دەما شاعر ژبلی خەیالێن خو كەسێ دی نەبینیت …. عبدالرحمن بامەرنی
بارانەك ژ یادان* وەك نمونە
ئەو وێنەیێن كارلێكێ دگەل خەیالا مرۆڤی دكەن، زێدەتر كارتێكرنێ ل مرۆڤی دكەن و رەنگە بۆ چەندین رۆژان ژی مرۆڤ دوێ خەیالێدا بمینت، دروستكرنا وێنەی ژی و تایبەتی وێنەیێ شعری، عەشق و دلسوزی و داهێنان و سنعەتكاری بۆ دڤێت، وێنەیێ شعری ژی ژ خەیالا شاعری و هزرێن وی د پەشیت، ئەڤ خەیالا هەنێ یە ژی شاعری بەرەڤ قولاچێن تاریڤە دبەت و جوانترین رامان و دەربرینان ژێ دەر دئێخیت، ژبەركو دوی دەروكی را، ئەو تشتێن دهزر و عەقلێ ویدا هەین، وەرگری بەشداری دەربرینێن خوە دكەت.
ئەڤە بوون ئەوا ئەز شییام وەك پێشەكیەكێ بۆ ڤێ نڤیسینا خوە یا كورت، ل سەر شعرا (بارانەك ژ یادان) بنڤیسم، كو من ڤیایی ب شروڤەكرنەكا رەخنەی خوە بەردەمە ناڤ قولاچ و كونجێن ڤەشارتی یێن ڤێ شعرێ و ئەوا هەر خواندەڤایەكێ بخوینیت، رەنگە هەمان بوچوونێن من هەبن.
هوزانڤان ل دەستپێكا شعرا خوە دبێژیت:
ل بەر پەنجەرا هزران
دلوپەكێ خوە دبەژنا غوربەتێ وەركر و
ب پێن بەندەمانێ ڤە ئالیا
دوماهیا شعرێ ژی بڤی پەرەگرافی قفل دبیت:
من دڤێت ژ ژورا سەرێ خوە بدەركەڤم و، پەنجەرا هزرێن خوە بشكێنم ..!!
بۆ دروستكرنا ئاڤاهیێ ڤێ شعرێ، هوزانڤانێ ڤیایە پەنجەرێ بكەتە كلیلا چوونا ژوورا تێكستا وێ, لێ دا كو ئەو بشێت جوداتر ژ خەلكێن دی رولی بدەتە وێ پەنجەرێ، نەهێلایە ئەو پەنجەر ببیتە دەروكێ تێپەربوونا هەمان خواندەڤا، وێ ڤیایە، خواندەڤا و وەرگرێ شعرێ دووری وێ بیت، ژبەركو خەیالێن شاعران و دیتن و هزر و بیركرنێن شاعران، حەز ناكەن كەسێن دی نە تێكەلی نهێنیێن وان بن و نە ژی ببنە هەڤالێن خەمێن وان، بەلكو، ئەو خوە درێزا كەسێن نە ئاساییدا دبینن، دەما ئەو شعرێ د نڤیسن، ئەو خوە ژ هەمی تشتان ڤالا دكەن، بتنێ دگەل خەیالێن خوە دمینن، خەیالێن وان ژی جوداتر ژ كەسێن دی، بلندتر دفرن و دوورتر دبینن و گرانتر دهەلگرن.
شعر ژ هاتنا بارانێ دەست پێدكەت، لێ بۆ هوزانڤانی ژمارە نە گرنگە، ژبەركو ئێك چپك دشێت ببیتە هێڤێنێ خولقاندنا تشتەكێ دی، چپكەكا بارانێ ل بەرێڤەی پەنجەرا وێ، كو خوە ب شووشەیێ پەنجەرێدا بەردایە خوارێ و خشیلانكەك بدویڤ خوڤە هێلای، بەس بوون كو خوە ژ دەردوورێن خوە ڤەدزیت و ئەو وێنەیێ ل پاش خوە هێلای بكەتە بابەتێ نڤیسینەكێ.
