Skip to Content

73 Views

ملیۆن ھەناسەی سەرکەوت تارۆ … جەمال ساڵح

ملیۆن ھەناسەی سەرکەوت تارۆ … جەمال ساڵح

Be First!
by July 19, 2019 General, Literature
image_print

لە ڕۆژانی بیست وھەشت وبیستو نۆی مانگی شەش، لەناشڤیڵی ویلایەتی تێنسیی، شانۆیی ملێۆنێک ھەناسە کەلەنووسین ودەرھێنان و نواندنی سەرکەوت تارۆ بوو، وەبەھاوبەشی لەگەڵ جەستن پیتەردا تێکستی گۆرانی یەکانیشی نووسی بوو، بەزمانی ئینگلیزی نمایشکرا.
لە خانوی کڵێسایەکی خۆرئاوای ناشڤیڵ بینیمەوە بۆ جارێکی تر، پاش ماوەیەکی زۆر دابڕان.
شوێنەکە زۆر کۆن بوو، دیوار و زەوی جێگەکە گەواھی ئەوەی ئەدا کەلە سەدەکانی ڕابردووەوە ئەم خانوە بنیاتنراوە، بەوەی کە كلێسایەکی کۆنیش بوە، نەزانراوە کە چەند یەکشەممە لە سەدەیەکدا نوێژی تیاکراوەو چەندەھا کەسی تیا تەعمید کراوە«باپتایز کراوە»؟؟
لەوە ئەچێ لەکاتی خۆیدا کرابێتە جێی پیشاندانی فیلمی سینەمایی ، دە بۆ پازدە ڕییز کورسی تیایە کە ھەڵئەدرێنەوە، لەدوو بەری ھۆڵەکە بە ڕاڕەوێکی پلیکەدار جیاکراوەتەوە. کە جێی نزیکەی سەدو سی کەسێکی تیا ئەبێتەوە، لەبەردەم ڕیزی یەکەمیشدا بۆشایی یەک ھەیە لە نزمایی دا، کە نمایشی مۆنۆدراماکەی تیا کرا.
بە ترس لە ترسدا دەستی پێکرد، لەو جێ یەی کە سەرکەوت تارۆ کە کاراکتەری سەرەکیی مۆنۆدراماکە بوو ھەموو ڕووداوەکان لەدەوری ئەو ئەخولانەوە، تێدا لەناو ژووری بەندیخانەیەکدا بۆ ماوەی دە مانگ دەستبەسەر بوو. لەگەڵ کۆمەڵێک کەسی تر ولە ناشناڵتیی جیاواز، کە بە کورسی یەک ودو عارەبانەی کەسانی پێداویستی تایبەت ودارشەقێک و گۆچانێکی بچووک وێنا ئەکران کە سیمبولی پاشماوەی ئەو شەڕو کاولکاریانەی پیشان ئەدا کەلەسەدەکانی نۆزدەو بیستدا بەسەر میللەتی کوردا ھاتوون وقوربانی وێرانکاریەکانی مرۆڤ لە جێ یانەی کەپەنایان بۆ ئەم وولاتە ھێناوە و لە کەسیی سەرکەوت خۆیەوە ئەمانبینین. کە دیارترینیان کاراکتەرێکی لاتینی بوو.
ئەمان بە بەھانەی پەناھێندەی نایاسایی لە ئەمریکا بوون، و سەرکەوتیش کە سەر بەووڵاتی عێراق ھەژمارکراوە، بە بەھانەی تیرۆریست دەستبەسەرە.
لە گێڕانەوەکانی کاراکتەر ئەمانگێڕێتەوە بۆ زێدی خۆی کە کەرکووکە، و لەو دەرگا شوومەی کە چاوەڕێی ھەواڵێکی خۆشی لێ ئەکات، کە جگە لە ھەواڵی لابەلا بەولاوە ھیچی تری لێ نایەتە ژوورەوە، ئەمانباتە ئەودەرگایەی کە ھەموو ڕۆژی ماچی ئەکرد لەکاتی خوێندکاریی لە کەرکووک، کە ھەمیشە بەختی باشی بۆ ئەھێنا وبە پلەی باش دەرئەچوو.
ئەیبردینەوە بۆ ژوورە ڕەشپۆشەکەی دایکی جەرگسووتاوی کە سێ کوڕی شەھیدو یەکێکی تری لە غوربەت ھەنسکی چاوپێکەوتنەوەی ھەڵئەکێشێ، کە ناتوانێ جارێکی تر بیبینێتەوەو باوەشی گەرمی پیا بکات، بەوئاواتە ناگات.
لە ژوری زیندانەوە ھەڵمان ئەگرێت و ئەمانباتە ماڵە چۆڵەکەی خۆی کە ھاوسەرە تاقەباڵەکەی و سەگە بەوەفاکەی-ڕۆز- ڕۆژانی بێ ئەمیی تەنیا باڵیی بەسەرئەبەن، کە دوو نەگبەتیی تر زەفەریان پێ ئەبات، لەلایەک ڕۆز وون ئەبێت و ئەوی تریان کەوتن وقاچ شکانی ھاوسەرەکەیەتی.
پرسیارێکی کلاسیکی دەربارەی تۆمەتبارکردنی ئەم وەک تێرۆرێستێ لە بینەر ئەکات کە بەرەوڕووی بگییرانی ئەکاتەوە بە ناڕاستەوخۆیی!!
لە ترس بترازێ، ئەم لەخەم ھەڵکێشراوە، خەمی خۆیەکی بەناھەق گیراوو، خەمێکی ووڵاتی کۆت وبەندکراو بە چەند ڕەھەندێکی خەڵەتێنەر لە حیزب وئایین، کەھەردوک دوو دیوی دراوێکن. خاکێکی دابەشکراو بەسەرچوار ژمارەی یەک لەیەک قەڵبتردا.
بە ڕوانینە کارە میلۆدراماکانی سەرکەوت تارۆدا بۆت دەرئەکەوێ کە نواندن لەخوێنیایە، وکوردایەتیش لە دی ئێن ئەی دا.
ئێکسسوارەکانی کەبوو بوونە دیکۆر ، وموزیک وڕووناکی وا ئاوێتەی یەک بوو بوون، کەلەگەڵ ھەموو جوڵەیەکی کاراکتەرەکەدا بینەری ڕاپێچی ئەو کەش وھەوایە ئەکرد کە لەو ساتەدا تیا ئەژیا، زیندان، ماڵەوە، دەرەوە، بەردەرگا، کەرکەوک و ھی تریش.
لەکۆتاییدا پڕ بەدەم ھاوار ئەکات وئەپرسێ:

