفێ‌ و
تێشتا ئەڤینداران.
تە زڤڕۆكێن تێهنی یا
دا بنكەفشێن دەربازبوونێ‌؛
و تە دزانی
هێژ ئاڤ
مراریەكا رازاندی بو
لهەمێزا فەلەكێ‌؛
دەراڤێن وێ‌
سواخدابوون بخەندقینێ‌،
تە كەلا روومەتێ‌
رادەستی
باوەشینا مەعنایێ كر؛
و تە دزانی
هێژ ئاگر
نەخشەكا گولگولی بو
بدەهمەنا پەرییانڤە؛
بهێجەتا عیففەتێ‌
نامووس بەردابوونە ئەڤینێ‌.
شێخێ‌ من؛
ئەڤەیە فقها پێكڕابەردانا
باران و برینێ‌،
ئەڤەیە فقها پیرۆزكرنا
ژان و خوینێ‌،
ما تە دیت
چەوا مازی ڤڕێكرن
بۆ خۆشكرنا پیستێ‌ لێقەومیانێ‌،
دۆل و نهال راچاندن
پشت و پال شاندن
بۆ خەساندنا
كەڤرێن نشیڤی یا.
وی دەمی
هێژ زێمار
حەرفەكا بێدەنگ بو
دناڤ بوخچكا ئێش و ژانا.
هێژ عەڤرا؛
لێمشت نەڕستبوون
بتەشیا تۆفانێ‌،
هێژ فریزیێن ئولفەتێ‌
رپنی هناڤا نە ب بوون،
دبێژن؛
وی وەختی
كو مەلكەزەن
مژوولی مەهاندنا
عەقیقا رەغبەتێ‌ بوون،
بێدەستی
گۆزكەكا خوینێ‌ دكەڤیتە خار و
ئەڤ بێهنا گەنی
بەردبیتە خەلیقەتێ‌.
بێهنا گەنی
بەردبیتە خەلیقەتێ‌ و
ئێدی شعوب و قەبائل
رادبنە چەپا،
دلڕەقی دبیتە جغسیێ قەدەرێ و
هەر ئاسنەكی
ب رەنگێ‌ گوللەی تەفسیر دكەت
هەر تیرەكێ ژی ب رەنگێ خیانەتێ‌.
ئەزبەنی
ب دلخاسی نەدەركەڤە؛
كۆسەیێن رۆم و عەجەمان
گەلەك خوینا رێتی.
لیانا نێرگزا بكێ‌ و
خۆ بگەهینە دەمارێن دلۆڤانیێ،
هەبیت نەبیت
سكرا مەعریفەتێ‌
یا پەقی.
تە چولیێن زۆزانا
هاڤێتە سەر ملا و
بابەلیسكا دۆلا ڤاژی
كرە گۆپال،
شكێڕ و لاتێن
پیرس و سەرێ‌ بازێ‌؛
(وەی..وەی..وەی
بازی یێن بارزان
قەبینا ربادان
سیسنۆكێن شەنگ و شەپال).
لبیرا تە یە؟
نەقلا دی ژی
ئاگر بەردابوونە ئاقارێن هۆگری یێ،
تایكێت كەسك نەبانە
چپكەكا شەرمێ‌
دمەنجەلۆكا ڤەمریانێ‌ دا نەما بو
دویكێلا زولمێ‌ پێ ڤەمالین.
شێخێ‌ من
پشتی ڤێ‌ حێبربانێ‌؛
ما تو بێژی
مسكا ئاڤەدانیێ
ل عەردەكی مابیت؟!
من دزانی
تو باوەر ناكەی،
لێ پا جارەكا دی
تە كراسێ خۆ
لبەر ئاگرێ‌ وێ‌ خەمێ‌
زوها كر و
بووی رێڤینگێ‌ خەونا،
و تە دزانی
ڤەدیتنا كەسكەسۆرێ‌
نە بساناهی یە
دناڤ ئەلفبێتكا بێڕەنگیێ،
نەخاسمە هێژ
سیپەلەكا ڤەدەر نەببوو كانی و
چریسكەكا بەرزە
چرایەك لێ‌ نەببوو خودان.
هێی شێخێ‌ من
خەلافەتێ‌
خلفا سێدارێ‌
لبەر سیناهی یا سەرا
ڤەدا بو؛
تە دا رێكێ‌ و
چ دبیت بلا ب بیت،
