Skip to Content

كه‌ركوك وداگیركردنی خاكی كوردستان …  ئه‌حمه‌د ره‌جه‌ب

كه‌ركوك وداگیركردنی خاكی كوردستان … ئه‌حمه‌د ره‌جه‌ب

Closed
by ئایار 30, 2019 General



دوێنی 28/5/2019 شانۆگه‌رییه‌كه‌ی په‌رله‌مانی كوردستان كۆتییپێهات و نێچیرڤان بارزانی بوو به‌ سه‌رۆكی هه‌رێم و ئه‌و چوار كاندیده‌كه‌ی تر هیچ ده‌نگیان نه‌هێناو ئه‌وه‌ش جێی پێكه‌نینه‌و سه‌رسورمانه‌و له‌ هه‌مان كاتیشدا جێی نێگه‌رانییه‌ و هه‌ر به‌وه‌ش ئه‌زانرێت كاره‌كه‌ی په‌رله‌مان گاڵته‌جارییه‌كی بێوێنه‌یه‌ و، له‌ مێژووداو له‌ سه‌رانسه‌ری دونیا قه‌ت رووی نه‌داوه‌ له‌ هه‌ڵبژاردنی به‌رله‌مان چوار كاندید خۆیان به‌پاڵێون بۆ سه‌رۆكی هه‌ریم یان سه‌رۆكی وڵات ته‌نها یه‌ك ده‌نگ به‌ده‌ستنهێنن و، لێره‌دا پێویسته‌ په‌رله‌مانتاران به‌بێ ترس ده‌نگ هه‌ڵبرن و، وه‌ڵامی خه‌ڵك بده‌نه‌وه‌..


باسی كه‌ركوك یان راستر شه‌ری كه‌ركوك گه‌رمه‌ و، ره‌فتاره‌كانی پارتی دیموكراتی كوردستان و یه‌كێتی نیشتمانی كوردستان دۆخی شاره‌كه‌ كه‌ خوێ له‌ بنه‌ره‌تدا ئاڵۆزه‌، ئاڵۆزتر ئه‌كه‌ن و، به‌ چاوی بێرێزی سه‌یری یه‌كتر ئه‌كه‌ن و، هیچ نرخێك بۆ گه‌ل و نیشتمان دانانێن و، ئاره‌زوومه‌ندانه‌ قه‌یرانه‌ كه‌ڵه‌كه‌ كراوه‌كان قوڵتر ئه‌كه‌نه‌وه‌..
هه‌ر دوێنی له‌ كاتێكدا په‌رله‌مانی كوردستان خه‌رێكی “” هه‌ڵپژاردن”” بوو، چه‌نده‌رمه‌و سوپای توركیای ره‌گه‌زپه‌رست، به‌ هه‌موو جۆره‌ چه‌كێكی مۆدێرن‌ هێرشێكی به‌رفراوانی بۆ سه‌ر گونده‌كانی كوردستان له‌ خواكورك و برادۆست و ناوچه‌كانی تر ده‌ستپێكردو، له‌ چه‌ندان ناوچه‌ چێگیربوون و، هێرشه‌كه‌ی عوسمانلییه‌كان به‌ پانتایی 50 كیلۆمه‌ترو قوڵایی 35 كیلۆمه‌تره.


ماوه‌ی هه‌شت مانگه‌ پارتی و یه‌كێتی گاڵته‌ به‌ هه‌ستی هاوڵاتیانی كوردستان به‌ گشتی وخه‌ڵكی كه‌ركوك به‌تایبه‌تی ئه‌كه‌ن و، جاروبار قسه‌ی زبرو ناشیرین ئاراسته‌ی یه‌كتر ئه‌كه‌ن و، هاوكات باسی یه‌كریزی و نه‌مانی قه‌یران و ئاینده‌یه‌كی گه‌ش بۆ كوردستان ئه‌كه‌ن و، تا ئێستا ناتوانن پارێزگارێك بۆ كه‌ركوك دیاری بكه‌ن و، له‌م دووایه‌دا گه‌مه‌كه‌یان گرژی و ئاڵۆزی تێكه‌وت و، یه‌كێتی ده‌نگی به‌ نێچیرڤان بارزانی نه‌داو، زه‌نگی مه‌ترسیشی لێداو، یه‌‌كێتییه‌كان ئه‌ڵێن ئه‌گه‌ر پارتی به‌ شێوه‌ی لوتبه‌رزی و بێمنه‌تی ره‌فتار بكات به‌شداری حكومه‌تی كابینه‌ نۆێ مه‌سرور بارزانی ناكه‌ن.


