Skip to Content

نامه‌كانی ئیشق … 16 …     سه‌ردار جاف

نامه‌كانی ئیشق … 16 … سه‌ردار جاف

Closed
by ئایار 13, 2019 General


هه‌موو به‌یانییه‌ك

41 – گزنگی به‌یانیت ڕۆشن و به‌ تریفه‌، ئه‌م به‌یانییه‌ ئاوازێكت بۆ ده‌چڕم هێشتان ڕیتم و ژێیه‌كانی هیچ ئامێرێ نه‌یژه‌نیوه‌، گۆرانیه‌كت بۆ یه‌ژم نۆته‌كانی له‌ خه‌ڵوه‌تی كارێزچۆڕه‌وه‌ سه‌رچاوه‌ی گرتبێ، تێكسته‌كه‌ی له‌ میحراب و كڕنوشی ئه‌وینه‌وه‌ هه‌ڵقوڵا بێ.
بشێ پرسیارگه‌لێ هزرتان ماندوو و خامۆش و مت و ده‌سته‌مۆ بكا، نا نه‌شمیله‌كه‌م غایه‌ڵه‌ی نامۆیی تووڕ بده‌، شه‌نگه‌بێریی تۆ له‌ فه‌زای باڵابوونی پاكی و جوانی و ژیرمه‌ندییه‌وه‌ تخوبه‌كانی سه‌راپا به‌زاندووه‌، له‌ پرخه‌ی خه‌وی مورادیما ده‌تبینمه‌وه‌ و شكۆفه‌ی هۆشمه‌ندییه‌كانت ڕاموسانم ده‌بێ، ساڵانێكه‌ خه‌ونم بۆته‌ نۆته‌ خه‌و و نها خه‌ونم له‌ ته‌ك ژنێكه‌ باڵای به‌ بارته‌قای ئه‌ستێره‌ و هزری كانیاوی ڕوونی ژنبوون و هۆگری ژان و ئازاری ژنانی نیشتیمانمه‌، ژنێكی له‌ كه‌نار ده‌ریاوه‌ بۆ قوڵایی ئه‌و شه‌پۆلانه‌ ده‌ڕوانی كه‌ سه‌وڵه‌ به‌ هێزه‌كانیش به‌ ئاسته‌م قورتاربوونی ژن ده‌خه‌مڵێنن، له‌وێ ڕا خه‌م شه‌قاوه‌كانی هه‌نگاوم بۆ جوانی ناخت میلۆدی خۆی ده‌ژه‌نێ, ئه‌م ئاواز و نه‌غمه‌یه‌ ته‌نها تۆی ژن لێی تێ ده‌گه‌ی، گۆزه‌یه‌كه‌ سه‌ر ڕێژ له‌ گه‌ڵا و گوڵی باخچه‌ی ئه‌وین، ئیدی ئێمه‌یش شه‌موله‌یه‌كی دامه‌نی میهره‌بانی و جوانی تۆین ……….14 / 4
42 – به‌یانیت شیرین وه‌ك ئه‌و ڕۆژانه‌ی ده‌تدوانم، ئه‌م به‌یانییه‌ سینه‌م له‌ ته‌ك ته‌وژمی هه‌ناسه‌م نامۆن، دوا ترپه‌ی دڵی غوربه‌تیم به‌ شه‌به‌یخونی نێو شه‌نگ و بیر و په‌یڤه‌كانت ده‌ئاڵێنم و ده‌بنه‌ شه‌به‌نگێك شه‌به‌قی شه‌وقی دڵم شه‌ق ده‌كا، ده‌مێكه‌ هه‌سته‌كانم به‌ دووت ڕا ده‌كه‌ن وێڵن عه‌وداڵ و سه‌ر لێشێواون و له‌ سۆراغتن و ناتگرن و ناتبیننه‌وه‌، وا نووزه‌ی چراتۆڕم له‌ كزی ده‌دا و لێت ده‌نۆڕم و هێدی هێدی لێك ده‌نرێن، تۆ هه‌ر نه‌هاتی و هه‌ر نایه‌ی سوعبه‌ته‌كانی ده‌سله‌مڵانێی پێش زویر بوون نۆژه‌نكه‌ینه‌وه‌، وا ملیۆنان كه‌ره‌ت له‌ غه‌ریبی تۆدا ده‌تلێمه‌وه‌ و مه‌یله‌كانت نوستوون و نامدوێنن، پێم بڵێ ئه‌مه‌ كام ئیشق و ئه‌وینه‌وه‌ خه‌ڵاتانی ئازاره‌كانی بووین و ڕێی خۆی ناگرێته‌وه‌، تۆ وه‌ره‌ و بنۆڕه‌ سپێدانم چ ئازارێكی به‌سته‌ڵه‌ك قۆرخی كردووم و كۆست و ماته‌م و ڕه‌شپۆشیم لێ داده‌گرێ، ئێ تۆ له‌ ئازار من تێ ناگه‌ی یا سزادانت به‌ باڵای هه‌تیویی بێ تۆییم به‌ به‌را ده‌دووری………. ژن كه‌ له‌ گوڵ جوانتر و ناسكیر بوو گه‌ره‌كه‌ به‌زه‌ییه‌كانی له‌ سۆزداری ببینێته‌وه‌ ناسكتر ڕێی گه‌یشتنی یه‌كبوونمان ڕۆشن بكاته‌وه‌، خۆ من بێ تۆ و بێ بزه‌ و خه‌نده‌كانت له‌ مرۆڤ بوونم كاڵ ده‌بمه‌وه‌… 16 / 4
43 – به‌یانیت به‌ دیداری نیگاكان جوان ده‌بێته‌وه‌، به‌یانییه‌ك له‌ ڕه‌نگی سبه‌ینانی دی نه‌چێ، به‌یانیه‌ك چاوه‌كانم بۆ دیقه‌تی قامه‌تت قومریانه‌ خۆی ده‌نوێنێ، به‌یانییه‌ك به‌ تێكشانی به‌سته‌ڵه‌كی دووریمان پیرۆز ده‌كه‌م، به‌ سه‌ر باڵه‌ زیڕه‌ییه‌كانی لۆفتهانزاوه‌ شین شین ده‌چمه‌وه‌، تا سپێده‌یه‌كی سپی سپی له‌ به‌فر سپیتر جه‌سته‌ی ته‌زیوم ده‌كاته‌ دیاری ئه‌مجاره‌ و به‌ نیگاكانتی ئاشنا ده‌كاته‌وه‌، ئه‌م سپێده‌ فلوگهاڤن به‌ روحی منه‌وه‌ جمه‌ی دێ، مرۆڤه‌كان له‌ كاروانسه‌رای وڵاتان ژێوان نابنه‌وه‌ منیش بۆ كن تۆ، ئاپۆڕای ئه‌م سپێده‌یه‌م هێنده‌ لا جوان و شیرین و كه‌یفشادییه‌ به‌ بارته‌قای هه‌ناسه‌ت چه‌شه‌ی ڕۆژێكی خۆش خۆش، شه‌وێ به‌ختم له‌ ته‌ك ستاسیۆن و گڤه‌ی شه‌مه‌ندۆفه‌ر به‌ كۆتا هات، ئه‌ندیشه‌كانم بۆ ژووانی ئیشق ئه‌شكی شادی ده‌پرژاند، نازانم ئه‌م به‌یانییه‌ من له‌ نێو ته‌لیسمی ڕه‌نگاڵه‌یی و نه‌هه‌نگم یا ماسی له‌ ناخما خۆی مه‌ڵاس داوه‌، ده‌شێ هه‌ردووكی بێ هه‌م له‌ نێو سكی نه‌هه‌نگك هه‌میش ماسییه‌ك له‌ ناوه‌وه‌ تێكی شكاندووم و ده‌سته‌مۆی خۆی كردووم، ئااای كه‌ هه‌راسانی كردووم و بێ وی ئۆقره‌ ناگرم، چه‌ند كاژێرێكی دی نیگاكان تێر تێر ده‌بن له‌ ڕه‌نگی چاوه‌كانت له‌ بۆنی لێوه‌كانت له‌ تامی هه‌ناسه‌ت، به‌ غه‌مزه‌ی چاوه‌ مه‌خموورییه‌كانت له‌ كاوڵاشی خه‌راباتم ده‌ردێنی و ده‌مكه‌یه‌ گه‌ڵا و لك تا گوڵبوونت جوانتر و هه‌یبه‌تتر و بۆندارتر خۆ بنوێنێ….. 18 / 4 .
