خامۆشیی … سۆران محەمەد
Closed
هەموو جەنگەکانت دۆڕان
یەکیان: چونکە میهرەبان بووی
ئەوی دی:
گوێت لە گوتەی هزر دەگرت..
یان بەزمانی مەعریفە دەدوای
لەگەڵ شتێك ڕێز بۆ مرۆڤ…
یاخود بەرانبەرەکانت
نەفام، بێمۆراڵ، دڕندە… بوون
ئێستاکەش دوور…دوور
لە هەموو شتێ
لە هەموو ئاشنایەتییەك
زوویر.. زوویر
لە هەموو شتێ
لە هەموو ئاشنایەك..
کەسێ نازانێ وا ئەم مرۆڤە
کام ئەزموونەیە نامۆی کردووە؟
کاتێ رۆژگاریش درێژتر دەبێ
هەر بە خۆت دەڵێی:
رەنگە هیوایەك
تەواو بمناسێ و ڕێ هەڵە نەکا
بەرەو ماڵی دڵ
بەلام زوو رۆژگار پەیمان دەشکێنێ و
لە کورتی دەدا
دەڵێی: ئەمجارە
شەوی درێژی زستانی تەمەن
دوور لە مۆتەکەی خەونە رەشەکان
بەرەو فەنابوون ملی ڕێ بگرێ
یەکەم نێرگزی بەهار ماچ دەکەم
کەچی ئەو هەر زوو
سیس هەڵدەگەڕێ
ئاخر کەی بەرگەی
تاو*ی شۆڕشی هەقیقەت دەگرێ؟
………………..
*تاو: هەتاو، تاڤ
