دەزووی ئەم ئازارە بە دەرزییەکانی زەمەندا ناچێ! … شوان شەفیق


بەدیار پیاڵەكانەوە دەگری
زاخ لەسەر کوڵمی جێناھێڵێ ئازار!
ئاو
تاقەتی پاکردنەوەی چڵکی نەماوە!
سوێراوی لێ دەچۆرێ ڕاستی!
تاڵە حەقیقەت!
تفتە بە گەروودا بچێتە خوار ڕاستگۆیی.

کووپەکان ئەوەندەیان تاڵی بەخشی
شیرین بوون!
پێکەکان ئەوەندە مەستیان بەخشی
ئالوودە بوون!
مێزەکان قڵپبوونەوە لە درۆ!
شەرم ناکەین تکاوە ئابڕوو؟

لە ژوورێکی شپرزەدا دیل!
ڕۆڵی ئەکتەرێک دەگێرێ
درامایەکی تراژیدییە!
سینارست لەکوێوە تەماشا دەکا؟
قاقاپێمان پێدەکەنێ
ژووانگەی عاشق!

پەلەیەتی دەجەنگێ
گلاراویەتی لە گشت جێ
ئاژەڵەکان دەکووژێ
زەوی خاپوور دەکا
نەگریسە مرۆڤ
لە کوێوە دەڕوا؟
لە کوێوە سەر دەر دەکا؟

درۆی کام لاپەرەی مێژوو بوو مرۆڤایەتی؟
نەفرەت لە ئادەمییەکان
یەک شێوەبوون،
چەندین ڕەنگبوون
ھەمە ڕووبوون!

ئازادی
وشەیەکی ئێکسپایارە،
مۆراڵ
تاوێک بارانی بەھارە،
سەوز نابێتەوە شادی
ناچۆرێتەوە سەربەستی!

ڕەفەکان دێنەگۆ:
نووسراوەکان
درۆبوون لەگەڵ تیانووس!
گێلبوون ڕەنگەکان!
پێنووسەکان دەڕشانەوە
پەتایەکی قورسی گرتووە
حەقیقەت!

چی وترا
چی نووسرا
چی دەنووسرێ
چی دەوترێ
داروێک سەمای پێ دەکا

قەڵبە دەستپێکی ڕۆژگار
مەغریب سەفەر بە مووحیبەتەوە دەکا
شەویش شکۆی رۆژ دەشکێنێ
بێدەنگ بێدەنگ ناز دەکا
درۆزنێکی شیرین!

چادرگەیەک
لە بن ئاگردانێکەوە
دووکەڵ بەرز دەکاتەوە
بۆنکرووزی ئێسکوپرووسک دەنێرێتە ئاسمان
دەرگا داخراوە بۆ نزا…!

بگەرێینەوە
چاخی بەردین؟
دەرزییەکی جەنجاڵە
گڵۆباڵ ماندووی کردووین!