Skip to Content

78 Views

نامه‌كانی ئیشق … 17 …    سه‌ردار جاف

نامه‌كانی ئیشق … 17 … سه‌ردار جاف

Be First!
by May 20, 2019 General
image_print


هه‌موو به‌یانییه‌ك

51 – ئه‌م به‌یانیه‌ جوانیه‌كه‌ت له‌ ڕه‌نگی یاقوته‌كانی ده‌ریا ده‌چێ، زه‌نگیانه‌ت له‌ گه‌وهه‌ری ماسی بۆ ده‌چنم، به‌ شه‌پۆلی ده‌ریاوه‌ گوژم ده‌خۆم و ده‌خزێمه‌ گڵێنه‌ی چاو و سۆما و له‌ گه‌ڵ بریسكانه‌وه‌ی زه‌نگیانه‌ روحێكی ئاوی پاكتر له‌ ده‌ریا ده‌ده‌ینه‌ ڕۆژگاره‌ لێڵه‌كانی نها، نیگاكانم سه‌ما له‌ سه‌ر تاڵ تاڵی بسكت ده‌كا، زوله‌یخایه‌ك بیت بۆ روحی ئاو، جه‌للاده‌كانی ئیشق نیشتیمانی دڵمانی ته‌نیوه‌، ماڵه‌كانی ئه‌وێ پڕپڕن له‌ شه‌مولانه‌ی قێز له‌ ئه‌وینداری ده‌كه‌نه‌وه‌، هێشتان به‌ به‌رائه‌تی دله‌كانه‌وه‌ نامۆن، من و تۆ تازه‌ به‌ تازه‌ باوه‌ش به‌و ڕه‌نگاڵییه‌ زه‌نگیانانه‌ هه‌رزه‌ییانه‌ی ناخمان ده‌كه‌ین و كه‌فوكوڵی ئیشقمان به‌ سه‌ر ئاو ده‌بارێنین وه‌ك به‌له‌مێكی بچوك بچوك به‌ ده‌ریایه‌كی قوڵ و مه‌نگدا ڕێ ده‌بڕین به‌ دار به‌له‌مێكه‌وه‌ له‌ زه‌ریایه‌ك ده‌ده‌ین و له‌ زنه‌یه‌كی كوێستانانی وڵات ده‌نیشینه‌وه‌، كزه‌ بایه‌ك به‌ روومه‌تی كارمامزیته‌وه‌ ده‌لكێن ، وای به‌ حاڵی ئه‌وانه‌ی ڕێگری له‌ سه‌رشێتی و مه‌ست بوونی ئه‌و دڵانه‌ ده‌كه‌ن، دواتر هه‌ر بۆ خۆیان گڕ ده‌گرن و ده‌سوتێن، ژه‌زانم له‌ ناخه‌وه‌ هه‌ڵپه‌ڕكێت دابه‌ستووه‌، گوڵه‌كه‌م له‌ گوڵ گوڵتر .

3 / 5


52 – سه‌به‌ته‌یه‌ك هه‌نجیر به‌یانیت شیرین و جوان بكا، قردێله‌ی تاریكی بقرتێنێ و له‌ ئاسۆوه‌ خۆر سه‌ره‌تاتكێی خۆی بكاته‌وه‌، گوێسه‌بارانه‌ به‌ شه‌سته‌بارانی ئیشقه‌وه‌ ته‌ڕ بكا و ئاپۆڕای ده‌سله‌ملانێ بخولقێنێ، پێڵوی چاوه‌كان له‌ ده‌ریای ئیشقه‌وه‌ هه‌ڵبێن و شه‌پۆلی به‌تاو له‌ ناخمانا لرفه‌ی بێ و بازبازێنی سه‌ره‌ رَێی كانیمان بێ، مه‌گه‌ر من و تۆ وه‌ك ماسی و ئاو نه‌بین ئه‌وه‌ نییه‌ بێ یه‌ك هه‌ڵناكه‌ین، خه‌رمانمان گڕ ده‌گرێ و ژین ڕێن نوێبوونه‌وه‌مان ون ده‌كا به‌یانمان ده‌بێته‌ دوێنێی یاساغی خۆشه‌ویستی، حه‌رفه‌كانی ئۆقره‌ بوون وێڵ ده‌بن و له‌ سۆراغیان شێتێكی سه‌یر و سه‌مه‌ره‌ین، ئه‌و ده‌مانه‌ ئێمه‌یش مرۆڤگه‌لێكی ونین و به‌ خۆ نازانین، ته‌نها مه‌یلی لێو جووت بوونێ سبه‌ینان ده‌كاته‌ ڕێ نیشانده‌ری دۆزینه‌وه‌ی خودی ون و دێنه‌وه‌ مه‌نزڵ، خرمژنی گڤه‌ی با ڕامان ده‌ته‌كێنێ، هه‌وره‌ بروسكه‌ ئۆخه‌ییمان پێ ده‌دا، ناتوانێ نه‌ بمان سوتێنێ نه‌ له‌قمان بكا، ته‌نها ئاوبارانی ته‌ڕمان ده‌كاته‌وه‌ بۆ ڕێی ئیشق، ئه‌وه‌یش ده‌كه‌ینه‌ دیاری بولێڵێكی گزنگی وڵات و خه‌ره‌ند ده‌تارێنین، ئه‌رێ ئه‌وه‌ گوڵه‌ فێر بووه‌ له‌ باخچه‌ بپشكوێ و چه‌كه‌ره‌ بكا تا ناخی لێڵ بوو پاك بكاته‌وه‌، تۆ له‌ دڵی منا چرۆ ده‌كه‌ی و دڵم ئینجانه‌ی لك و پۆپ و ڕه‌نگه‌كانته‌ له‌ گوڵ گوڵتر.. 6 / 5


