قاسم ئاغا لەنێوان ئێستاداو موستەشاریەتی لە ڕابڕدوودا … شوانە حەسەن بەکر
کەسێک هەیە بەناوی قاسم ئاغا، هەروەک بەقاسمە کۆر ناسراوەو یەکێک بوە لەموستەشارەکانی جاش، لەسەردەمی بەعس. ئەم کەسە نەک تاوانێک بەڵکو چەندین تاوانی ئەنجامداوەو دیارترینیشیان بەشداریکردنە لەتاوانی جینۆسایدی ئەنفال.
لەلیستی ناوی ئەو تۆمەتبارو تاوانبارانەی کە (٤۲۳) کەسن و لەلایەن دادگای باڵای تاوانەکان لەعێراق داواکراون، قاسم یەکێکیانەو تا ئێستا نەچوونەتە بەردەم دادگا، کەلەو ژمارەیە (۲٥۸)کەسیان لەکوردستانن و لێیان مردوەو لێشیان لەدەرەوەی کوردستانەو لێشیان لەناو لیستی وەزارەتی شەهیدانی حکومەتی هەرێمی کوردستانە، بۆنموونە (تەحسین شاوەیس)!
بەبڕوای من ئەوە ملهوڕی و ئازایەتی قاسمە کۆرو هاوشێوەکانی نیە کەناچنە بەردەم دادگاوو بێمنەتانە دەسوڕێنەوەو زۆریش جاشایەتی و جاشبوونیان بەمنەت بەسەر خەڵکی کوردستان و کەس و کاری قوربانیەکاندا دەفرۆشنەوە؛ بەڵکو ئەوە دەرەنجامی ناڕاستترین و کەمژانەترین بڕیاری بەرەی کوردستانی پێش ڕاپەڕینی ۱۹۹۱ە، کەلێبوردنی بۆ تەواوی ئەم تاوانبارو خیانەتکارانە دەرکرد، بەناوی لێخۆشبوونەوە؟!
دوای ئەم بڕیارەش، حزبەکانی کوردستان، کێبەرکێیان لەسەر ئەوەکرد، کەکامیان ئەم مووستەشارو سەرۆک جاش و خیانەتکارانە لەخۆبگرن، بۆ ئەوەی نفوزی خۆیانی پێزیادبکەن، کەلەبچوکەوە بۆ گەورەی حزبەکانی پێش ڕاپەڕین و هەندێ لەوانەی دوای ڕاپەڕینیش لەم تۆمەتبارو تاوانبارانەیان تێدایە؛ کەبەپێی زانیاری و ئامارەکانی لای من، زۆرترینیان لای پارتی دیموکراتی کوردستانە!
ئێستا نەک قاسم و قاسمەکان، بەڵکو کوڕو نەوەکانیشیان، دێن و دەیانەوێ جاشایەتی و خیانەتی باوکەکان بەتێکۆشان و پاڵەوانێتی بفرۆشنەوە، هۆکاری ئەمەش دیسان حزبەکان و کەسەکانی ترۆپکی حوکمڕانی کوردستانن!
من هیچم نیە بۆ قاسم و قاسمە تاوانبارو جاشەکان، کۆمێنتیشم بۆ حزبەکان نیە کەبوون بەلانەو داڵدەدەری ئەم خۆفرۆشانە، تەنیا ڕووی دەمم لەکەس و کاری قوربانیەکان و پێیان ئێژم، ئەگەر یەک تۆزقاڵ هۆش لەسەرتانا مابێ، بۆ ئێستە بەدوا، ئەگەر سەرۆکی حکومەت، سەرۆکی هەرێم، سکرتێرو مەکتەبی سیاسی حزبەکان، هاتنە سەرشاشە یان لەبۆنەکاندا بەکەس و کاری قوربانیەکانیان وت :” ئێمە پشت و پەناتانین و خەمخۆری دۆسییەی تاوانەکانی جینۆسایدی ئەنفال، جینۆسایدو کیمیابارانکردنی هەڵەبجە، جینۆسایدی قەڵادزێ، جینۆسایدی بەرزانیەکان، جینۆسایدی فەیلییەکان” و ئەوانی تریشین؛ ئێوەش پێیان بڵێن درۆ دەکەن درۆ
