لەپێناوچی دیار غەریب تان تیرۆرکرد؟ … شوانە حەسەن بەکر
مرۆڤ بە هەڵوێستەكانی دەناسرێتەوە، ئەو كاتەی لە پێناوی بیڕوباوەڕەكەیدا گیانی خۆی دەكاتە قوربانی دەگاتە ترۆپكی راستگۆیی لە پێناو ئەو پەیامەی كە لە روحەوە بڕوای پێیەتی.
شەهید دیار، یەكێك لە گەنجترین سەركردەكانی (P.K.K) لە باشوری كوردستان، ئەو دە ساڵ پێش ئێستا كەسی یەكەمی ئەو رەوتە شۆڕشگێرە بوو كە سەركردایەتی شۆرشی دەكرد دژ بە دەوڵەتی توركیا.
بێ ئەوەی هەراو هۆریای سیاسی دروست بكات و موزایەدە بە وازهێنانەكەیەوە بكات وازی لە هاوسەرۆكی (پچدك )هێنا.
لێرەوە بۆت دەردەكەوێت بەورێك لە چیاكانی وڵات لە پێناوی خۆش بەختی ئەوانی تردا خەبات دەكات بە داخەوە وەك میدیای پەكەكە بڵاویكردەوە لە ڕێگەی پیلانێكی بەكرێگیرانەوە تیرۆركراوە، لە راستیشدا كاتێك سەیری میدیای هەندێك حیزبی كوردی لە باشور دەكەیت ئەو راستیە تاڵەت بۆ دەردەكەوێت كە چۆن شەهیدكردنی (دیار غەریب)و هاورێكانی دەكەنە بەهانەی هێرشە ناڕەواكانی توركیا، تەنانەت هانی خاوەنی شەهیدانی مەدەنی روداوەكە (كورتەك) دەدەن دژی (پەكەكە) نارەزایەتی دەرببڕن.
ئەو دۆخە نەگریسە، بەڵگەی ئەوەیە ئێمە هەم وەك سیستەمی سیاسی و تەنانەت وەك نەتەوەش گرفتی گەورەمان هەیە، نەمانتوانیوە بنەماكانی نەتەوەیی بوونی خۆمان بپاڕێزین، هەر چەندە لە ئێستادا رایەكی سەیر لە ناو دەستەبژێری باشوری كوردستاندا سەریهەڵداوە و پێداگیری لە سەر ئەوە دەكات كە ئەم جۆرە خەباتە بۆ ئێستای كوردستان كارەساتە و هۆكاری نەهامەتی گەورەیە و پێیان وایە نەتەوەو بەرگریكردن لە بەهاكانی مرۆڤبوون مۆدێلی بە سەر چووە بە بێ رەچاوكردنی ئەوەی ئێمە لە دۆخێكی مەترسیدار داین و ناچاركراوین لە پێناوی مانەوەدا چەك هەڵبگرین.
ئەوەی لەم نێوەندەدا گرنگە تەنها ئەوەیە كە شەهید دیار و هاوڕێكانی وەك ئەوەی مرۆڤێكی رەسەن و خاوەن هەڵوێست بوون، شەهید بوون، و جارێكی تر ئەوەیان دووپاتكردەوە كە كورد بوون لە هەموو شوێنێكی ئەم جیهانەدا مەترسی لە سەرەو دەبێت لە پێناویدا قوربانی بدەین.