53 – ئه‌م به‌یانییه‌ وه‌ره‌ نێو چاوه‌كانمه‌وه‌ با پێڵوه‌كانم به‌ ئارامی لێك بنێم و ببنه‌ گاردی بۆی خوماربوونی جوانیه‌كانی سپێده‌ت، وه‌ره‌ نێو هه‌ناسه‌مه‌وه‌ با تومتومانی گزنگ له‌ منت ون نه‌كا، له‌ نێو هزرمدا بنوو با گێژه‌ڵوكه‌ی بیابان ئه‌نفالت نه‌كا، ئه‌وان فێره‌ كاری قێزه‌ونن نه‌با به‌ره‌و نوگره‌سه‌لمانی نامۆبوون ڕاپێچت بكه‌ن، ئه‌م به‌یانییه‌ له‌ ته‌ك ته‌لیسمی سیحراوی بێ هاوتایی جوانیتا له‌ خه‌ڵوه‌تی دڵما بێ باكانمه‌ ده‌فه‌ ده‌روێشیه‌كه‌ی ته‌ریقه‌تو زیكری خه‌ونه‌كانت لێبده‌ ، ئه‌رێ …..! ئه‌و پیاوه‌م دڵ و بیرت زۆر ده‌مێكه‌ ختوكه‌ی ته‌مه‌نی بۆ لێ ده‌دا، له‌ ژێر ده‌واری ڕه‌وه‌ندیما بسه‌كنێ با هه‌میشه‌ گه‌رمێن و كوێستانان پێكه‌وه‌ بكه‌ین، له‌ زنه‌ی هه‌نگوینی ئیشقا بتوێینه‌وه‌، به‌ گیان به‌خشینم قایل بی له‌ به‌ر تۆزی پێدا خوێنم لێ ده‌چۆڕێ له‌ بن پێیه‌كانتا ده‌بمه‌ مه‌خسه‌ره‌ی ئیشقت ، تۆ گوڵێكی له‌ هیچ باخچه‌یه‌ك وێنام نه‌بینیوه‌، تۆ هه‌ر تۆی ……7 / 5