44 – به‌یانیه‌ هه‌گبه‌ی سروشتی خۆی پێچایه‌وه‌ ده‌یه‌وێ جوانیت ڕاماڵی كه‌چی هه‌ر نه‌گه‌یشته‌ دامه‌نت، نه‌شمیله‌كه‌م به‌یانییه‌ك بۆنی هه‌ولێرت لێ دێ به‌یانیه‌كی دی بۆنی پایته‌ختی جه‌مسه‌ری باكوور و سڵاوه‌ گه‌رمه‌كانیشم دنه‌ت ده‌ده‌ن بێیه‌ نێو ئه‌و تۆڕه‌ جاڵجاڵۆكه‌ییه‌ و ناتبینم، نازانم تۆ له‌ كام سوچ و قوژبنی دڵتدا منت حه‌شار داوه‌ و یه‌كدی نادۆزینه‌وه‌، له‌ سه‌ر ڕه‌فه‌ی دڵنیایین یا هێشتان دڵه‌ڕاوكێمانه‌ له‌ چیمه‌نێك ده‌ژین و پاییز خه‌زاندارمان بكا، گه‌ڵا زه‌رد زه‌رده‌كان دامانپۆشن بۆ حه‌سره‌تێ، بشێ له‌ نێو بوخچه‌یه‌كت نابم و گرێ كوێره‌ی هه‌تا هه‌ایی درابێ، یا نوقڵێكم و هێشتان تامی ڕۆژانی بووری له‌ بن دانه‌كاندا په‌خش ده‌بنه‌وه‌، تۆ دیقه‌تێكی ئه‌و نوكی قه‌ڵه‌مه‌ بده‌ كه‌ بۆت ده‌نوسێ ، ملیۆنان حه‌یف و جه‌غار لێم دووری دوور و نامبینی، بزانه‌ هاڵاوی ئه‌وینم چۆن لێ هه‌ڵده‌ستێ و چه‌ند به‌ تاسوقی رۆژگاره‌وه‌ پیته‌كان له‌ یه‌ك ده‌دا و وشه‌ ده‌خولقێنی و روح به‌ به‌ری ڕسته‌یا ده‌كا و مرواریانه‌ ده‌یانهۆنێته‌وه‌، ئه‌وه‌ نه‌ك هه‌سته‌ كه‌فوكوڵییه‌كانمن لێ ئه‌وه‌ ده‌ودیو دیواری ئه‌وینداریمن و قوڵپ ده‌ده‌ن، بێ ده‌نگیت فرمێسكه‌كانم ده‌كه‌نه‌ بارانێ گه‌ڵا زه‌رده‌كانی پێ سه‌وز ده‌كاته‌وه‌ ، ئێمه‌ش به‌ نمه‌ی بارنێ ته‌ڕ بینه‌وه‌ بۆ ئامێزبونێكی بۆندار تر له‌ گوڵ ….. 23 / 4
45 – ئه‌م به‌یانیه‌ت به‌ پرشی هه‌ناسه‌م ته‌ڕ و جوان، به‌ بۆنی شانێل ژوورت پڕ بێ له‌ بۆنی ئه‌وین، ئه‌م به‌یانه‌ هه‌ر له‌ ته‌ك خۆر هه‌ڵاتنه‌وه‌ نزاكانم گه‌رم گه‌رم بوون و ده‌پاڕێنه‌وه‌ ئه‌وین و ئیشق قۆرخت بكا و به‌ سه‌رتا زاڵ بێ و له‌ په‌یمان و دڵبه‌ستنی دڵه‌كان نزیكبینه‌وه‌ ، چیتر دووری زه‌فه‌رمان پێ نه‌با و دابڕان به‌ یه‌كجاری له‌ زبڵدانی مێژوو بنێین، نزا ده‌كه‌م و سوێندیش به‌ ده‌نك به‌ ده‌نكی ته‌سبیحه‌كه‌ی باوكم ده‌خۆم كه‌ وه‌ك جاران ناوه‌ پیرۆزه‌كانی ئه‌شقی تیا هه‌ڵكۆڵراوه‌ ئه‌و ده‌ریا پان و به‌رینه‌ی دووریمان هیشك هه‌ڵگه‌ڕێ و سه‌رقاڵ و مه‌ستی چنینه‌وه‌ی ده‌نكه‌كانی ئه‌و ته‌سبیحه‌ بین، با وه‌ك نه‌وره‌س و ده‌ریا یه‌كبگرینه‌وه‌، به‌یانیانمان به‌ ئاویزانبوونی یه‌كه‌وه‌ قه‌شه‌نگ بكه‌ین، وه‌ك تاریكی و چرا هاوه‌ڵ بین، سارد و گه‌رمی ئه‌له‌كتریك بین ماڵێك ڕۆشن بكه‌ینه‌وه‌، ده‌مێكه‌ هه‌ردووك نامۆی رۆژگارین، ئه‌زیزه‌كه‌م ته‌نها تۆ له‌ گوڵ گوڵتری و به‌ تۆوه‌ ژینم ڕۆشنه‌ …… 24 / 4 .
