دەسەڵاتە مافیاگەرەکەی کوردستان تەنها سەرۆکی حزبە ئۆپۆزسیۆنەکان دەستگیردەکات … شوانە حسن ابوبکر
شاسوار عەبدولواحید، سەرۆکی جوڵانەوەی نەوەی نوێ ماوەی هەشت ڕۆژە لە زینداندایە، ئەمەش سێیەمین حاڵەتە لە زیاتر لە ١٣ ساڵی ڕابردوودا، کە ئەم دەسەڵاتە مافیاگەرە تەنها سەرۆکی حزبە ئۆپۆزسیۆنەکانی دەستگیرکردبێت.
لە ١٦ ئەم مانگەوە، شاسوار عەبدولواحید، سەرۆکی جوڵانەوەی نەوەی نوێ، بەپێی یاسای خراپ بەکارهێنانی ئامێرەکانی پەیوەندی و بە فەرمانی دادوەری ئاسایشی گشتی دەستگیرکراوە و تا ئێستا ئازاد نەکراوە.
لە دوای دروستبوونی دەسەڵاتی کوردییەوە لە هەرێمی کوردستان، وێڕای بوونی دەیان دۆسییەی گەندەڵی ئیداریی و سیاسیی و ئیهانە و تیرۆری ڕۆژنامەنوسان و بکوژی دەنگی ئازادیخوازان و بکوژی خۆپیشاندەران هیچ سکرتێرێکی حیزبی دەسەڵاتدار لێپرسینەوەی لێ نەکراوە، بەڵام دەستگیرکردنی شاسوار عەبدولواحید کە حزبەکەی هەشت کورسی لە پەرلەمانی هەرێم و چوار کورسی لە ئەنجومەنی نوێنەرانی عێراق هەیە، دەبێتە سێیەمین سەرۆکی حزب لە چەند ساڵی ڕابردوودا دەستگیرکرابێت، کە هەموو وەک ئۆپۆزسیۆن کاریان کردووە.
لە ١٤-٤-٢٠٠٦دا، د. فایەق گوڵپی، سەرۆکی ئەوکاتی پارتی چارەسەری دیموکراتی کوردستان، لەلایەن ئاسایشی سلێمانییەوە دەستگیرکرا و بۆ ماوەی ١٠ ڕۆژ لە زینداندا مایەوە و ئەشکەنجەی جەستەی و دەروونی درا هەروەها جارێکیتر و لە هەمان ساڵدا ناوبراو هەفتەیەکی دیکە لەلایەن ئاسایشی سلیمانییەوە دەستگیرکرایەوە، هەروەها شەوی ٢٩-٣-٢٠١٨، شیلان شاکر، هاوسەرۆکی گشتی تەڤگەری ئازادیی، لە شارۆچکەی زاخۆ لەلایەن ئاسایشی پارتییەوە دەستگیرکراو بۆ ماوەیەک لە زینداندا مایەوە.
دەستگیرکردنی شاسوار عەبدولواحید، دەبێتە سێیەمین سەرۆکی حیزبی ‘ئۆپۆزسیۆن’ لەلایەن دەسەڵاتدارانی حکومەتی هەرێمی کوردستانەوە دەستگیکرابێت.
بەگوێرەی هەموو ئەو بەڵگانە ئەو ڕاستیە دەردەکەوێت کە هەرێمی کوردستان ناوچەیەکی خراپ و نەگونجاو و ناساقامگیرە بۆ هەموو ئەو کەسانەی خەون بە ئازادی و نەمانی حکومی مافیاگەری و بنەماڵەی دەبینن.
شوانە حسن ابوبکر