54 – نازانم خه‌ونه‌ یا خه‌یاڵه‌ ئه‌م به‌یانییه‌ لێم بۆته‌ مۆته‌كه‌ و ده‌سرازه‌ی هۆگربوونم به‌ سات و یاده‌وه‌رییه‌كانمان شه‌ته‌ك ده‌دا، كه‌چی وا ساباتی ئه‌ندێشه‌م له‌ سه‌فه‌رێكی خۆڵه‌مێشی ئاڵاوه‌و جگه‌ له‌ تۆی كه‌سی دیكه‌ی هاوڕێگا نه‌كردووه‌، ته‌ونه‌كانه‌ جاڵجاڵۆكه‌ییه‌كانی ئه‌وین له‌ گه‌ردانه‌ی به‌رزی خه‌یاڵما گرێ داوه‌ و ئیدی خه‌ونم به‌ خه‌ونه‌وه‌ گرێ ده‌ده‌م و ساباتیش فێنكترین به‌یانی خۆی له‌ سینگ و به‌رۆكی ژنێتی تۆ ده‌نێ، گوڵه‌ قه‌وزه‌ییه‌كان بڵقن به‌ لقی گێلاسه‌وه‌ ئاڵاون و ئه‌م سه‌رچۆپییه‌م لێ ده‌گرێت و هه‌ڵپه‌ڕكێی كۆته‌ڵم بۆ داده‌به‌ستێ، له‌م نیشتیمانه‌ی ناخما ته‌نها گاڵته‌جاڕی ڕشبه‌ڵه‌كی گرتووه‌ و كه‌یفسازی له‌ غیابدایه‌، خه‌زانێك به‌ سه‌ر ڕه‌گی مه‌یلم داوتراوه‌، به‌ دووی سه‌رفیرازیا عه‌وداڵه‌، ئه‌و ڕۆژه‌ ده‌بێ كه‌ی بێت به‌ سه‌ر ئه‌و ده‌ریای نێوانمانا ده‌ست بگرین و قوله‌ پێیه‌كانیشمان به‌ ئاسته‌م ته‌ڕ بن ، ببینه‌ ئه‌و ماسییه‌ باڵداره‌ی سه‌ر ده‌ریا و ئه‌وینداران ئیره‌ییمان پێ ببه‌ن، ترس و له‌رز و خۆ شاردنه‌وه‌ بڕه‌وێنه‌وه‌، به‌یانیان به‌ مۆزیكێ دڵت بیخوازێ وه‌ئاگات بێنمه‌وه‌ ، ئه‌م دوورییه‌ ورد و خاش كه‌ین گوڵه‌كه‌م له‌ گوڵ گوڵتر … 8 / 5


55 – ئه‌م به‌یانیه‌ به‌ هه‌ڵدانه‌وه‌ی په‌ڕه‌ به‌ په‌ڕه‌ی سه‌ر دڵته‌وه‌ سه‌رقاڵم و تۆیش شیلاوی شه‌ككه‌رباری هه‌ناری لێوت به‌ سه‌ر لێوه‌ شه‌قار شه‌قار بووه‌كانما ده‌ڕژێنی، دێم و چاو ده‌بڕمه‌ سۆما و نیگا شه‌رمنه‌كانی بێ جووڵه‌یی و هه‌ست شۆك بووت كه‌چی چاوه‌ هه‌نگوینییه‌كانت ئاگرن و له‌ هیشك هه‌ڵاتن و تینوێتیم ده‌ئاڵێن، ئه‌مه‌ چ شنه‌بایه‌كی ئیشقه‌ له‌ بن په‌نجه‌كانته‌وه‌ ده‌ڕێسرێم و ده‌بمه‌ به‌ن بۆ به‌رماڵی بن پێیه‌كانت تۆیش نوێژی ئیشقتم له‌ سه‌ر داده‌به‌ستی ، به‌ ریتم و ئاوازی باران سروودی ماچ ده‌ڵێینه‌وه‌، مارشێكی نیشتیمانی خۆشه‌ویستیم به‌ ده‌م هه‌ناسه‌ و له‌ره‌ی ده‌نگه‌ به‌ سۆزه‌كه‌ی مه‌یلته‌وه‌ بۆ ده‌چڕی، بیر له‌ بالكۆنی پێكه‌وه‌ییمان ده‌كه‌مه‌وه‌ له‌ دوا سه‌فه‌ری ماندوو بوونما غیابی بوو, چه‌ند جوان بووی به‌ مناڵییه‌وه‌ له‌ هۆڵ و ناندینه‌كه‌ ده‌مبینیته‌وه‌، ئااای هه‌ستت پێ نه‌ده‌كردم چاوه‌كانم پڕ پڕ ده‌بوون له‌ تۆ و گریان ، ئه‌رێ ئه‌وی رۆژێ و ئه‌و به‌یانه‌ گه‌نم ڕه‌نگیم بوونه‌ سوار چاكه‌كه‌ت و باغی له‌ش سه‌ر مه‌ستێكی بێ په‌رده‌ بووبه‌ ده‌ورتا ده‌توایه‌وه‌، ئه‌وی ڕۆژێ شه‌رابێكی سبه‌ینانمان نۆشكرد و به‌ نێو یه‌كا غلۆر بووینه‌وه‌ توامه‌وه‌ هه‌ر ئه‌و سپێده‌ منیش وه‌ك تۆ له‌ گوڵ گوڵتر بووم بۆ تۆ ….. 10 / 5