بۆچی ئەم کێشانە یەک بەدوای یەکداو ڕۆژانە ڕوومان تێ ئەکات؟؟ کە تێکڕایان شۆکیان کردووم!!
ئایا من بوونەوەرێکم وەک مرۆڤ؟ یان نازیندووم؟ بەرد؟ ئەگەر بەردم، ئێستا کاتی تەقینەوەولێک شەق بوون وھاوارە لەدەست بەریەککەوتنە ئەزەلیەکان!!
بەڵام لەکاتی گیرانمدا لەقوڵایی گرتووخانەکەدا ھەرگیزھەستم نەکردوە کەمرۆڤم. ئەی گەردەلوولی کێشەکان، ھەردەم شەڕمکردوە لەگەڵت، لەدووتوێی نووسینە ئەدەبیەکانمەوە، وە دۆزینەوەم بۆ نەھامەتیەکان وکێشەی دنیایەکی تر.
ئێستا کاتی ئەوە ھاتوە کە ئەقڵ ئەوژیانە ڕەتکاتەوە کەتەنھا ھێز و سیاسەتی بۆگەن کۆنترۆڵی ئەکات.
ئێستا کاتی خەوی قوڵمە تا باوەش بکەم بەدایکمدا کەلەوانەیە دنیایەکی زیاترئاشتی یانەی جیاواز لەم ژیانە بێت.
دایکە؛ بۆ نەتھێشت لەبری ئێوە بمرم، بۆچی؟.. چونکە من ڕقم لەکوشتنی بەشەرە، ھەموو بوونەوەرەکان یان ھەرشتێ لەسەر ئەم زەوی یە، چونکە ناتوانم سنوورە دەستکردەکان بشکێنم، وە ناشتوانم لە ناو قووڵایی ھیواکانم و تواناکانمدا لەناوەندی ئەم دنیایەدا نامۆبم.
ئەگەر سنوور ودەرگا داخراوەکان بمێنن بۆ ھەتا ھەتا، دەکەواتە لێمگەڕێن با بنووم، لێمگەڕێن با خەوێکی قووڵیی ھەتا ھەتایی بکەم.
سەرکەوت تارۆ بە ملیۆنێ ھەناسە خۆیمان پێ دەناسێنێ، کە لەچەندەھا ھەوڵ تێکشکاندنی یەوە، ھێشتا ھەر ئەو درەختە بە پەل وپۆیە یە کە پیرەمێرد ئاسا ئەڵێ: پەڵی بەرد بۆ پەلی بەرزەو لەقەش بۆ سەر پەلی بەردار.
ھەرچەندە ماوەی نمایشکردنی میلۆ دراماکە تەنھا دوو ڕۆژ بوو، بەڵام ئەگەر بوار بڕەخسایە ودەستی بگیرایە، ھەق وا بوو زیاتر بکرایە، بۆ ئەوەی خەڵکی زیاتر ھەلی بینینیان بۆ بڕەخسایە.
لە ناخی دڵەوە پیرۆزبایی لە کاک سەرکەوت تارۆ ئەکەم، ھیوای ئەوپەڕی سەرکەوتنی بۆ ئەخوازم.

Previous
Next

Leave a Reply