Skip to Content

36 Views

نامه‌كانی ئیشق … 15 …   سه‌ردار جاف

نامه‌كانی ئیشق … 15 … سه‌ردار جاف

Be First!
by May 6, 2019 General
image_print


هه‌موو به‌یانییه‌ك

33 – به‌یانیت به‌ تریفه‌ی هه‌سته‌كانم جوان ، به‌یانیه‌ك خه‌مڕه‌وێنی دڵته‌نگیت بێ، به‌یانیه‌ك ئیدی ئه‌م ژنكوشتنه‌ی نیشتیمانی خۆمان نه‌بینین، ئیدی ئه‌وه‌ باهۆزه‌ و گێژه‌ڵوكه‌ی خه‌ره‌ندی كه‌ڵچه‌ری من و تۆیه‌، نازداره‌كه‌م ده‌زانم چه‌ند خه‌م له‌ خۆ كوشتنی ژن یا له‌ ژنكوشتن ده‌خۆی ، باڵات به‌ بارته‌قای ئه‌و له‌ پاشینه‌ی بیر و ئاوه‌زی هاوه‌ڵانمان ڕۆنیشی خاك ده‌بن، ده‌زانم ئاسوده‌ییه‌كانتان ده‌شێوێنێ، ئه‌دی له‌م سپێده‌وه‌ بۆ به‌ كۆڵێ هومێده‌وه‌ به‌ر ده‌رگات لێ ده‌گرم، ئه‌وه‌ له‌ هه‌گبه‌ و فه‌رهه‌نگی منا نه‌ك كاڵ بۆته‌وه‌ بگره‌ هه‌ر بوونی نه‌بووه‌، ئاسووده‌ و بێ خه‌م به‌ له‌ بری كوشتن ژیانی به‌خته‌وه‌ری و خۆشه‌ویستی و ئیشق و ڕێزگرتنم به‌ دیارییه‌ك بۆ هه‌ڵگرتووی تا هه‌تایه‌ له‌ ئامێزتا بخه‌مڵێ، ئه‌وه‌ وشه‌ گوڵه‌كانن ده‌بنه‌ چه‌پكه‌ ده‌ستی تووڕه‌ بوونم و له‌ به‌رۆكت ده‌درێن، ئه‌وه‌ شایی و ڕه‌شبه‌ڵه‌كی پێكه‌وه‌ییمانه‌ خه‌م له‌ دوێنێی رۆژهه‌ڵاتیمان ده‌خوا، به‌یانییه‌ و گۆرانی و مۆمی ژیانێكی نوێ بۆ خۆمان هه‌ڵ ده‌كه‌ین ، ئه‌وه‌ بیره‌ نامۆیانه‌یش ده‌بێ ببنه‌ ته‌رمی ئاینده‌ و بیسڕینه‌وه‌ له‌ شاده‌ماری ئه‌و ئاوه‌زه‌ پوچه‌ڵانه‌، چونكه‌ گوڵی تۆ بۆنبارانی نه‌ك پاخچه‌ و دیوانسه‌را ده‌كا، نیشتیمانیك پڕ شانێل ده‌كا… 2 / 4
34 – به‌یانیت ڕه‌نگی هه‌ناری گرتووه‌ و لێم بووی به‌ په‌روانه‌ و به‌ ده‌وری شه‌م ده‌خولێیته‌وه‌، ، چ ده‌بێ تا ئێره‌ و ئیدی ته‌واو بێ شه‌م به‌ ده‌وری په‌روانه‌ بخولێته‌وه‌، هه‌تا خه‌م بوخچه‌ی نه‌هامه‌تی خۆی بپێچێته‌وه‌ و چیدی به‌ر ده‌رگات نه‌گرێ، باڵه‌كانت ڕه‌نگین بكا، تا ڕه‌ونه‌قتر و به‌ گوڕترین هێزی فڕینی هه‌بێ، با به‌ به‌خشنده‌ییه‌وه‌ له‌ ڕوخساری گزنگ بچێ، هه‌ر له‌ ژوانی گه‌ڵامان بنێ و بتكێین به‌ سه‌ر چرای ڕۆژگار، دونیا ته‌ژی بێ له‌ ئه‌وین له‌ ئیشق و له‌ سۆز و كه‌فوكوڵی پاكی و جوانی و به‌رائه‌ت، له‌ قوڵایی ئیشقمانه‌وه‌ پێناسه‌ی ژیان بۆ ئه‌وانی دی بكه‌ین، مه‌موزین له‌ نیشتیمان نه‌بڕین، ئاوا مه‌یلی ڕه‌گ و بناغه‌ی ئه‌و هه‌سته‌مان هه‌بێ، به‌سته‌ بۆ كیژی سه‌رچۆپی و كوڕی شوان بڵێینه‌وه‌، به‌یانیت جواندار له‌ گوڵ گوڵتر……4 / 4
