Skip to Content

سێ شیعر …. نەوزاد بەندی

سێ شیعر …. نەوزاد بەندی

Closed
by ته‌مموز 8, 2019 General, Poems

بیرت ئەکەم کە وەستاوم
بیرت ئەکەم کاتێ ئەڕۆم
بیرت ئەکەم کە برسیمە
بیرت ئەکەم کە نان ئەخۆم

لە یادمدای کە هوشیارم
لەیادمدای کاتێ خەوتووم
لەیادمدای کاتێ تووڕەم
کە لە هێمنیدا نوقوم بووم

بیرکردنت وەک هەناسە
ساتێ ڕاوەستێ ئەخنکێم
هەنگاوێ لێت دوورکەومەوە
هەزار هەنگاو بەرەو ڕووت دێم

خۆیشت بەو حاڵە ئەزانی
بۆیە جەلادیت لە گەڵما
هەتاکو گوڵێ ئەڕوێنی
سەد مین ئەچێنی لە دڵما.

——————————–

نەیشتبینم ،
تەنگەتاو نیم ..
شوێن پێیەکت ، وا بە هەر بستێکی
بوونمەوە ..
جێ پەنجەت،
هەناسەت ..
بۆنت.. وان بە هەر گۆشەیەکی
دەروونمەوە ..

نەیشتبینم ،
تەنگەتاو نیم ..
بینین لە کێشانی وێنەت ،
دەستەوسانە ..
ڕەنگە بڵێم کە ناتبینم ،
ئەو کاتە
ڕوخسارت جوانە ..

———————————–

باش..
ئیتر بە خەیاڵیش
داوای دوو قاوە ناکەم
ھەر یەک قاوە و
تەواو ..

باش ..
ئیتر بە خەویش
دوو بلیت نابڕم
ھەر یەک بلیت و
تەواو ..

باش ..
ئیتر بە سوعبەتیش
دوو نەفەر داوا ناکەم
ھەر یەک نەفەر و
تەواو ..

ئیتر
قبوڵ ناکەم
تەنانەت سێبەرەکەیشم
لەگەڵما بڕوا ..
ھەر خۆم و
تەواو ..

نە
و
ز
ا
د
بە ن د ی

Previous
Next
Kurdish