پارتی و یه‌كێتی بۆ دانانی پارێزگارێك بۆ كه‌ركوك رێككه‌وتنامه‌یان واژوو كردو به‌ڵام ئێستا پارتی ره‌تی ئه‌كاته‌وه‌ كه‌ له‌ گه‌ڵ یه‌كێتی رێككه‌وتنیان هه‌بێت و، له‌ سه‌ر زاری ئه‌ندامێكی سه‌ركردایه‌تی پارتی ئه‌ڵێن: پارێزگاری كه‌ركوك ئه‌بێت كه‌سایه‌تییه‌كی نیشتمانپه‌روه‌ری كوردی شاری كه‌ركوك بێت ، نه‌ پارتی بێت و نه ‌یه‌كێتی، تا كار بۆ هه‌موو كه‌ركوكیه‌كان بكات نه‌ك لایه‌نێكی سیاسی دیاریكراو، راشیگەیاند، پێشتر لەنێوان بەرپرسانی پارتی‌و یەكێتی گفتوگۆ لەبارەی پۆستی پارێزگاری كەركوك كراوەو بڕیارە گفتوگۆكانیش بۆ رێككەوتنی كۆتایی بەردەوام بێت.


توركیا نیوه‌ی خاكی باشووری كوردستانی داگێر كردوه‌و، به‌ هێرشه‌كه‌ی دوێنی شوێنی تریشی كه‌نترۆڵ كردو، توركیا وه‌ك خاوه‌ن ماڵ ره‌فتار ئه‌كات و، له‌ كوردستان بێ له‌ توركه‌ تورانییه‌كان، كه‌سی تریان هه‌یه‌ به‌تایبه‌ت له‌ ناو به‌رپرسه‌ باڵاكان ‌و، له‌ باتی ئه‌وه‌ی پارتی ویه‌كێتی چاره‌سه‌ری كێشه‌كانیان بكه‌ن و، پارێزگارێك بۆ كه‌ركوك بدۆزنه‌وه‌و یه‌كبگرن داوا بكه‌ن هێزو سوپاو جه‌نده‌رمه‌ی توركیا بچێته‌ ده‌ره‌وه‌و، خاكی كوردستان ئازاد بێت، به‌ پێچه‌وانه‌وه‌ ئه‌چن به‌ گژی یه‌كترو، دڵه‌راوكی بۆ خه‌ڵك دروست ئه‌كه‌ن.


دۆخی شاری كه‌ركوك مه‌ترسیداره‌و، عه‌ره‌ب و تورك یه‌كئه‌گرنه‌وه‌ بۆ دژایتیكردنی كوردو، راكان چبوری پارێزگاری كه‌ركوك به‌ وكاله‌ت ئه‌ڵێت كه‌ركوك شارێكی عه‌ره‌بییه‌و، ناهێڵین جوداخوازان بۆ خۆیان دایبرن و، ماوه‌یه‌ك له‌مه‌وپێش مه‌ولود ئۆغلو وه‌زیری ده‌ره‌وه‌ی توركیا سه‌ردانی رێكخراوه‌كانی توركانی كردو، بێشه‌رمانه‌ ڕایگه‌یاند، كه‌ركوك شارێكی توركمانییه‌‌و، به‌رپرسانی كوردستان له‌ پاش كاره‌ساته‌كه‌ی 16 ی ئوكتۆبه‌ری ساڵی 2017 و، له‌ پاش ‌ هه‌ڵاتنی پارێزگار نه‌جمه‌دین كه‌ریم تا ئێستا شه‌ریان له‌ سه‌ر ئه‌وه‌یه‌ كێ ئه‌بێته‌ پارێزگارو، له‌ ناو خۆیاندا ته‌با نین و، پاشقول له‌ یه‌كتر ئه‌گرن و، باری خه‌ڵگیان قورس كردووه‌و رۆژانه‌ رووبه‌رووی حه‌شدی شه‌عبی و سوپای عێراق ئه‌بنه‌وه‌. .


هه‌لی زۆرو زێرین بۆ گه‌لی كوردستان له‌ كه‌ركوك و، سه‌رجه‌م ناوچه‌ دابراوه‌كان ره‌خساو، به‌رپرس و سه‌رانی كورد له‌ به‌ر دزی و گیرفان پركردن و گه‌نده‌ڵی و به‌رژه‌وه‌ندی تابه‌تی نه‌یانتوانی ئه‌و هه‌له‌ زێرینانه‌ بقۆزنه‌وه‌و، خۆیان به‌سته‌وه‌ به‌ ماده‌ی (140) و، ده‌ستوری عێراقی و، ، هیچیان بۆ نه‌كراو له‌مرۆشدا ئیفلیج و دۆش داماون و، له‌ جیاتی ده‌ستكه‌وت ئه‌بێ مێشكوژ هه‌ڵگرن و، مێش قاو بده‌ن.


ئه‌گه‌ر پارتی ویه‌كێتی دوور بكه‌ونه‌وه‌ له‌ به‌رژه‌وندی حزبایه‌تی و پۆست و پله‌و پایه‌و، فشار بخه‌نه‌ سه‌ر حكومه‌تی عێراق بۆ جێبه‌جێكردنی ده‌ستوری عێراق و، داوا بكه‌ن به‌پێی ماده‌ی (140) ی ده‌ستوری ناوبراو، هه‌نگاو بنێن بۆ چاره‌سه‌ری كێشه‌كان، ئه‌توانن كه‌سێكی نیشمانپه‌روه‌ر بۆ پارێزگاری كه‌ركوك ده‌ستنیشان بكه‌ن.


29/5/2019.

.

Previous
Next
Kurdish