35 – ئه‌م سپێده‌ ڕۆحم ته‌نافه‌ و ژێی قژی خاوتی به‌ سه‌ر خۆیدا داوه‌، له‌و لایشه‌وه‌ هه‌ردووكمان هێدی هێدی گوێڕادێری ده‌نگی ماملێین ئه‌و شه‌وانه‌مان وه‌بیر دێنێته‌وه‌ كه‌وه‌ك زوڵفت سیاپۆشن و ته‌نها مۆمی ڕووخسارت ژووری پێكه‌وه‌ییمان ڕۆشن ده‌كاته‌وه‌، ئه‌م به‌یانییه‌ له‌ شه‌رمی سووری كوڵمه‌كانت ده‌ڕوانمه‌ شقڵی سه‌ر سینه‌ت تا ته‌واو بۆنی ژنێتیت به‌ هه‌ناسه‌مه‌وه‌ بلكێ، ئه‌م به‌یانییه‌ نیگایه‌كت به‌ ده‌م خه‌یاڵه‌وه‌ئاشنای په‌ڕینه‌وه‌ی ده‌ریایه‌كم ده‌كا ڕووه‌ و جه‌مسه‌ری باكوور هه‌ڵمده‌بڕێ، هێند وڕ و كاسم حه‌وسه‌ڵه‌م نه‌ماوه‌ ، سه‌رم وه‌ك جاران به‌ خۆمه‌وه‌ نییه‌، نه‌ له‌سه‌ری مرۆڤ ده‌چێ نه‌ له‌ به‌ردی باراش، سه‌رێك له‌ شه‌مبازیام وه‌رگرتووه‌، وه‌ك مزراح ده‌خولێته‌وه‌ و واق وڕماوی نیگای پڕ تریفه‌یی و جوانی و ڕه‌ونه‌قی ئه‌و ڕووخسار و قه‌د و قامه‌ته‌م، ده‌ڵێی له‌ به‌رده‌م فرۆشگای ته‌مه‌ن ڕاماوم، زه‌نگی مۆبیله‌كه‌ ڕایچه‌نیم هه‌سته‌كانی تۆی پێ ناسانمه‌وه‌، ئیدی خه‌یاڵدانم قووڵ قووڵ بوویه‌وه‌ به‌ تاڵ تاڵی پرچتا خۆی شۆڕ كردۆته‌وه‌ خه‌نده‌ی لێو و ڕتووشی گه‌ردنتی تێكئاڵان ئیتر چاك حاڵی بووم كه‌ له‌ گوڵ گوڵتر تۆی ئه‌زیزم …….. 7 / 4
36 – به‌یانیت جوان و خومار و مه‌ستی تێكئاڵانی شه‌وێكی دوور و درێژی پاییزان، مه‌یله‌كانم ئه‌م به‌یانه‌ سه‌ر به‌ تونێلێك ده‌كه‌ن ته‌متومانی سپێده‌ ده‌سڕنه‌وه‌، ته‌می هه‌ور سه‌ر له‌ نوێ سه‌ره‌تاتكێی نیگاكانت ده‌كا تا تاریكی بنێژێ، به‌ سه‌ر باڵی پێكه‌ شه‌رابه‌وه‌ سه‌ما مه‌ستمان ده‌كا و له‌نجه‌كانت ده‌مفڕێنێ، به‌یانییه‌ و گه‌لاوێژ چاوی خۆر ده‌به‌ستێته‌وه‌ و هه‌ناسه‌ت چاوشاركێم له‌ ته‌ك ده‌كا، هه‌موو گرێكوێره‌كانی لوغزی ئیشقمانمان بۆ ده‌كه‌نه‌وه‌، تۆ ژنه‌ میهره‌بانه‌كه‌ی قه‌ڵا و مناره‌ی هه‌ولێر و بن چیای سه‌فینی ، كه‌چی نها لاپه‌ڕه‌ی یاده‌وه‌رییه‌كان بۆ یه‌ك ده‌نوسینه‌وه‌ له‌ په‌نجه‌ره‌ی دیداری خه‌نده‌كانمه‌وه‌ قاوه‌ تاڵه‌كانی یه‌كدی به‌ ماچه‌ هه‌نارییه‌ك شیرین ده‌كه‌ین ، ئه‌و ماچه‌ی له‌ خه‌ون و خه‌یاڵه‌وه‌ بوونه‌ لامیسه‌ی جه‌سته‌ و به‌یانی پێ به‌یان كردین، ئه‌و به‌یانه‌یش به‌ جوانی جوانیت ڕاناگا له‌ دامێنی ناخی بێگه‌ردت غلۆر ده‌بێته‌وه‌ ، ده‌بێته‌ سه‌ره‌ ڕێی ئاشقان و ئه‌و گوڵه‌یش بچنه‌وه‌ هێشتا به‌ گوڵی تۆ ناگا ……4 / 4