تە دناڤ لەوەندیێن خۆ دا
جۆتەكا كانیێن نێر و مێ‌ ڤەشارتبوون؛
تە دڤیا بقەچاغی
بگەهینیە كەربەلایێ.
تە بڕەكا پەزكویڤی یا
كربو دناڤ شویتكا خۆ دا؛
تە لبەر بو
جەندرمێن خەلیفەی پێ نەحەسن
بۆ نەڤیێن ئیبراهیمی
بگەهینیە دەشتا حەڕانێ.
تە ناوسكێن تازە قەوراندی
تژی باهیڤ و هنگڤین
دناڤ پاخلا خۆ دا
هەلگرتبوون بۆ كەنعانییا.
بەربنی و بەربنی یا لائیكراهێ‌
تە كاروانەكا
دەسمالێن رەنگین بار كربو؛
دا بگەهینیە
ئەناتۆلیا خودێ
بۆ رۆندكێن ئەرمەنی یا.
هەمی هەمی
تە دڤیا
سیناهیەكا هەدارێ‌
ژقەرەم و عەڕعەڕا
ڤەگەڕینی بۆ دل و چاڤان.
لێ لسەر تخویبێ‌
دناڤبەرا حەلال و حەرامێ‌
هاتیە گرتن.
دەما تە لسەر كەڤرەكێ‌ رەش
ب كولنگەكێ‌ سۆر د نكراند:
بژی براتی یا گورگ و پەزان.
جارا ئێكێ‌ نەبو
ئەزبەنی جارا ئێكێ‌ نەبو
دناڤبەرا
رەوشەن و تاریگەوركێ‌
تو دیت بووی
یێ سەخبێری یا ئەلندێ‌ دكەی،
وە دیارە
تە زێدە ل حەددی
ستێر كربوونە دناڤ
پارزینكێن شۆڕەشڤانا؛
تێرا رەجماندنا بندەستیێ نەما بو.
ئەزبەنی
بەری تە بگرن؛
گەلەك وێنەیێن تە یێن قەچاغ
ب دیوارێن ئستەنبۆل و
چالدیران و مووسلێ ڤە
هاتبوونە هلاویستن،
ل بلنداهیەكا جودی
تە وێنەیەكا خۆ
دگەل (با)ی كێشا بو
لسەر چەنگێن فڕینێ‌.
ل جهەكێ‌ دی و
بڕەخ هەلامەتا تێهنیبوونێ‌؛
تە دەستێ‌ خۆ
دانابو سەر ملێ ئاڤێ‌ و
هنگۆ هەردووا دكرە كەنی.
وێنەیەكا دی ژی
كو سولتان گەلەك پێ عاجز ب بو؛
چو بوویە سەر
قلیقانكێن عەقل و نەقلا و
ب هەردوو دەستا
تە سلاڤ دكرە مەتنا جەدوایێ.
و ل خڕەكا خرابتر
وێنەیەكا تە بو ئەزبەنی
دگەل چرایەكا ڤەمراندی
دناڤ كۆلانكەكا تەنگ و تاری،
و لپشت تە
گرنژینا زارۆكێن
گەرمیان و قوشتەپە
دێرسم و هەلەبجە
قارنا و شەنگالێ‌
عامودا و رۆبۆسكێ‌
باش خویا دكر.
ئەزبەنی
ڤەدگێڕن؛
گونەها تە ئەو بوویە
تە قەسەكا خراب گۆتبو ژیانێ‌،
تە لێحەیتاند بو و گۆتبویێ؛
هەكە ئازادی
ل نك تە هندا گران بیت؛
پا بۆچی ل نك مرنێ‌
قەهرەمانی یا كوردان بەلاشە؟!
وێ‌ گاڤێ‌
حاكمێ‌ حوكمێ‌
سەرێ‌ خۆ نەڤی دكەت؛
سەرێ‌ خۆ نەڤی دكەت
حاكمێ‌ حوكمێ‌.
رووپەلا دوماهیێ ژی
حبرا دوماهیێ
ددەتە دەستێ‌ دوماهیێ و
دبێژتێ؛ بنڤیسە:
ها ئەڤەیە؛ بەراهی یا درست
ئەڤەیە بەراهی یا درست…



ئەمین بۆتانی
14/1/2019



Previous
Next

Leave a Reply