پشكۆی خه‌ون …. ستار ئه‌حمه‌د
ئێستا له‌كۆشی خه‌ونا خه‌ونا دانیشتووم
بای چاوه‌ڕوانی بۆ لای تۆم دێنێ
هه‌ناسه‌ی تاسه‌ت ده‌مخاته سه‌ما
خۆزگه‌ی ژوانت باڵم ده‌ڕوێنێ
……………………
ئاسمانی جوانیت شه‌ق ده‌كه‌م وه‌ك مه‌ل
له‌نسێی باڵای عه‌شقتا ده‌سره‌وم
كاتێك ئاگایی وشیارم ده‌كا
ده‌بینم كوشته‌ی ئازارو خه‌وم
…………………………..
شه‌ماڵێك له‌لای تۆوه هه‌ڵبكا
یادی ئه‌وینت ده‌مكاته پشكۆ
سه‌ر له‌نوێ گڕێك ناخم داده‌گرێ
فرمێسك ده‌ڕژێنم بۆ دووریه‌كه‌ی تۆ
…………………………….
شه‌و ئارام ناگرم رۆژیش ده‌سووتێم
له‌پرسه‌ی خۆما ده‌ست له‌سه‌ر سینه‌م
به‌هیوام رۆژێك ئاوێزان یه‌ك بین
وه‌ره بتخه‌مه سه‌ر پێڵوو دیده‌م
…………………………..
له‌دووری تۆیه عومرم ژاكاوه
وێردی سه‌ر زارو به‌سته‌ی هه‌ناومی
رێگه‌ی مه‌ینه‌تم ئه‌شكه‌نجه‌و ژانه
وزه‌ی ژیان و مانگ و هه‌تاومی
……………………………..
نه‌كه‌ی كۆسپی ژین به‌چۆكتا بێنێ
له‌عه‌شق و جوانیت بمكه‌یته ده‌رێ
گوڵ له‌باخچه‌دا بشنێته‌وه
كێ وه‌ك باخه‌وان نازی هه‌ڵده‌گرێ
……………………………..
كه‌س وه‌ك من نرخی تۆی له‌لا نییه
به‌پاكی و وه‌فا عومرت ناپێوێ
بۆچی نازانی دڵسۆزی راستیم
ته‌نها دڵخۆشی و به‌رزی تۆم ده‌وێ
……………………………
ستار ئه‌حمه‌د
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