37 – كازیوه‌یه‌ك نییه‌ پیاسه‌كانی ته‌نیاییم له‌ سۆراغی ئه‌و هه‌سته‌ به‌ ئاگایه‌ته‌وه‌ وێڵی شه‌قام و كوچه‌كانی نیشتیمانی غوربه‌ت نه‌بێ، ئه‌م به‌یانییه‌ ته‌نیاییه‌كانم به‌ ئاودامانی هه‌ناسه‌ته‌وه‌ هه‌ڵواسیوه‌، سۆراغی تێفكرینه‌ وه‌نه‌وشه‌ییه‌كانی ماچی ئه‌به‌دییه‌تی گه‌ڕه‌لاوژێیانه‌ت ده‌كا، به‌ ته‌لیسمێكی قه‌تیساوی خۆره‌وه‌ لكاوه‌ و هه‌ڵوه‌دای تروسكایی هه‌نگاوه‌ ڕه‌شه‌كانی ده‌م زویر بوونی ئاته‌شگایه‌، كه‌ ته‌نیا ناخی من ده‌برژێنێ، له‌ قوفڵی كڵۆمدراوی به‌زه‌یی ده‌گه‌ڕێ كێلونه‌كه‌ی بگۆڕێ و به‌ سانایی ده‌ست به‌ باخچه‌ ژاوه‌ژاوه‌كانی گه‌ڵاوه‌ بگرین، من و تۆ وه‌كو گه‌ڵا نه‌كه‌وینه‌ سه‌ر زه‌وی، لێ خولیاكانی به‌یانیانمان ته‌مه‌نێكی به‌ كێرد سه‌ربڕاوی بێهوده‌ن، زیز بوون و ئاشته‌وایی دوای ئه‌وه‌ په‌رده‌ شه‌رمنییه‌كان ڕاده‌ماڵی و هاوژینی ژینمان جاڕ ده‌ده‌ی، ئه‌م به‌یانیه‌مان له‌ هه‌موو گزنگێ روونتر ده‌كاته‌وه‌، وه‌لێ ژووره‌كه‌م گوڵێكی تێدا ڕواوه‌ له‌ گوڵ گوڵتره‌ …. 9 / 4
38 – به‌یانیت جوان… به‌یانیت ئاوێته‌ی ڕۆحی من… به‌یانیت ئه‌ندێشه‌ی شه‌و و ڕۆژانم …. جوانیت ئیلهامی شیعرم، هه‌ناسه‌ت نوكی قه‌ڵه‌م و ڕۆحت ده‌فته‌ری نوسینه‌كانم، سینگت كتێبخانه‌ی كتێبم….
جوانیله‌كه‌م… دوو ڕۆژه‌ ئافاتی مه‌رگ تێمئاڵاوه‌، نازانم ئه‌و زویر بوونه‌ له‌ كام یاخیبوون و هه‌ڵه‌وه‌ ئیلهامی وه‌رگرتووه‌، له‌ كام ژیله‌مۆی منه‌وه‌ پێیه‌كانتی ئه‌زیه‌ت داوه‌ و له‌ دڵه‌وه‌ داخورپاوی و ئه‌و ئازاره‌ی به‌ دڵی میهره‌بانت گه‌یاند….. په‌نجه‌كانم هه‌ڵوه‌رێن كه‌ بێ ڕێزیان نواند و خه‌میان كرده‌ دیاری ، له‌ بری نوقڵانه‌ی خێر ئاته‌شگای له‌ دڵم كرده‌وه‌، شیرینه‌كه‌م…….. گه‌ر نیازت وایه‌ له‌ ده‌رگای دڵته‌وه‌ سنوورداشی ئه‌و دیوی ئه‌وینم بكه‌ی …… ئه‌وا من له‌ په‌نجه‌ره‌ی چاوه‌كانته‌وه‌ ده‌خزێم و ئاوێته‌ی ناخت ده‌بم و گڕی ئیشق خۆش ده‌كه‌مه‌وه‌ و له‌ خه‌ڵوه‌تی ئه‌وینی ئه‌به‌دییه‌تتدا هۆگر ده‌بمه‌وه‌…. تۆ ئه‌و جوانه‌ی گوڵت پێ ناگا، ده‌ڵێم داڕزێ و هه‌ڵوه‌رێ ده‌ست و په‌نجه‌كانم كه‌ نمه‌ك حه‌رامی به‌ بوون و باڵات بكه‌ن.12/4
