نامه‌كانی ئیشق … 11… سه‌ردار جاف


هه‌موو به‌یانییه‌ك

25 – له‌ ده‌فته‌ری ئه‌م سپێده‌ سپییه‌ی ئه‌ندێشه‌مه‌وه‌ له‌ ده‌وری باڵات ده‌گه‌ڕێم، هه‌ڵسه‌ به‌ده‌م ئه‌و تاڤگه‌ی خه‌یاڵه‌وه‌ پیاسه‌یه‌كی نه‌ورۆزانه‌ بكه‌ین، له‌ مه‌لا ئۆمه‌ره‌وه‌ پێكه‌وه‌ چاو ده‌بڕینه‌ تونێله‌ داخراوه‌كه‌ی پیرمام و به‌ نیگایه‌كیش له‌ نه‌ینۆكه‌كه‌وه‌ ده‌ڕوانمه‌ ئه‌و ئاپۆڕا و حه‌شاماته‌ی له‌ پیره‌ هه‌ولێره‌وه‌ هه‌ڵساوه‌ و بۆ توانه‌وه‌ی به‌سته‌ڵه‌كی زمستانه‌ی ناخیان به‌رێ كه‌وتوون و كه‌فو كوڵی به‌ جۆشیان تاو داوه‌ بۆ شایی لۆغانی ئه‌م نه‌ورۆزه‌، سنه‌وبه‌ره‌كانی خانزاد جوانی رۆژئاوای به‌ نیگای هه‌ردووكمان نیشان دایه‌وه‌، هه‌ر كه‌ داگه‌ڕینه‌ خواره‌وه‌یش له‌ سیدی ترومبێله‌كه‌وه‌ باكووری ده‌نگه‌ به‌ سۆزه‌كه‌ی لێ هه‌ڵبڕی …..
هه‌ڵسه‌ هه‌ڵسه‌ كیژی جوان ………………… به‌ هاره‌و كاتی سه‌یران
دره‌نگه‌ خۆت بگۆڕه‌ …………………….. با بڕۆین بۆ به‌ستۆره‌
گوێ مله‌ ده‌نگه‌ ناسكه‌كه‌ته‌ به‌ چرپه‌یه‌كی به‌یانیانه‌ت ده‌ڵێی بشێ به‌ هه‌ورازه‌كه‌ی پیرماما هه‌ڵزنێین یا تونێله‌كه‌ ده‌بێته‌ ڕێمان، ئیدی قه‌ده‌ری من و تۆی دووره‌ وڵات وابوو به‌ پیًَچاپێچه‌ كه‌مكراوه‌كانی چیای پیرمام هه‌ڵگژاین، له‌و دیویشه‌وه‌ بۆ كۆڕێ و شێره‌سوار ملمان نا، ئیدی تا حاجی باییز گۆرانیه‌ خرۆشه‌كانی ناو ترومبیله‌كه‌ هه‌ر وه‌ك شه‌وانی ڕابردوو مه‌ست مه‌ستی نێو نه‌ورۆزی كردین، به‌یانیت ڕه‌نگین وه‌ك ئه‌و ده‌شت و ده‌ره‌ی كوردستان گوڵه‌كه‌م له‌ گوڵ گوڵتر …. 21 / 3
26 – به‌یانیت جوان، به‌یانیت روحی من ، به‌یانیت خه‌یاڵدانی رۆژ و شه‌وانم، جوانیت ئیلهامی شیعرم، هه‌ناسه‌ت نوكی قه‌له‌مم، روحت ده‌فته‌ری نوسینه‌كانم، سینكت كتێبخانه‌ی كتێبم، جوانه‌كه‌م، دوو رۆژه‌ ئافاتی مه‌رگ تێم ئاڵاوه‌ نازانم ئه‌و زویر بووه‌ له‌ كام یاخی بوون و هه‌ڵه‌وه‌ ئیلهامی وه‌رگرت، له‌ كام ژیله‌مۆی منه‌وه‌ پێیه‌كانتی ئه‌زیه‌ت دا و له‌ دڵه‌وه‌ داخورپای و ئه‌و ئازاره‌ به‌ دڵی میهره‌بانت گه‌یشت، په‌نجه‌كانم هه‌ڵوه‌رێن كه‌ بێ ڕێزیان نواند و خه‌میان كرده‌ دیاری ، له‌ بری نوقڵانه‌ی خێر ئاته‌شگای له‌ دڵی من به‌ردا، شیرینه‌كه‌م گه‌ر نیازت ه‌ایه‌ له‌ ده‌رگای دڵته‌وه‌ سنوورداشی ئه‌ودیوی ئه‌وینم بكه‌ی ئه‌وا من له‌ په‌نجه‌ره‌ی چاوه‌كانته‌وه‌ ئاوێته‌ی ئیشقت ده‌بمه‌وه‌ و له‌ خه‌ڵوه‌تی ئه‌به‌دییه‌تت هۆگر ده‌بم، تۆ ئه‌و جوانه‌ی گوڵت پێ ناگا، ده‌ڵێم داڕزێ ئه‌و په‌نجانه‌م نمه‌ك حه‌رامی ده‌رهه‌ق به‌ بوونت بكه‌ن…… 12 / 4
ئه‌ڵمانیا