ژیان و هیڤی/ یادێن وێرانكەر/ ئەڤە ئەو وێنەنە یێن وێ چپكێ ئەو دناڤ خوەدا بەرزەكری و تا وی راددەی، ئەو خوە بكەتە هەڤپشكا ئەوران و ئەو هەردوو پێكڤە تاڤییان برێژن، دەما دبیێژت:
چاڤێن من و ئەوران تاڤی رێتن
هوزانڤان لڤێرە بتنێ ژی نا راوەستیت، بەلكو بەردەوامیێ د دەتە چكێن بارانێ و هێشتا وێنان ژێ دروست دكەت، هەر وەكو ژمێژە لهیڤییا بارانەكا ژڤی رەنگی و ڤیایی كەسەك هەڤبەشی خەمێن وێ بیت، باران دهێت و وی كەسی بۆ پەیدا دكەت، یێ بشێت ببیتە هەلگرا خەمێن وێ و دبێژیت:
دناڤ ئەسرینا د چاڤێ مندا
چپكێن بارانێ ب ئارامی خەم وێنەدكرن
چەند مە دگری تابلویەك زیندی ژێ دهات
ئافراندن و
ئەز دناڤ دیمەنێن خوەدا دكوشتم
كوشتنا هوزانڤانی لڤێرە لێگەریانە لخو، لێگەریانە ل وان هەمی بیرهاتنێن ئەو نەشیایی بكەتە راستی و یان وێ ڤیایی وێنەكێ دی و پێناسەكا دی بدەتێ، ئەڤەیە ژی ئەوا ئەم دبێژینێ بەرزەبوونا شاعران و لخو گەریانا شاعران. شاعر بەرزە دبن و شاعر خوە پەیدا دكەن و شاعر مە بەشداری وێ راستیێ دكەن یا ئەم تێنەگەهین و چ ژ ئاگەهی بیت یان بێئاگەهی، هوزانڤان یا مە بەشداری مرنەكێ دكەت، لێ نە مرنەكا بلەز، بەلكو مرنەكا دناڤ بیرهاتناندا و مرنەكا دناڤ خەیالێدا و ئەڤ مرنا وێ د شعرا خوەدا ناڤ ئینای ژی، مرنەكا ژ جورێ زیندیبوونێ یە، دەما ئەم ژ كەیفا دكەینە گری.
لێ هوزانڤان چ زوو بیت یان درەنگ ژ دەمێ خویێ دەست نیشانكری یێ تێهەلچوونان دەردكەڤیت و حەز دكەت، ببیتە مرۆڤەكا ئاساییڤە، هەروەك د قفلا ڤێ شعرێدا مە دیتی، دەما دبێژیت: (من دڤێت ژ ژورا سەرێ خوە بدەركەڤم).
وەك دوماهیەك بۆ ڤێ نڤیسینێ و ئەوێن بڤێن شعرێن جوان و كارتێكەر بنڤیسن، ئەو هوزانڤانێن دكەڤنە د زڤروكا خەیالێن خوە دا و خویێ مرۆڤ ژبیردكەن، شعرێن جوان ژ بەر وان دچن و ئەڤێن دكەڤنە د هەمان زڤرۆكدا و بیرا خوە ل خویێ مرۆڤ دئینن، شعرێن وان زوی ژبیر دچن.
*بارانەك ژ یادان، ڤیان موحەمەد، د رۆژناما ئەڤرو ژمارە (2454) یا رۆژا 30/10/2018ێدا هاتیە بلاڤكرن.
- د رۆژناما ئه‌ڤرو ژماره‌ژماره 2478 يا رؤذا 3/12/2018 دا بلاڤ بوویه.
- بۆ ئه‌ڤێن بڤێن شعرێ بخوینن.
ـ بارانەک ژیادان ـ
ڤیان موحه‌مه‌د
ل بەر پەنجەرا ھزرا من
دلوپەکێ خوە دبەژنا بایێ غوربەتێ وەرکر و
ب پێن بەندەمانێ ڤە ئالیا
ژیان و ھیڤی ل دور خرڤەبوون
پێلەکا یادێن وێرانکەر ژێ ھەلاڤێت و
چاڤێن من و ئەوران بھەڤرا تاڤی رێتن
دناڤ ئەسرینا چاڤێ مندا
چپکێن بارانێ ب ئارامی خەم وێنەدکرن
چەند مە دگری تابلویەک زیندی ژێ دھات
ئافراندن و
ئەز دناڤ دیمەنێن خوەدا دکوشتم
من دڤێت ژ ژورا سەرێ خوە بدەرکەڤم و
پەنجەرا ھزرێن خوە بشکێنم ..!!
عبدالرحمن بامەرنی
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
