Skip to Content

60 Views

مەملەکەتێکی شەکەت و هەوارێکی لێل …  ئارام ئازاد

مەملەکەتێکی شەکەت و هەوارێکی لێل … ئارام ئازاد

Be First!
by July 2, 2019 General, Opinion
image_print

حوکم کردن بە پێی ئایدۆلۆژیایەکی دیاری کراو خراپترین جۆری گوزەران بۆ خەلک فەراهەم دەکا, ئەوەش دەگۆڕێ بە پێی کارامەیی و لێهاتویی ئەوەی دەبێتە حاکم، بۆیە پێویستە بنەما و پرەنسیپە رامیاریەکان بەو ئاراستەیە بن کە خەڵک رازی بێ نەک رازی کردنی ئایدۆلۆژیایەکی دیاری کراو.


هەمیشە خەمی خەڵک ئەولوەیەتی کارکردنی هەر سیستەمێک یا هەر ئایدۆلۆژیایەکی دەسەڵاتدارە لەو روانگەیەوە دەکرێ وردبینی لۆژیکانە و بنیادنەرانە بکەینە نزیکترین خاڵی بە یەکگەیشتنی بزوتنەوەی خەڵک و دەسەڵاتی ئایدۆلۆژیادار وەلێ لە پای خراپی هەریەک لەو سیستەمانەش ئیش کردن بە هەر یەکێکیان باشترە لەوەی سامانی وڵات فەرهود بکرێ بێ ساغبوونەوە بەسەر سیستەمێکدا، ئایا دەکرێ دەسەڵاتێک وەک دەسەڵاتی دەوڵەتانی رۆژهەڵاتی ناوەڕاست هیچ سیستەمێک و ئایدۆلۆژیایەک (دەوڵەتانی پەیڕەوی یەک فکر و ئایدۆلۆژیا لە رۆژهەڵاتی ناوەڕاست لە پەنجەی دەست ئەولاتر نیە)کارتێکەری نەبێ و مەجالی هیچ جۆرە ڕەخنە و پێشنیارێک نەهێلنەوە بۆ چینێک لە رەخنەگران لەسەر ئەدای کارکردن و بەرەو پێش بردنی دەوڵەت لە ڕووی ئیداری و تەندروستی و کۆمەلایەتیەوە ئەوە لایەنە سیاسەکەشی لەلایەکی تر جێبهێلە چونکە هێڵی سورە و بە چاک و بە خراپ بۆ کەس نیە بۆچونیشی دەربارەی هەبێ ، هیچ ڕێی تێ ناچێ کە بێیت و رەخنە لە هیچ بگریت ئەوەش لەبەر ئەوە نا کە هیچ روی نەداوە و بابەتێک نییە بۆ ڕەخنەگرتن بەڵکو بەهۆی ئەوەی بابەتی ڕەخنەکە بێ مۆرالە و هیچ هیوایەک لە ڕەخنەگرتن نابینرێ.


شتگەلێکی زۆرمان بیست و کەممان دیت ئەوەی لەم هەوارەش دەگوزەرێ وەک هەبوو و نەبووی دەستپێکی حکایەتەکانی منداڵیە لە قسەکردندا هەبووە و لە عەمەلدا نەبووە ، لە عەمەلیشدا بنیادنانی دیموکراتیەت لەسەر ئەساسی فێڵ و چەواشەکردن ئەزمون لەناو دەبا، تەنها لەو پێناوەی ناوی بنەماڵەیەک یا ئاغایەک یا شێخێک لە حوکم دا بمێنێتەوە ئەوە ناگەیەنێ بێن بەو دیوە جوانەی ئەمرۆ دیموکراتیەتی تێدا بەرجەستە دەکرێ لە دنیادا پیشانی کۆمەڵانی خەڵک بدرێ و کۆمەڵێک هیوا لە دڵیان دا بچێنرێ و تا بەرەنگاری دواهەمین ڕۆژیان دەبنەوە بەو هیوایەوە بژین ، لە میسر کاتێک شۆرش دژی سیستەمی پاشایەتی لەسەر دەستی (محمد نەجیب) و (جەمال عبدالناسر) دەستی پێکرد دروشمێکی دانایانەیان پەیڕەو کرد کە زۆر ئامانجیان پێی پێکا (الدين لله و الوطن للجميع) باوەڕداری بۆ خودا و نیشتیمان بۆ هەموان بەپێی ئەو دروشمە هەموو کەسێک دەیتوانی ببێتە سەرۆک نەک تەنها نوخبەیەکی پیاوانی ئایینی و لە هەمان کاتدا سیمای سەرۆک تا ڕاگەیاندنی ئەنجامی هەڵبژاردن یا جوڵانەوەیەکی کۆدەتایی تر دیار نەبوو کێشەی ئەمڕۆ ئەوەیە سیستەمی بەرێوەبردن نە شۆرشگێڕیە چونکە شۆڕش دەمێکە کۆتایی هاتووە و نە لە بەرژەوەندی چینی کرێکارە و نە سەرمایەداریەکی بنیادنەرانە و بزنسە ، بەڵکو تێکەڵەیەکە کە پێم وایە ئەو کەسەی حوکمیش دەکا خودی خۆی لێی تێنەگا ئەوە لەلایەک و سەرۆکی بیست ساڵی داهاتووش کە وەک ڕوونی و ئاشکرا دیاربوونی خۆر لە ئاسمان دیارە کە لە کێ و کێ تێپەڕ ناکا.


