پێك …. فازڵ عه‌ززاوی
و: نه ژاد عزیزسورمێ
————————————-
هه‌رچه‌نده من ، مه‌ست و خه‌مبارم و
توانای په‌یڤینم نییه
ده‌ستوورم پێ بده‌ن بۆ دواجار
پیاڵه به‌رزكه‌مه‌وه و بخۆمه‌وه :
پێكی ئه‌و كوێره‌ی له تاریكیدا ده‌بینێ
پێكی ئه‌و لاڵه‌ی له‌سه‌رچیا ، له‌گه‌ڵ خوادا ده‌ئاخڤێ
پێكی ئه‌و كه‌ڕه‌ی گوێ له مۆسیقای ئه‌به‌دیه‌ت ده‌گرێ
پێكی ئه‌و شاعیره‌ی ئاگر له خوداوه‌ند ده‌دزێ
پێكی خوا ، كه جاری دادێ دونیایه‌كی چاتر دروست ده‌كا
پێكی شه‌یتان كه گره‌و ده‌دۆڕێنێ و ده‌گه‌ڕێته‌وه دۆزه‌خ
پێكی دایك كه به هه‌شتی له‌ژێر پێدایه .
پێكی ئه‌و براده‌ره‌ی ،
گه‌ر كه‌ڵه‌شێر سێ جارانیش بخوێنێ خۆیمان لێ نه‌بان ناكا
پێكی شه‌یتان كه واسواسی ناخاته دڵی خه‌ڵكی
پێكی ئه‌و سێداره‌یه‌ی ،
سه‌ر بۆ له‌سێداره‌دراو داده‌نوێنێ
پێكی ئه‌و جه‌للاده‌ی ،
خۆی ده‌داته به‌ر قامچییان !
پێكی ئه‌و قوربانییه‌ی ،
له ئازار و ئه‌شكه‌نجه‌ی خۆی ڕاده‌په‌ڕێ ..
پێكی ئه‌و پاسارییه‌ی قه‌فه‌زی به‌جێ دێڵێ
پێكی تاراوگه ، كه وره‌ی پێ به‌رنه‌داین
پێكی ئه‌و نیشتیمانه‌ی ڕووباری به بندا ده‌ڕۆن
پێكی ئازادی تا هه‌تایێ ..
پێكی دونیای مڵكی هه‌مووان
پێكی ئه‌و حوكمدارانه‌ی له مۆزه‌خانان
به پاسه‌وان دایانده‌مه‌زرێنین ..!
پێكی ئه‌و دره‌خته‌ی ،
ڕه‌گی له قووڵایی خاك دایه
پێكی مانگ ،
كه گوێ له شكاتی عاشقان ده‌گرێ ..
پێكی خۆر له سڕه‌ی سه‌رمای شوباتدا
پێكی ئه‌و هه‌سارانه‌ی هه‌ر له ته‌قینه‌وه‌ی یه‌كه‌مه‌وه ده‌گرمێنن .
پێكی به‌هه‌شتی سه‌رزه‌مین
پێكی دۆزه‌خ ،
كه ده‌رگای به چیمه‌نتۆ داده‌خه‌ین ..
پێكی ڕابردوو، بیره‌وه‌ریه‌كانیمان بۆ ده‌گێڕێته‌وه
پێكی ئێستا وه‌ك ڕووبارێ
له شه‌قامان هه‌ڵده‌قوڵێ ..
پێكی ئه‌و ئاینده‌یه‌ی ،
بێ په‌یژه ، بۆی
سه‌رده‌كه‌وین ..
پێكی ئه‌و ژیانه كورته جوانه .
—————————
له كۆشیعری ( فراشه فی طریقها الی النار )ـه‌وه كراوه به كوردی.
بڕوانه: ( فراشه فی طریقها الی النار )، ده‌زگای (المدی)، چاپی یه‌كه‌م – 1998
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