39 – له‌ ته‌ك ئه‌م به‌یانه‌دا…. له‌ چاوه‌ نێرگزیه‌كانته‌وه‌ نمه‌ی تۆخبوونه‌وه‌ی ئیشق تۆو ده‌كه‌م و به‌ری ڕه‌نجی ماندوو بوونی دڵ ده‌سكه‌نه‌ بكه‌ین، لێوه‌كانمان سڕسڕ و بته‌زێنین تا له‌ دوو ڕۆژی دابێ به‌ یه‌كدی گه‌رم گه‌رم ببنه‌وه‌ و تینوێتی خۆیان بشكێنن، ئامێزم له‌ به‌ر سه‌رمای به‌یانیان بڕچێنم باشه‌خته‌ی نیشتیمان زه‌فه‌ری پێببا له‌ ڕاموسانی باڵاتا خاو ده‌بنه‌وه‌، پێكڤه‌ گه‌مه‌ به‌ ئاونگه‌كانی سه‌ر سینه‌ی یه‌كدی بكه‌ین، له‌ چیمه‌نه‌ توكنیه‌كه‌ی سه‌ر سینه‌م ئه‌فسونه‌كانی خۆتی تیا بنوێنه‌، با ترپه‌ی ده‌نگت په‌لكێش و نغرۆ بوونی ئاوێزان بوونمان بكا هه‌ناسه‌مان له‌ باوه‌شا كۆتا به‌گڕوگاڵی خۆیان بێنن و ئه‌شك ڕشتن تووڕ بده‌ن، ئه‌م به‌یانه‌ هه‌ردوو به‌ده‌م ئاسۆوه‌ سوور بچینه‌وه‌، وه‌ك مه‌رقه‌ده‌كه‌ی سه‌ر دڵم سپی سپی كزه‌ بای سه‌ردی ده‌م سوبح بهۆنینه‌وه‌، له‌ له‌ره‌ی كازێوه‌وه‌ نێوانی لێوه‌كانمان گه‌زۆی شیرین هه‌نگوینی له‌ شه‌رمانا بتكێننه‌ سه‌ر زه‌وی، برین و زامی ئاشقان به‌ بۆن و ڕه‌نگی گوڵینت ساڕێژ بكه‌ ، تۆی له‌ گوڵ گوڵتر. 15 / 4
40 – به‌یانیت نه‌باتی وه‌ك ئه‌و ڕۆژانه‌ی ده‌تدواندم، ئه‌م سپێده‌ سینه‌م له‌ گه‌ڵ هاڵاوی هه‌ناسه‌م نامۆن به‌ یه‌ك، دوا ترپه‌ی دڵی غوربه‌تیم به‌ شه‌به‌یخونی نێو شه‌به‌نگ ده‌ئاڵێنم، ده‌مێكه‌ هه‌سته‌كانم به‌ دووت ڕا ده‌كه‌ن و وێڵ و عه‌وداڵ و له‌ سۆراغن ئه‌ی غوربه‌تتر له‌ من نه‌ ده‌تگرنه‌وه‌ نه‌ ده‌تبیننه‌وه‌، نازانم له‌ خێڵی خێوی یا نه‌بوونێكی هه‌ڵتۆقیوی، وا نووزه‌ی چرا تۆڕم لێك ده‌نێم و تۆ هه‌ر ده‌رنه‌كه‌وتی سوعبه‌ته‌كانی ده‌سله‌ملانێی پێش نوێژی زویر بوون نۆژه‌نكه‌یته‌وه‌، وا هه‌زاران جار غه‌ریبی تۆ ده‌كه‌م و مه‌یله‌كانت نوستوون و نامدوێنن، پێم بڵێ ئه‌مه‌ كامه‌ ئه‌وین و ئیشقێكه‌ ڕێی خۆی ناگرێته‌وه‌، تۆ وه‌ره‌ و بنۆڕه‌ به‌یانیانم چ به‌سته‌ڵه‌كێكی جه‌سته‌ و روحێكی گڕ تێبه‌ربووی كۆست و كۆته‌ڵ و ڕه‌شپۆشی دۆراندۆری گرتووم، ئێ تۆ له‌ ئازاری من ناگه‌ی یا سزادانت به‌ باڵای هه‌تیوی بێ تۆییم به‌ به‌را بڕیوه‌، ژن كه‌ له‌ گوڵ ناسكتر بوو ده‌بێ به‌زه‌ییه‌كانی ناسك و ڕۆشن بێته‌وه‌، خۆ من بێ تۆ و بێ بزه‌ و خه‌نده‌كانت له‌ مرۆڤ بوونم كاڵ ده‌بمه‌وه‌ ………

سه‌ردار جاف

Previous
Next

Leave a Reply