Skip to Content

93 Views

باڵدارێکی غەدر لێکراو باڵە فڕە دەکا … شوان شەفیق

باڵدارێکی غەدر لێکراو باڵە فڕە دەکا … شوان شەفیق

Be First!
by July 19, 2019 General, Poems
image_print

قیژە قیژی نەورەسەکان
گوێیان پڕکرد لە نزا
لەنجەولاری گەڵاکان
چاویان پڕ کرد لە ئاو
ماندوو بوون چۆلەکەکان
دەرناکەوێ ھەتاو
تەماشاکە!
لە دەرەچەیەکەوە
ئاواز لە ھەناسە قەتیسبووەکانەوە دەژەنرێ
نایبیستن کۆترە گمەگمکەرەکان.

خەندەیەک لە مۆزەخانەدا ھەڵگیراوە
ڕۆژگارێک کە تیایدا دەگرین با ھەڵیگرین!
لە دەروازە بە خەتێکی ڕەشی قەترانی نووسراوە
بۆ چوونە ژوورەوە بلیتی عەشق پێویستە!
چ تاریکە!
خەمگین، خەمگین
دەگرین، دەگرین
ترووسکایی تیادا نابینرێ ژیان،
چۆن پێبکەنینەوە وەک سەرەتا؟
پەرژان دەمانخاتە ژان.

گریان پیشەی ڕۆژانەیە
ھەنسک ھەڵکێشان کاری شەوانەیە
لێشاو لێشاوی فرمێسک سەدەی نوێ دەشواتەوە،
کێشەی خۆتە چەند ماندووی
ژیان بۆ کام ڕێگای بردووی
کرێی خەمگینیت لێ وەردەگیرێ
مووحیبەت چی بەسەرھات؟
دەتەوێ خاترتبگرێ!

باڵندەکان لەترسیاندا نییە
ھاورێی مرۆڤەکان ناکەن
پەپوولەکان لە ناسکیاندا نییە
لەسەر گوڵەکان دەنیشنەوە
تاک و تەرا باڵندەیەک لەسەر دەستی مرۆڤە
مەحکووم کراوە بە زیندانی خاوەندارێتی،
بێ بەشکراوە لە ئازادی
کوا بۆ کوێ گەشتی کردووە شادی؟

ھێڵنج دەدەی
لە باخچەدا پیاسە بکەی
گوڵیش بۆگەنیکردووە
ئەوەندە غەدری لێکراوە
چ ئیستاتیکایەکە!
ڕۆچوون بە درزەکانی
پەنجە قڵیشاوەکاندا.

زیڕەزیڕی نەبوونی نان
شیڕەشیڕی نەبوونی سۆز
لاف و گەزاف و پۆز
ئەی ماسک پۆش!
بە ئەسپۆن خۆمان بشۆین؟
بۆ وشکبوونەوە دەچینە بەر با
گڤەگڤی با
بەرگی حەقیقەت لا دەبا.

شوان شەفیق

Previous
Next

Leave a Reply