Skip to Content

قەوزەیەکی دیکەی فاشیزم…نوێترین کتێبی نووسەر ئیسماعیل حەمەئەمین

قەوزەیەکی دیکەی فاشیزم…نوێترین کتێبی نووسەر ئیسماعیل حەمەئەمین

Closed
by ته‌مموز 24, 2019 Books, General

نوێترین کتێبی نووسەر ئیسماعیل حەمەئەمین لە لایەن بڵاوکراوەکانی نووسیار چاپ و بڵاوکرایەوە.
فاشیزم چۆنه‌ و چۆن بیرده‌كاته‌وه‌؟ ئه‌قڵی نكوڵیكردنی فاشیزم له‌ جینۆساید چۆن كارده‌كات؟ بۆچی فاشیزم خۆی كۆپی ده‌كاته‌وه‌؟ شه‌ڕ له‌دژی فاشیزم له‌كوێوه‌ ده‌ستپێده‌كات؟ هه‌قیقه‌ته‌ ئه‌قڵانیه‌كان چین و هه‌قیقه‌ته‌ ڕیالیستیه‌كان چین؟ به‌ چ شێوه‌یه‌ك پێچكه‌ بچوكه‌كانی فاشیزم چۆن دوای ڕووخانی دیكتاتۆریه‌ت جارێكێتر فۆرمێكی دیكه‌ له‌ فاشیزمی نوێ به‌رهه‌مده‌هه‌نێن؟ ئه‌مه‌ و چه‌نده‌ها گفتوگۆ به‌زمانێكی شیكاریانه‌ی ڕوون و بێ گرێ و قسه‌كردن له‌سه‌ر چه‌نده‌ها نمونەی تر‌ له‌دادگایی سه‌دامه‌وه‌ تاوه‌كو دادگایی نازییه‌كی وه‌ك ئادۆلف ئایشمان و پشت به‌ستوو به‌ فه‌یله‌سوفی گرنگ (هانا ئاڕێنت).

پەرەگرافێک لە کتێبەکە:


ئادۆلف ئایشمان لە دادگاییکردنەکەیدا زیرەکانە دەیەوێت لەو تاوانبارییە خۆی پاکبکاتەوە، بەوەی بەشدار بووە لە کوشتنی بە کۆمەڵی جوولەکەکان لە سەربازگەکانی هۆلۆکۆست. ئایشمان نکۆڵی لە بەشداری ڕاستەوخۆی ئەم تاوانە دەکات و دەڵێت؛ من تەنها لە بەشێکدا تاوانبارم نەک هەمووی، تاوانبارم ته‌نها لە بەشی ئەوەی من بەپێی ڕێنماییەکانی حکومەت کاری ترانسپۆرت و ئۆرگانیزەی ترانسپۆرتی جوولەکەکانم کردووە و له‌وه‌دا هه‌ڵه‌م هه‌بووه‌. ئاوەها ئادۆلف ئایشمان خۆی وەک پیاوێکی دڵسۆزی دەوڵەتی نمایش دەکات و چەمکی (ئەرک / الواجب/ Pflicht) و مۆڕاڵ و ئەخلاقی ئەم ئەرک بەجێهنانە دەخاتە ئەستۆی خۆی و تەنانەت لە بەشێکی دادگاییکردنەکەدا پەنادەباتە بەر ئەم چەمکە و باسی فەیلەسوفێکی وەک کانت دەکات و بە مۆڕاڵیستێکی ئەرک بەجێهێنەری گەورەی خۆی لەقەڵەمدەدا. خانمە فەیلەسوفێکی وەک هانا ئارێنت ئەم بەرگریکردنە بە (بێشەرمانە) پێناسە دەکات.
ئایشمان تەنانەت خۆی بە تاوانبار دەزانێت بەشێوەیەکی ناڕاستەوخۆ و لە بەشێکیدا، بە قسەی خۆی نەک هەمووی! بەوەی تاوانبارە لە ترانسپۆرتکردندا بەڵام لە کوشتندا ئەو تاوانبار نییە! ئەمەش ئەو ئەقڵیەتە ترسناکەمان نیشاندەدا کە ڕژیمە تۆتالیتاریست و فاشیستەکان لە مرۆڤەکاندا دروستی دەکەن، بەوەی ئەوان بەشدارنین بەڵکو پێیانکردوون و ئەمان فەرمانبەرن وەک چۆن دەتوانن لە حکومەتی داهاتووشدا هەمان ڕۆڵی جێبەجێکردن ببینین، لێرەشدا مەترسی ئەم بکەرە بەشدارە پشتمێزە دەردەکەوێت، بەوەی زۆر ڕووکەشییانە و کاڵفامانه‌ بیردەکاتەوە. ئەم خودەی كه‌ بیرناکاتەوە و ڕووکەشە كاراكته‌ره‌كی گه‌وره‌ی كه‌سایه‌تی خودی ئه‌و مرۆڤه‌یه‌ كه‌ له ‌هه‌ناوی مۆدێرنه‌دا دێته‌ ده‌رێ و پێی ده‌ڵێن؛ مرۆڤی مۆدێرن.
پرۆفایلی کتێب
بڵاوکراوەکانی نووسیار
نوسەر: ئیسماعیل حەمەئەمین
بابەت: فەلسەفە
چاپی یەکەم 2019
ژمارەی لاپەڕە: 182
نرخ: 4000 دینار، قەبارە: 13،5*21
ISBN:978-87-93854-02-4

Previous
Next
Kurdish