دەتوانرێ لەو قالبەدا وێنای ئەو حەقیقەتە بکەین کە تۆ گرنگیت تا ئەو کاتەی داوای مافی گرنگ بوونی خۆت دەکەیت ئیتر گرنگ نامێنیت و نابیت هەر لەم دیوەدا هەندێک چین و کەس و بابەت گوزارشت لە هەموو شتێک دەکەن و لە هەمان کاتدا گوزارشت لە هیچیش دەکەن بۆ نمونە ژینگەپارێزێکی وڵات ، ئەوەی کە ئەم و ئەو پیسی دەکەن ئەو پاکی دەکاتەوە لە هەمان کاتدا کە هاتە سەر مەسەلەی ئیستیحقاقاتی ماددی لە دواوەی دواوەیە و سفرێکی سادەیە.


دەبێ مرۆڤ ئیمکانیەتی هەبێ کە بلێ (نا) ، ئەوان وشەی نا یان لا گرانە و گەر بە دەستیان بوایە هەر بە جارێک دەیانسریەوە چونکە ئەو وشەیە ئەوپەڕی کڕۆکی ناڕەزایەتی نیشان دەدا ،ئەوە وەک ژیانی ژەنیارێک دێتە پێش چاو کە ژەنینەکەی لەگەڵ هەموو ئەو ئازار و نەهامەتیانە یەکدەگرنەوە کە لە ژیانی دا چەشتویەتی و ویستویەتی بە ژەنین حەقی ئازار و ناخۆشیەکان بکاتەوە و دەتوانرێ بە ئاسانی هەست بە رووداوەکانی ژیانی ئەو کەسە بکرێ لە ڕێگەی ژەنینەکەی لە هەمان کاتدا ئەو ژەنینە پەیامێکی زۆر سادەتری ژەنیار دەگەیەنێ ئەویش ئەوەیە کە منیش ئینسانم و ڕاو بۆچونم هەیە و ژمارەم لەم مەملەکەتە بۆیە قبوڵی ناکا کە کەسێک بێ و هەوڵی دەست بەسەرداگرتنی ئامێری ژەنینەکەی بدا چونکە تاکە ڕێگەیە بۆ گەیاندنی پەیامە سادەکانی بە بەرامبەر.


کاربەدەستی ژیری گەندەڵ ترسناکترینە چونکە هەمیشە نوقسانی لە شتێکی پێرفێکت دەهێڵێتەوە و بە بۆشایی نەگونجاو پڕی دەکاتەوە کە ئەو بۆشاییە کەسێکی بێ ئاگا و لاوازە بۆ ئەوەی کار لەسەر ئەم بەشە نوقسانە بکا و دەنگ و سەدای رەخنەگرانی بەشە نوقسانەکەش بەدەست بهێنێ و لە بەرژەوەندی خۆی یەکلای بکاتەوە ، ئەمە بەشێکە لە فەلسەفەی ژیری کە بەهرەیە و پێویستی بە مێشکی کارامە هەیە ، وەرن سەیری دەوروبەر بکەین بزانین لە واقعی ئەمرۆ ئەمە بەرجەستەیە یا نا؟ رۆژانە ناوی کەسانێک دەبیستین کە بونەتە دەمڕاستی خەڵکی ناڕازی لە هەمان کاتدا کەمێ دوورتر سەیری ڕابردووی بکە بۆت دەردەکەوێ ئەوەی لەبیر و هزری دا نەبووە خەڵک و موعاناتی خەڵک بووە ، بۆیە پێویستە هەموو تاکێک پرسیاری ئەوەی لەلا گەڵالە ببێت کە بۆچی فلان کەس لەو فەترە زەمەنیە کورتەدا بووە بە مشورخۆری گەل ؟ دونیا لە دەقەیەک دا ئاوەژوو نابێتەوە بەڵام بیروڕای فیسار کەس لە دەقەیەکدا ئاوەژوو بویەوە بۆچی؟ دەکرێ وەڵامی ئەوانە و چەندان پرسیاری تر ئەم مەملەکەتە لە شەکەتی و ئەو ڵێڵی و قەیرانە فیکریەی تێی کەوتوە دەربهێنێ و بەرگێکی تازەی پڕ زانیاری بکاتە بەر.

Previous
Next

Leave a Reply