56 – ئه‌م به‌یانییه‌ تۆ پڕ خۆشی و منیش لێوڕێژی بیركردنت، ئه‌م به‌یانییه‌ بیری ئه‌و دیمه‌نه‌ جوان و سه‌رنج ڕاكێشه‌ی ئه‌و چڕه‌ دووكه‌ڵه‌ ده‌كه‌م، به‌ره‌و ڕووخسارت هه‌ڵده‌كشێ و كوڵم و نیگای چاوه‌كانت له‌ ژێره‌وه‌ ته‌لیسمێكی سیحراوین خوێنم ده‌بزوێنن، نوقم بوونت له‌ نێو قاگی دووكه‌ڵدا بێهۆشبوونی روحم ده‌خولقێنێ، بیری ئه‌و په‌نجه‌ ناسكانه‌ت ده‌كه‌مه‌وه‌ نه‌رم نه‌رم ته‌رمی جگه‌ره‌ی له‌ ئامێزی خۆی ده‌نێ و هێدی هێدی به‌ره‌و به‌ره‌و گه‌ردن و له‌بی ناسكت هه‌ڵده‌كشێ، لێوه‌كانت وه‌ك ئه‌وه‌ی لێوه‌كانم بكرووژێنێ به‌ حه‌سره‌ته‌وه‌ له‌ نێو ڕه‌نگ هه‌ناری لێوتا ده‌گیرسێنه‌وه‌ و مژ له‌ فلته‌ری جگه‌ره‌كه‌ ده‌ده‌ی و قه‌ف قه‌ف دووكه‌ڵ ده‌بێته‌ رووحی من و به‌ سه‌ر هه‌ستی پڕ چێژتا ده‌توێمه‌وه‌، ئیدی لێو و چاو و كوڵم و ته‌واوی سیمات له‌ ژێر فڵچه‌ی ئه‌و نیگاركێشه‌ی دووكه‌ڵ تابلۆیه‌ك ده‌ڕه‌نگێنن هێشتان هیچ نیگاركێشێ وه‌ك خۆی ته‌وزیفی نه‌كردووه‌، له‌ تۆوه‌ فێری بۆنكردنی دووكه‌ڵ بووم، له‌م دونیای دوور مه‌وداییه‌ماندا بیری هه‌ناسه‌ی پڕ گڕی دووكه‌ڵیت ده‌كه‌م، تا مێشكم زاخاو بدرێته‌وه‌ بۆن و چێژه‌ ڕه‌نگاوڕه‌نگه‌كانت هه‌رگیز لێیان تێر نابم .. 11 / 5


57 – به‌یانییه‌ و به‌ پاكی و به‌رائه‌ت و ده‌ستنوێژی ئیشقوه‌ به‌رده‌رگای ماڵت لێ ده‌گرم، من هه‌ڵاتووی شارێكم نوقمی دۆڕان و تۆران و درۆ و فانتازیا و خۆ هه‌ڵكێشانم، سه‌ر لێشێواوێكی نێو فشقیاتی شار بووم، پێكه‌نینه‌كانم درۆ بوون، هه‌نگاوه‌كانم پڕ بوون له‌ ساخته‌، سڵاو و مه‌رحه‌باكانم چوو بووه‌ خولیای ئه‌وانه‌وه‌له‌ نوگره‌ قووڵ و دووره‌كان ده‌چوو، چاوه‌كانم سۆزانی بوون، خه‌تای خۆم نه‌بوو به‌ خه‌تایانه‌وه‌ ده‌لكانم، من ڕۆژ دره‌خته‌كانی ژیانم ئاو نه‌داوه‌ شه‌ویش گۆڕه‌كانی سه‌یوان هه‌ڵبده‌مه‌وه‌، فێر نه‌بووم وه‌ك دراو دوو ڕوو بم هه‌مان نرخیشم هه‌بێ، ژرۆ بكه‌م و سوێندیشم به‌ درۆ بڵێمه‌وه‌و ته‌نها په‌رستگایشم بن، ژینێك له‌ ته‌نگیدا گوزه‌ری كرد و له‌ شارێكا بچوك بۆوه‌، له‌ زێی بچوك پلكژبوومه‌وه‌ و له‌ هه‌یبه‌سوڵتانێ غلۆر بوومه‌وه‌ بۆ پایته‌ختی سه‌هۆڵبه‌ندان، كچێ دوژه‌م به‌ نیگاكانت تێر تێری ڕۆشنایی سبه‌ینانم بكه‌، لێم مه‌گره‌ كه‌ زۆرم خۆشده‌وێی و هه‌ڵزناوه‌ بۆ باڵا بوون تا به‌ ئیشق ڕا گه‌یشت، گوڵه‌كه‌م له‌ گوڵ گوڵتر …… 13 / 5