46 – ئاای كه‌ به‌یانییه‌كی جوان چاوه‌نواڕی دادێی ته‌مه‌نمان ده‌كا هه‌ر بۆیه‌ ئه‌م سپێده‌ به‌ بۆنی نمه‌ بارانێكی فێنكایی په‌نجه‌ره‌ی ئیشقی غوربه‌تیت له‌ كۆڵانی دڵما ئاو باران ده‌كه‌م، به‌ گه‌ڵای دره‌خی سێبه‌ری ڕه‌نگین بنوێنێ و گولیش جوانتری بكا، به‌یانییه‌ و باڵه‌كانم ده‌كرێنه‌وه‌ فێره‌ فڕینی سه‌ر ده‌ریای شین بوون، له‌ ته‌ك باڵنده‌كانا وێڵم و عه‌وداڵی سیما و ڕوخسارتین، له‌ نێو پۆله‌ ماسییه‌كدا سۆراغت ده‌كه‌م ، كچێ خۆتم لێ مه‌شاره‌وه‌ هه‌ر ئاشقه‌كه‌ی سه‌ر و نێو دڵمی ، چه‌پكه‌نه‌ی دڵۆپ دڵۆپی ده‌ریا ده‌كه‌م تا هیشك هه‌ڵگه‌ڕێ و بتدۆزمه‌وه‌ ، بشێ نه‌بووبی به‌ ماسییه‌ یاقوتییه‌كه‌ و لێم یاخی نه‌بوو بی، كه‌ دێمه‌وه‌ له‌ ئاودیو بوونی خۆمه‌وه‌ داڵان و ده‌رگای ماڵ و ئیشقت ماچ ده‌كه‌م، تووله‌ ڕێگای هه‌ورازی به‌ر ماڵت روحی بولبولینتی تیا ده‌بینمه‌وه‌، ئه‌و گوزه‌ر و تۆڕه‌ ئه‌پارتمانه‌ هه‌ر هه‌موو له‌ تۆ ده‌چن، تۆیش له‌ شنه‌ی با به‌ ئاسته‌م ئاونگت گرتووه‌، باوه‌شم پڕپڕ ده‌كه‌ی له‌ با له‌ بۆنت له‌ خۆت ، كه‌نگێ ئه‌و ڕۆژه‌ دابێ و بیبینین، گوڵه‌كه‌م له‌ گه‌ڵ گوڵتر ….. 26 / 4 .
47 – به‌یانیه‌ك مێژووی ته‌مه‌نمت بۆ ده‌كه‌م به‌ سوتوو تا له‌ ڕچینی سه‌رما به‌ دوور بی، هه‌ر به‌ دووریت ناڵه‌ و هاوار و ئازاری سات و ڕۆژ و هه‌فته‌ و مانگ و ساڵانه‌م چه‌كه‌ره‌ ده‌كا، مه‌گه‌ر ته‌نها تۆ له‌و حه‌سره‌ت و ناڵه‌م تێ بگه‌ی، فرمێسكه‌كان له‌ گه‌ڵ خۆر له‌ دایك ده‌بن و سووراوه‌كه‌ی تۆ ده‌یسڕێته‌وه‌، هه‌موو سپێده‌یه‌ك سووتانی به‌ختم به‌ ده‌م ڕه‌شه‌باوه‌ ته‌شه‌نه‌ ده‌كات و به‌ ئازارمه‌وه‌ چنینه‌وه‌ی جاڕ ده‌ده‌م، خه‌نده‌كانت ده‌بنه‌ فریاد ڕه‌سم، له‌ دایكبوونی شیعرێ ژان و ئازاری ده‌گاتێ و هاوێر نابێ مه‌گه‌ر سڵاوێكی پڕ نازت بتوانێ سه‌ما به‌ وشه‌ شیعرییه‌كان بكا و مه‌ست مه‌ست بێ، ئه‌و ده‌مانه‌ی