کۆنسێرتی گەورەی مۆسیقای فۆلکلۆری کوردیی لە بۆکان بەڕێوەدەچێت

مەنسوور جیهانی ـ

کۆنسێرتی گەورەی مۆسیقای فۆلکلۆری کوردیی لە لایەن ئاکادیمیای مۆسیقای “زیرەک” و ئەنجوومەنی کۆمەڵایەتی “ئاوای زیرەک” لە شەوانی 3 و 4ی ئەپرێلی 2019 لە شاری بۆکان بەڕێوەدەچێت.

کۆنسێرتی گەورەی مۆسیقای فۆلکلۆری کوردیی لە لایەن ئاکادیمیای مۆسیقای “زیرەک” و ئەنجوومەنی کۆمەڵایەتی “ئاوای زیرەک” لە پێناو پاراستنی مۆسیقای ڕەسەنی کوردەواریی و بە ئامانجی پەرەپێدان و ناساندنی مۆسیقای دەوڵەمەندی کوردیی و هەروەها زیندووڕاگرتنی ئەم جۆرە مۆسیقایە کە بەداخەوە لە مەترسی لەبیرچوونەوە و لەناوچووندایە و بە مەبەستی دامەزراندنی بنەماکانی هونەریی و کەلتووریی و بەرزڕاگرتنی دوایین جیل لە مامۆستایانی بلیمەتی مۆسیقای فۆلکلۆری کوردیی کاتژمێر 9ی شەوانی 3 و 4ی ئەپرێلی 2019 لە هۆڵی فەرهەنگسەرای سیمورغ لە شاری بۆکان بەڕێوەدەچێت.

لەم کۆنسێرتەدا، کۆمەڵێک بەرهەمی هەرمانی مۆسیقای شادی کوردیی بە دەنگی گۆرانیبێژانی کورد “جەعفەر بوغدەداغی”، “عومەر فەرەجی” و “کەریم خاکی” بە هاوڕێیەتی مۆسیقای فۆلکلۆریی ناوچەی موکریان، لە لایەن مامۆستا “عوسمان محەمەدی” ناسراو بە “عوسمانە سوور” ژەنیاریی بەتوانا و بەرجەستەی ئامێری نەرمەنای، “ئیسماعیل کۆچەری” ژەنیاریی بەتوانا و ناوداریی زەربی کوردیی و “ئەیووب تازە کار” ژەنیاریی داهاتووڕوونی ئامێری دیوان پێشکەش دەکرێت.

پارچە مۆسیقا فۆلکلۆریی، گۆرانی و مەقامە ڕەسنەکانی کۆنسێرتی گەورەی مۆسیقای فۆلکلۆری کوردیی بۆکان لە دەزگای شوور، مەقامی بەیاتی تورک، گۆشەی شەهناز، دەزگای سێ گاە و مەقامەکانی مۆسیقای ناوچەی موکریان کە بە شێوەی پێکەوەژەنین، ژەنینی بوداهەی مۆسیقای فۆلکلۆری کوردیی، گۆرانی کوتنی تاکەکەسی و “گەڕە لاوژە” یا گۆرانی کوتن بە شێوەی گرووپی مەقامە تایبەتەکانی ناوچەی موکریان پێشکەش دەکرێت.

ناوی پارچە موزیک و گۆرانییەکانی ئەم کۆنسێڕتە بریتین لە: ئێران، شەوبۆ، تۆم دەوێی، وەرە لام، ڕیحانە، گریان، بەهاران، بریندارم، شیرین بەهارە، جەلسە، دڵسۆزان، لێوە ئاڵەکەی و چەپکە گوڵ.

زۆربەی ئەم گۆرانی و پارچە موزیکانە لە ساڵانی ڕابردوودا لە لایەن هونەرمەندانی مۆسیقای بلیمەت و ڕەسەنی کوردەواریی لەوانە: مامۆستا “حەسەن زیرەک” ئەفسانەی بێوێنەی مۆسیقای کوردی و گۆرانیبێژانی ناوداری مۆسیقای کوردستان لەوانە: مامۆستایان “عەلی فەیزی” ناسراو بە “عەلی خەندان”، “عەبدوڵڵا هووشمەند” ناسراو “بە عەبە دەڕژێ”، “ئیبڕاهیم فەتاحی” و سەید “عەلی ڕەحیم پوور” ناسراو بە سەید “عەلی سەردەشتی” پێشکەش کراون.

کۆنسێرتی گەورەی مۆسیقای فۆلکلۆری کوردیی بە بەرپرسیاریی و بەرهەمهێنەریی “محەمەد مەعڕووفی” بەڕێوەبەریی گشتیی ئاکادیمیای مۆسیقای “زیرەک”، ئەنجوومەنی کۆمەڵایەتی “ئاوای زیرەک” بە بەرپرسیاریی دکتۆر “ئیبڕاهیم عوسمانی” و بە هاوکاریی دایرەی فەرهەنگ و رۆشنبیری شارستانی بۆکان، ناوەندی هونەریی “نوور و سەدا” بە بەرپرسیاریی “ئەسعەد ئاسیابان” و پشتیوانی میدیایی کەناڵی هەواڵنێریی “بۆکان ئانلاینی موکریان”، کاتژمێر 9ی شەوانی 3 و 4ی ئەپرێلی 2019 لە هۆڵی فەرهەنگسەرای سیمورغ لە شاری بۆکان بەڕێوەدەچێت.

ناوەندەکانی فرۆشی بلیتی ئەم کۆنسێڕتە بریتین لە: لە نووسینگەی ئاکادیمیای مۆسیقای “زیرەک”، کیووسکی ڕۆژنامە فرۆشی “بەهمەن”، کیووسکی چاپەمەنی “کاریگەر” و فەرهەنگسەرای سیمورغی بۆکان.