58 – ئه‌م به‌یانییه‌ جوان جوانه‌ له‌ تۆ ده‌چێن ڕوون ڕوون وه‌ك نیگای چاوه‌كانت ده‌تریفێنێ، ئاونگی سه‌ر په‌ڕه‌ گوڵ له‌ پرچه‌ ته‌ڕه‌كه‌ت ده‌چێ، ئه‌م سپێده‌ لاسایی تۆ ده‌كاته‌وه‌ گه‌ره‌كێتی وه‌ك ته‌نووره‌كه‌ت كورت كورت بێ و خه‌ڵكی تامه‌زرۆی مانه‌وه‌ی بكه‌ن، ئااای چه‌ندم خۆش ده‌وێی كه‌ سروشتیش لاساییت ده‌كاته‌وه‌ ، به‌ شه‌قامی چۆڵی ئه‌ندێشه‌ما ڕاده‌گوزه‌رێم تا له‌ خۆتم ئاڵێنی، له‌م سروشته‌ی ئه‌م به‌یانییه‌ شاعیرێكی بێ تۆ دڵشكاوم، ئاوازی به‌سته‌ی له‌نجه‌كانتم لێ ده‌چۆڕێ ، كه‌سێ لێم تێ ناگات و ناپرسێ كه‌سێ نازانێ حه‌سره‌ته‌كانی ناوه‌وه‌م بۆ بریقه‌دارن، بۆ خۆم ده‌زانم زبڵدانێكی دۆڕاوه‌، تۆیش نها له‌ شه‌خته‌به‌ندانی هاوینتا گڕم تێ به‌ر بده‌، ژڵم چه‌په‌ڵترین ئاشقی سینه‌ و به‌رۆكته‌، له‌ مزگه‌وتی دڵتدا ڕكاته‌كانم دابه‌ستووه‌و دڕنده‌ترین بانگده‌ری ئیشقم، بۆنی بارووتی ماچتم لێ دێ، قه‌وانی نیگاكانمان كۆ ده‌كه‌ینه‌وه‌، كچێ كاتێتی شه‌پۆلێكی بارانی به‌لێزمه‌م تێبگری تا وه‌ك تۆ بم …. 14 / 5


59 – لێوم به‌ لێوه‌ ئاڵه‌كانته‌وه‌ شین بۆته‌وه‌، هه‌ناسه‌م گوێ له‌ ئاه و هه‌سره‌ته‌كانی ماچت ده‌گرێ ، ئه‌م سپێده‌ نوقم و خه‌ڵتانی بیره‌وه‌ری گه‌ڕنه‌وه‌ی سه‌فه‌ره‌كه‌مم ئه‌ندیشه‌می قۆرخكردووه‌، شه‌كه‌ت و ماندووی نێو ستاسیۆنی سه‌نتڕاڵی پایته‌ختم، نازانم ماچه‌كانت ورد بكه‌مه‌وه‌ یا پرچه‌ ته‌ڕه‌كه‌ت به‌ نافوری ڕه‌نگاوڕه‌نگی شار، له‌ خه‌یاڵدانی ئه‌م سپێده‌م یاده‌وه‌رییه‌كانت ده‌بنه‌ حه‌رف و وشه‌ و ده‌یانخوێنمه‌وه‌، له‌ دیمه‌نی نێو بوزه‌كانا وێنه‌ سه‌رنج ڕاكێشه‌كانت ده‌بینم، له‌ ترامه‌كان بزاوته‌ سه‌ركێشییه‌كانت بزه‌م ده‌ده‌نێ، له‌ ترافیكه‌كانا هه‌ڵوێسته‌كانت سۆراغ ده‌كه‌م گورج و گۆڵییه‌كانت ده‌بنه‌ چرای ڕێم، له‌ شه‌وی ڕابردووی نێو خه‌یاڵم نیگاكانت ده‌بنه‌ هاوڕێم و شه‌قام شه‌قام و هوتێل هوتێل له‌ گه‌ڵمدا پیاسه‌ی كۆبنهاگن ده‌كه‌ن له‌ نێو له‌ره‌ی مۆبیله‌كه‌یشته‌وه‌ ده‌نكت كزه‌ی سه‌رمای دوای نیوه‌ شه‌و ده‌ڕه‌وێنێ و گه‌رم گه‌رم ده‌مدێنێ، له‌ گڵۆپه‌ بریسكه‌داره‌كانیشا ڕه‌نگ گوڵی تۆم ده‌بینی گوڵه‌كه‌م له‌ گوڵ گوڵتر….. 15 / 5 .

ئه‌لمانیا

Previous
Next

Leave a Reply