له‌ غیابی تۆ له‌ پێشوازی سبه‌ینان ده‌بم، ده‌بمه‌ مناڵێكی وڕكگرتووی سه‌ر ته‌نبوور و بۆ له‌تێ نانێكی گه‌رم ده‌كڕووزێمه‌وه‌، كه‌ كپ ده‌بمه‌وه‌ مانای وا نییه‌ كه‌فوكوڵی دڵی پڕ جۆشم داده‌مركێ ، نا ئه‌زیزه‌كه‌م ئه‌و ده‌مانه‌ حاڵی ده‌بم خاوه‌نداری ئیشقم هه‌یه‌ و لێم ناترازێ ده‌زانم خانه‌خوێكه‌ی نێو خولیاكانم ئه‌شكم ده‌كاته‌ ماڵی خۆی و به‌ جوانی ده‌مشێلێ تا ئازاره‌كانم بپوكێته‌وه‌، بۆ خۆیشت ده‌زانی برین و كێمی ناخم دووریه‌ دووری، گرێیه‌كه‌ وا به‌ سانایی ناكرێته‌وه‌، تۆ به‌ حه‌رفه‌كانی ئه‌وین خاوی ده‌كه‌یته‌وه‌، ساباتێكم بۆ چێ ده‌كه‌ی تا به‌یانیان ده‌م به‌ هه‌ناسه‌ی سوبحته‌وه‌ بنێم، ئه‌م به‌یانیه‌یش وه‌ك هه‌میشه‌ شه‌به‌قی تۆ ناخم ڕۆشن ده‌كاته‌وه‌ گوڵه‌كه‌م له‌ گوڵ گوڵتر…29 / 4 .
48 – به‌یانیم پڕ نزا بۆ تۆ ، بۆ شاد بوون، له‌ سه‌ر سینگی دووگوردی ئه‌وین ڕاكشێ ، با ئه‌م سپێده‌یه‌ حه‌وت ركات نوێژی ئاشقانه‌ت بۆ دابه‌ستم، جگه‌ له‌ تۆ ناوی ڕكاته‌كانم ناوێكی دیم لێ نه‌ناوه‌، تۆ بڵێی په‌روه‌ردگار لێم بگرێ ڕكم به‌ سه‌ردا ببارێنێ و ته‌مه‌نم به‌ كۆتا بێنێ، بۆ ….. ؟ خۆ كه‌نیزه‌م نه‌گرتووه‌ و مامه‌ڵه‌ی پێوه‌ بكه‌م، من تۆ له‌ خۆما كۆ ده‌كه‌مه‌وه‌، وه‌ك ئه‌و شۆڕه‌ بییه‌ی به‌ شه‌نگه‌بێریت ناساند، لێك ده‌ئاڵێین به‌ره‌و ئاسمان هه‌ڵده‌زنێین هه‌ڵگژێین له‌ مناڵییه‌وه‌ تا ئێستا هه‌ر پێمان ده‌ڵێن خوا به‌ حه‌واوه‌یه‌ ده‌چینه‌ به‌ر ده‌رگای ده‌پاڕێینه‌وه‌، ئیدی ئاشق كوشتن به‌س بێ ، ئه‌رێ چی بوو ئه‌م هه‌موو تاوانه‌ بۆ نابڕێته‌وه‌، ده‌سا تۆیش ده‌رگای ئیشقتم لێ دامه‌خه‌ ئه‌و لێوانه‌ت به‌ هه‌ناسه‌مه‌وه‌ بنێ تێرتێر بۆنیان بكه‌م، خودا له‌ چاكه‌یدا به‌ دڵی خۆتت له‌ گه‌ڵ ده‌كا، تۆ له‌ ته‌مه‌نی منا هه‌موو چرۆیه‌كی جوانی ته‌نها ده‌بێ له‌ هزرما بپشكوێی گوڵه‌كه‌م له‌ گوڵ گوڵتر …. 29 / 4 .
