Skip to Content

128 Views

ماراسۆنێکی نەبڕاوەیە ژیان … حەمەی شانۆ

ماراسۆنێکی نەبڕاوەیە ژیان … حەمەی شانۆ

Be First!
by July 22, 2019 General, Poems
image_print

خێرا ڕائەکەم
کەچی هەر لەجێگای خۆمدام
وەک ئەومریشکە پەڕ وباڵ سپی و پاکیزەیەی
لەدوا لەحزەی چەقۆهێنان بەملی دەیەوێ
هەڵبێت ، دەمەوێت هەڵبێم
هەڵبێم لەناوەکەم .

خێرا ڕائەکەم ڕائەکەم
کەچی چاو دەکەمەوە
ئەوەتام هەر لەنێو شارەکەم
بەیانیان لەگەڵ غەریبەکانم
نیواڕوان لەگەڵ یادەوەریەکان
عەسران لەگەڵ تەنهایی ئەچم بۆ پیاسە
ئێوارانیش لەگەڵ خۆر دەست لەمل یەک ئەکەین
ئەو ئاوا دەبێ و منیش بەسەرخۆشی
دەگەڕێمەوە نێو ژوورەکەم
دەچمە سەرجێخەوەکەم دەخەوم
دایە لەخەویشمدا ڕائەکەم وئەمەوێ هەڵبێم
لەپۆلیس و کەلەپچەکان.

خێرا ڕائەکەم بخەوم
دەمەوێ هەڵبێم
لەم ژیانە کەبۆتە مۆتەکە لێم

ڕائەکەم و ڕائەکەم ئاخر بیستوومە
ئەڵێن ئەمشەو کاتژمێری سفڕە
تۆش خێرا ئەم شیعرە بخوێنەوە
تاکو تۆپەکان نەتەقیون.

ژیان ماراسۆنێکە
بێ وەستان دەبێ ڕاکەی
من بەپێی پەتی ڕائەکەم
لەبەرخوێنی برینەکانم
زەویەکە بۆتە فەرشی سور
کەچی ئەوانیش
بەماشێن.
بەفرۆکە
بەکەشتی گەورە.

خێرا ڕائەکەم و ماندوونابم
ئەوڕۆژە باراناوییەم بیردێتەوە خێرا بۆکڕینی
قاپێک پاقلە ڕۆشتم بەڵام کەهاتمۆ چەترەکەمت
فڕێ دابوو ، سواری ماشێنێک بووی و ڕۆشتی

لەمناڵیەوە دەڵێن خێرابە
خێرا وانەکان بنوسنەوە دەنا ئەیسڕمەوە ،مامۆستاکەم
خێرا بڕۆ دەرەوە و زوو وەرەوە دەنا لێت ئەدەم ، دایکم
گەورەش بووم هەردەیانگوت خێرابە
خێرا چیمنتۆم بۆ بێنە ،وەستاکەم
خێرا وەرە داوام دەنا شووئەکەم ، دڵدارەکەم
ئەم دەیگووت خێرا ئەو دەیگوت خێرا
خێرا بێرە مێرە تێرە فێرە کێرە ..
لەم خێراییە شتێکم لێ کەوت
وابزانم دڵم بوو.
وابزانم بەیانی هەینیە.
وابزانم بەیانی ئکتۆبەرە
باشترە خۆم بپێچمەوەو ڕاکەم
خێرا خێرا.

ئەم خەڵکە حەزیان بەشتی خێرایە
ڤیاگرا دەخۆن تاخێرا خوێن بچێ بۆ ماسولکەی نێرینەیان.
سڵاوی گەرمی نێو نامەکان نەماوە
بەپەلە تێدەپەڕن بەتەک یەکترا دەڵێن های
بەپەلە شۆفێری دەکەن و جنێوئەدەن
بەپەلە قسەدەکەن و گوێ لەیەکتری ناگرن
بەپەلە ڕائەکەن و پشوو نادەن
بەپەلە بەپەلە بەپەلە
تەقینەوەیەک ڕوویدا.

سەرم دێشێ
دەڵێی مشتێک تی ئێنتی بخۆم
مێشکم بتەقێنمەوە
ئەژدادی هەموو ئەویادگاریەنە بسوتێنم
کە خێرا خێرا گەردنم دەگرن
ناهێڵن بەئاسودەیی
پیاسەبکەم
ناهێڵن کەباب ببرژێنم
گۆرانی بڵێنم
هەڵپەڕم
خێرا ئەم شیعرەم نوسی
تا هەڵبێم
لەم شارە گەورەیە.
شارە گەورەکان
مرۆڤ تێیدا بەکۆنتڕۆڵ ئەکرێ
شار کە گەورەبوو
خەڵکی زۆر دەناسی
هاوڕێت زۆردەبێ
کە هاوڕێت زۆر بوو
یادەوەریت زۆر دەبێ
کە یادەوەریت زۆر بوو
مێشکت دەگێ.

یوسف دایکی نەسیحەتی کردبوو
کەگەڕایەوە ماڵ خێرا بەبەردەم چاخانەی بازاڕەکەدا
تێپەڕێ و بەخێرایی ڕابکات
نەبادا شێرۆ مەدفەع بیڕفێنێ
خێرایی غەدرێکی گەورەی لە مناڵان کرد.

حەبەخەولێخەرەکەم نەبێت
هیچ شتێک دەرەقەتی ئەم ڕاکە ڕاکەی ژیان نایات

ئەم شیعرەم بەنیوە ناچڵێ جێ دێڵم دەبێت ڕاکەم
خێرا ڕاکەم، ڕاکەم و ڕاکەم…

حەمەی شانۆ

Previous
Next

Leave a Reply