Skip to Content

655 Views

هەڵهاتن ژ تەنیایی … هێمن حەمەجەزا

هەڵهاتن ژ تەنیایی … هێمن حەمەجەزا

Be First!
by April 1, 2019 General, Poems
image_print

هەمووان لە تەنیایی هەڵدێین
تەنانەت، خوداش!

ڕۆژێک، لەو ڕۆژە زۆرانەی کە بە دەرمان خۆم بەپێوە بۆ ڕادەگیرا، دڵم دا بە خودا.
کە هاتەوە، بۆی ببووە ئاو!
بۆی دەسوتا و دەیووت:
تۆ سەرخۆش بوویت
لەوێندەر نەبوویت، نەتدەبینی کە خودا،
چ زەجرێکی دەکێشا بەدەست تەنیاییەوە.
لە کن دڵم وتبووی: هەمووان لە تەنیایی هەڵدێن
تەنانەت، منیش!
هەروەها وتبووشی: کە زۆر غەمگینە بەو بێکەسییەی و گەر بە خەیاڵیش بێت، هەموو ئومێدی هەر
بە هاتنی ڕۆژی قیامەتە و بە تاسەوە، لە چاوەڕوانی گەڕانەوەی نەوەکانی ئادەمی فڕێدراودایە.

ڕۆژێک، لەو ڕۆژە زۆرانەی کە سەرخۆش بووم،
لە کن وی بوو دڵم.
لە کن خودای غەمبار، لە زیندانی ئینفرادیی.
لە کن خودای وەڕس، لە تاکوتەنهایی.
بۆی دەگریا و دەیووت:
خودا، لەو دوورەدەستییەی کە هەر داد دەکێشێ و
هیچ ئامبۆلانسێک بە فریادی ڕا ناگا، پەشیمانە.
خودا، لەو چۆڵەوانییە ساردەی کە بۆ خۆی خوڵقاندووە، پەشیمانە.

ئێستاش، هەر لەو ڕۆژە زۆرانەیە کە مەستم،
بەڵام
دڵم لە قەلبمدایە!
لە کن خۆمە و وەک دەف،
وەکو کەڕەنای نەفخی سوور، دەناڵێنێ:
کێ لە ئێوەی نەوەی ئادەم
تەنانەت،
نەوەی شامپاز و فیل و هەوا و ڕووناکی و تۆز و… هەرچییەک کە هەن و
ئەم بەکتریای تەنیاییە، وەک ئەفیوون بە دەمارەکانتاندا هاتووچۆ ناکا؟
بە هاوارمانەوە وەرن:

خودا، ژ تەنیایی هەڵدێ!
هەروەها منیش!

«هێمن حەمەجەزا ـ هامبۆرگ/ ۲۰۱۹»

Previous
Next

Leave a Reply