49 – به‌یانیت جوان به‌یانیت خه‌رمانێك گوڵ ، به‌یانیت لێوڕێژی ده‌نگی من ، به‌یانیت پڕ قریوه‌ی خۆشی ئه‌ی ژنه‌ میهره‌بانه‌كه‌، ژنێك سه‌رڕێژی پاكی و به‌رائه‌ت و راستبێژی، ژنێك بێ چه‌شنی خان و مانی ژنێك بۆندارتر له‌ میسك و عه‌نبه‌ر و شانێل ، ژنێك ساده‌ و خاكه‌ڕا و سه‌نگین و شیرین، ژنێك خودان شه‌هامه‌تی ژنێتی، ژنێك په‌یام هه‌ڵگری ژنانی بوێر و چه‌له‌نگ و هه‌قبێژ، ژنێك هه‌موو ڕوحدارێ ئیره‌یی پێ ده‌با، حه‌یف و ده‌ست له‌ ئه‌ژنۆ ئاسووده‌ییت له‌ قوڵایی ده‌ریا نوستووه‌، شه‌ته‌كی و ماندووبوونی شۆڕه‌ سوارێكی ده‌وێ له‌ گه‌ردن و نێو چه‌وانتی بئاڵێنێ، ژنێكی مۆمئاسا بۆ ڕازاوه‌كانی ژین ده‌توێیته‌وه‌ و ناخت تاریك تاریك وه‌لێ هومێده‌كانت باڵا و خۆ له‌ گه‌وره‌بوون ده‌ده‌ن حه‌سره‌ته‌كانت به‌ ده‌م باڵابوونی جگه‌ر گۆشه‌كانه‌وه‌ ده‌ڕۆن، لێره‌وه‌ جاڕدانی سوتانی جوانی و ته‌مه‌نت بۆ كۆرپه‌كان به‌یان كردووه‌ ئه‌وه‌ میهره‌بانی ڕه‌وتی ژنێتیته‌ ئه‌ی شه‌هامه‌تترین ژن، گوڵێتی ته‌نها ئه‌وه‌ نییه‌ باخچه‌ بڕازێنیته‌وه‌ ئه‌وه‌ گوڵێتییه‌ كه‌ له‌ چوار لاوه‌ سیفه‌ته‌كانی ژنێتیت لێ بتكێ ئه‌وه‌ له‌ تۆدا هه‌یه‌، له‌ گوڵ گوڵتر …. 1 / 5
50 – به‌یانیت جوان و خۆش به‌یانیت گه‌رمه‌ ساباتی من، به‌یانییه‌ك ئاته‌شگای ئیشقتم بۆ داخراوه‌ و له‌ غوربه‌تی ته‌نهایی ده‌مسوتێنێ، ده‌بمه‌ چڕه‌ دووكه‌ڵی ئه‌و مه‌جمه‌ره‌ و ئاوایی نیشتیمانێ به‌ ده‌م هه‌ناسه‌ی گه‌رممه‌وه‌ ته‌نگه‌تاو ده‌كه‌م، له‌ سوتووی پڕپۆڵه‌یی جه‌سته‌مه‌وه‌ سه‌مادێ بۆ بن دره‌ختی ته‌مه‌نت ده‌ڕژێنم و له‌ سه‌روبه‌ندی كۆتا ژینما نه‌شئه‌یه‌كی جوان به‌ ئاوێته‌ی تریفه‌ی خه‌نده‌ی لێوه‌كانت ده‌كه‌م، با توانه‌وه‌ و نه‌مانی من جوانی به‌ سیما و ڕووخساری تۆ بدا، ئه‌وه‌ به‌یانكردنی سه‌ره‌تای ئیشقمه‌ و له‌ به‌ر ده‌رگه‌ی سبه‌ینانی ناخت نه‌ك هۆگر ئولفه‌تی دوا هه‌ناسه‌مه‌ و به‌رد به‌ خه‌ره‌ندی توانه‌وه‌ ئاشنا ده‌كا، سۆماكانم نیگای بێ كۆتاییت لێ ده‌گرن سیره‌یه‌ك نیشانه‌كانی بپێكێ، ئیدی ئیشقێكه‌ له‌ قۆڵبه‌ندی روحتا یه‌خسیر و ده‌سته‌مۆیه‌ لوتفێ به‌ لێوه‌كانت بده‌ با ماچێكی ده‌م سپێده‌ی قه‌رزی به‌ لێوه‌كانم بداته‌وه‌، له‌ بازاڕی بێ كه‌سی خۆیدا موحتاجی ئه‌و لێو تێكه‌ڵبوونه‌یه‌، شه‌وان ئاگر تێبه‌رمه‌ده‌ به‌ ته‌نیاییش له‌ چۆڵه‌وانی ته‌ریكی دۆزه‌خی خولانه‌وه‌م مه‌كه‌ ، شه‌وچه‌ره‌ی سوتانمت پێشكێش ده‌كه‌م گوڵه‌كه‌م له‌ گوڵ گوڵتر …… 2 / 5

سه‌ردار جاف

ئه‌ڵمانیا

Previous
Next
Kurdish