Skip to Content

نامه‌كانی ئیشق…. 7… سه‌ردار جاف

نامه‌كانی ئیشق…. 7… سه‌ردار جاف

Closed
by نیسان 1, 2019 General


هه‌موو به‌یانییه‌ك

13 – له‌ گه‌ڵ كازیوه‌ی سپێده‌دا قه‌ڵه‌م له‌ وه‌سفی ژیری و جوانیتا له‌ خه‌ره‌نده‌ نایه‌ته‌گۆ و نڤیساندن، مه‌مله‌كه‌تی وشه‌ و ڕسته‌ و نووسین له‌ ئاست ئه‌و خه‌سڵه‌تانه‌تا هه‌گبه‌ به‌تاڵ و شه‌رمنده‌یه‌، هه‌روه‌ك چۆن بیركردنه‌وه‌كان ناگه‌نه‌ قوله‌پێی تێفكرین وگوڵ به‌ جوانیت ناگا و ده‌ژاكێ و سیس ده‌بێته‌وه‌، هیلالی به‌دری یه‌كشه‌وه‌یش نه‌ تیژی باڵه‌كانی به‌ تیژی بیرت ده‌گا نه‌ له‌ هه‌ڵهاتنه‌وه‌ تا ئاوابوون به‌ سه‌مای تیشك و تریفه‌یه‌وه‌ به‌ جوانی برۆكانت ناگاو له‌ شه‌رم و خه‌جاڵه‌تیدا خۆ له‌ چاوی مرۆڤان و ون ده‌كا و ئاوا ده‌بێ، به‌یانییه‌ك بۆنی ژنێتی سه‌رده‌مت گرتووه‌، بۆنێك به‌ داڵان و ژوورا پرژێن بۆنت كردووه‌، ڕه‌تگاڵیی په‌لكه‌زێڕینه‌ی پاش بارانی خۆریشت ناگاتێ، ڕه‌نگاڵه‌یی حه‌وت ته‌به‌ق خۆ ئاوێته‌ ده‌بن و هه‌ر پێت ناگه‌ن، ئه‌م به‌یانییه‌ ئیشقت گه‌رمتر له‌ ڕۆژان دنه‌ ده‌دا ناخ پاك ده‌كاته‌وه‌ روح به‌ فریشته‌یی ، ئه‌م به‌یانییه‌ك ژه‌مێك له‌ جوانی و میهره‌بانیت بۆته‌ نه‌خشی ڕۆژبوونه‌وه‌ی نوێ ، له‌ گوڵ گوڵتر ده‌ركه‌وتووی.


14 – ئه‌م به‌یانیه‌ت له‌ وه‌نه‌وشه‌ جوانتر و له‌ گوڵه‌باغ بۆندارترله‌ باران ته‌ڕ تر و له‌ شنه‌ی سپێدان فێنكتر، جه‌ژن و ڕۆژت پیرۆز، پیرۆزیی نه‌خشێك بێ ته‌نها به‌ باڵای ژیری تۆیا بدوورێت، ڕۆژێك له‌ ڕۆژانی دی ناچێ، په‌لكه‌زێڕینه‌ له‌ ته‌ك هه‌ور و نمه‌بارانا هه‌ڵپه‌ڕكێی ڕۆژی بۆ ژن دابه‌ستووه‌، مانگ خه‌رمانه‌ی كردۆته‌ بازنه‌به‌ندی پاراستنی ژن، ئاواز و ده‌نگی به‌ سۆز و خرمژن و ئۆغژنی دڵشادیت پیرۆز، هاوژین و ئزیزی سه‌فه‌ری ته‌مه‌نم یاقووته‌كه‌ی سه‌ر دڵ دڵنیام كێوه‌ سه‌خته‌كان ده‌بڕی و گاشه‌ به‌رده‌كانی سه‌ر ڕێی ژیان ده‌هاڕی ، هه‌وراز و نشێوه‌كان ته‌خت ده‌كه‌ی، خه‌ره‌ندی ته‌مه‌ن ده‌به‌زێنی، ژنێكی بڕوا به‌ خۆ بوونت له‌ هه‌موو ژنێ لا پیرۆز و به‌هێزتره‌، ژنێك له‌ بیر و زانست كامڵ ، ژنێك سه‌رچاوه‌ی ئیلهامی پێشخستنی كۆمه‌ڵ، تۆ ئه‌و چراتۆڕه‌ی ده‌روازه‌ی نه‌هامه‌تی و دواكه‌وتوویی و نه‌زانین ڕۆشن ده‌كه‌یته‌وه‌، تۆ ئاوه‌زێكی هاوچه‌رخی بۆ كۆمه‌ڵی كوردی، ژنێكی مانی چه‌مینه‌وه‌ نازانی و هه‌ر به‌ره‌و دوند و ترۆپك هه‌ڵده‌زنێی، هه‌نگاوه‌كانت له‌ دامێنی عه‌قڵانیه‌ته‌وه‌ هه‌ڵده‌نێی، ئاااای چه‌ند به‌ تاسووقی پێشكه‌وتنی كورد و تووڕدانی كه‌ڵچه‌ری نامۆی لای نه‌ته‌وه‌كه‌ت، به‌یانیت هه‌ر باش و جوان بێ, ئه‌زیزه‌كه‌ی هه‌مێشه‌ ڕۆشنه‌ ڕێم شه‌وێ سه‌رقاڵی ئه‌م نووسینه‌ بووم و سه‌ردل گرتن زێتر ئیشقی له‌ ناخما داچۆڕاند و به‌ سه‌ر ڕێی ته‌مه‌نمانا تكا، هه‌ر ده‌ڵێم تۆ ئه‌و ژنه‌ی بێوێنه‌ی.


15 – به‌یانییه‌ و سڵاوێ له‌ دڵێكی پڕ خۆشه‌ویستی و ئیشقداری بێگه‌رده‌وه‌ به‌ قامه‌تی نیگاكانتا هه‌ڵدێ، هه‌ر ده‌ په‌نجه‌كه‌م به‌ واڵایی و له‌رزۆكییه‌وه‌ له‌ سه‌ر ستوونی باڵه‌كانم خۆیان ڕاگرتووه‌ و به‌ كه‌فوكولی ناخی مه‌ینه‌تییه‌وه‌ رووه‌ و ئه‌و ئاسمانه‌ شینه‌ جوانه‌ی به‌ مانه‌ند ته‌وزیفی كردووه‌ و لێی ده‌پاڕێته‌وه‌، له‌ حه‌ژمه‌تا كڕنووش ده‌با تا چاكبوونه‌وه‌ت به‌ باڵا بدوورێ ، له‌ دوور ڕا هه‌ر هێنده‌م له‌ ده‌س دێ تاكه‌ ڕێی به‌ر په‌ناداری بێده‌سه‌ڵاتیمه‌ ، ئه‌م به‌یانییه‌ له‌ پڕ ڕه‌وی تاقه‌ت و هێزداریت مرۆیه‌كی سست و ڕزیلی به‌ردرگای ئیشقتم تۆیش له‌ عه‌وداڵ و سۆراغی بیمارستان و پزیشكێكی لای دۆراندۆرت به‌، نه‌با جگه‌ له‌ په‌تا سه‌رما ده‌رده‌ ئیشقیش ڕه‌واجی خۆی باراند بێت، به‌یانیت جوان و پڕ ساغله‌می ئازای به‌ده‌نت بێ ئێش و ئازار ، دولبه‌ره‌كه‌م له‌ گوڵ گوڵتر.

ئه‌ڵمانیا
5 و 8 و 9 / 3 / 2019

Previous
Next
Kurdish