گورگ و بەرخە سپی … گۆڕینی : محەمەد بەرزی

 منداڵە ژیرەکان :  جارێکیان لەناو لەوەڕگایەکی گەورەی پڕ لە سەوزە گیادا ،  بەرخێکی خرپنی سپی زۆر  پچکۆلانە لە گەڵ ڕانە مەڕێکدا دەلەوەڕان . بەڵام بەرخەکە بە دەم خواردنەوە  وردە وردە  ملی بۆ پێشەوە نا و بە تەواوی  لە شوان و مەڕەکان  دوور کەوتەوە و بە بێ ترس بە دوای گیای تەڕ و تازەدا دەگەڕا .  پاش ماوەیەک پەڵە گیایەکی دۆزییەوە و لە خۆشیاندا بە هەر چوار پەل سەمایدەکرد ، بەڵام نەیدەزانی زۆر لە ڕانە مەڕەکە و شوانەکەی  دوور کەوتۆتەوە و ئاگاداری ئەوەش نەبوو ، کە گورگێکی  چاوبز لە پەنای پیرە دارێکی گەورەدا خۆی بۆ ماتداوە . 

ساتێک بەرخەکە هەستی بەوەکرد ، کە زۆر لە مەڕەکان دوور کەوتۆتەوە ، بڕیاریدا بگەڕێتەوە بۆ لایان . بەڵام کاتێک گورگە برسییە فێڵبازەکەی بینی ، کە خۆی شاردبۆوە بۆی ، زۆر شپرزە بوو ، لە ترساندا هەموو گیانی کەوتە لەرزین . جا چونکە گورگەکەی زۆر لێوەی نزیکبوو ، نەیدەتوانی ڕابکات و خۆی لە دەستی رزگار بکات .
بەرخەکە بە دەنگێکی پڕ لە گریانەوە بە گورگەکەی وت : ( ئەوە تۆ دەتەوێت بم خۆیت ؟ ) … گورگەکەش بە دەموچاوێکی ترش و تاڵەوە وەڵامی دایەوە و وتی : ( بەڵێ بۆ خواردنی تۆ هاتووم ، ئەی گوایە بۆچی هاتووم ) .
بەرخەکە سەرلەنوێ بە گورگەکەی وت : ( من ئەمڕۆ لە بەیانییەوە گیا دەخۆم ، ئێستا هەموو گەدەم پڕە پڕ بووە لە گیا ، جا تکایە تۆزێک لەسەرم ڕابوەستە ، تا گیاکە هەرسدەکەم ؟ . چونکە ئەگەر ئێستا من بخۆیت هەر وەک ئەوە وایە گیا بخۆیت و تامی گۆشتە ناسکە خۆشەکەم ناکەیت و تەنها تامی گیا دەکەیت ، جــا وابـاشترە تۆزێک لـەسەرم ڕاوەبوەستیت ) .
گورگەکە بەوپەڕی خۆشییەوە سەری ڕەزامەندی بۆ لەقاند و وتی : ( دەزانم تۆ لە پێش منەوە لێرەیت و منیش هیچ کێشەیەکم نییە و دەتوانم کاتێکی زۆر لەسەرت ڕابوەستم ) . بەرخەکەش زۆر سوپاسیکرد .
پاش ماوەیەک گورگەکە تاقەتی نەما و ویستی لە پڕ پەلاماری بەرخەکە بدات و بیخوات . بەڵام بەرخەکە ، کە بەمەی زانی گورج گورگەکەی وەستاند و وتی : ( گورگی ئازیز : تکایە تۆزێکی کەش لەسەرم ڕابوەستە ، چونکە هێشتا گیاکە لە ناو گەدەمدا بە تەواوی هەرس نەبووە ، جا تکایە ڕێگام بدە تۆزێک هەڵپەڕم ، تا زووتر گیاکە هەرس بکەم ) . ئەمجارەش گورگەکە بەمە ڕازی بوو . ئنجا بەرخەکە کەوتە هەڵپەڕین و بە هەر چوارپەل سەمایدەکرد ، بەڵام لە ناکاو لە خۆیەوە وەستا .
گورگەکە سەری سوڕما ، بۆیە وتی : ( ئەوە بۆ وەستایت ؟ ، دەی تا دەتوانی خێراتر هەڵپەڕە ، تا زووتر گیاکە هەرس بکەیت ) .. بەرخەکەش لە وەڵامدا وتی : ( ئەوی ڕاستی بێت ، چونکە هەڵپەڕینەکەم مۆسیقای لەگەڵدا نییە ، ئەوا ناتوانم بە خێرایی و بە دڵی خۆم هەڵپەڕم . جا تکایە وەرە ئەم زەنگۆڵەیە لە ملم بکەرەوە و زۆر بە قایم ڕایبوەشێنە ، ئەو کاتە منیش بە دەنگ و ئاوازی زەنگۆڵەکە خێراتر سەما دەکەم و زووتریش گیاکە هەرسدەکەم ) .
گورگەکەش چونکە خواخوای بوو زوو بەرخە سپییە ناسکۆڵەکە بەبێ کیشە بخوات بەمە ڕازی بوو ، بۆیە بە ئەسپایی لە بەرخەکە هاتە پێشەوە و زەنگۆڵەکەی لە ملی کردەوە و زۆر بە قایم ڕایوەشاند … لەو لاشەوە شوانەکە دەگەڕا بە دوای بەرخەکەدا . جا چونکە دەنگی زەنگۆڵەکە زۆر بەرز بوو ، شوانەکە گویێ لە دەنگەکەی بوو . بە خۆی و گۆچانەکەیەوە بەرەو دەنگەکە چوو ، پاش چەند هەنگاوێک گورگ و بەرخەکەی پێکەوە بینی و بە گۆچانەکەیەوە زۆر بە گوڕ ڕایکرد بۆ گورگەکە ، گورگەکەش ، کە گۆچانی شوانەکەی بینی زۆر ترسا و هەتا توانی ڕایکرد و دوورکەوتەوە ، بەرخە سپییە جوانەکەش بۆخۆی ڕزگاری بوو .
جا منداڵە ئازیزەکان : ئەم چیرۆکە ئەوەمان فێردەکات ، هێز تەنها مەرجی سەرکەوتن نییە ، بەڵکو بیرکردنەوەی ژیرانەش دەتوانێت بەسەر هێزی زۆر گەورەدا سەربکەوێت .

١٨ / ١٠ / ٢٠١٧

تێبینی : ئەم چیرۆکە بە دەستکارییەکی کەمەوە لە ئینگلیزییەوە کراوە بە کوردی ، بەڵام ناوی نووسەری لەسەر نییە .

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.