Skip to Content

54 Views

گەلی زیندوو و هوشیار چارەنووس دەخولقێنێ … ئاسۆ جەلال عەبدولکەریم

گەلی زیندوو و هوشیار چارەنووس دەخولقێنێ … ئاسۆ جەلال عەبدولکەریم

Be First!
by August 14, 2019 General, Opinion
image_print


ماوەیەکی دوور و درێژە قسە و باس لەسەر گەندەڵی دەسەلات لە هەرێمی کوردستان وپێویستی رووبەڕووبوونەوەی و کۆتایی پێهێنانی بەردەوامە، بەڵام ئەوەی کە سەرنج رادەکێشێت تا ئێستا زۆرینەی ئەو هەوڵانە بۆ رووبەڕووبوونەوە بە ئاقاری حیزبایەتی تەسك یان بەرژەوەندی هەندێ وڵات و لایەنی دیکە کە مەبەستیان رووبەڕووبوونەوە و کۆتایی هێنان بە گەندەڵی نییە بە ئەندازەی ئەوەی مەبەستە سەرەکییەکەیان خودی دەسەڵاتی کوردە لە هەرێمی کوردستان و شێواندنی، چونکە کاتێك یەکێك رەخنە لە بابەتێك بگرێت ئەوا دەبێت ئەلتەرناتیڤێکی باشتر هەبێت و بێ ئەوەش ئەوا ئەوە رەخنە نییە بەڵکو تێکدانە.

یەکێك لە هێما نەگەتیفەکانی هەوڵی رووبەڕووبوونەوەی هەندەڵی لە هەرێمی کوردستان، سوود وەرگرتن لە ناڕەزایی گەلی کورد لە دەسەڵات و کەمتەرخەمییەکان و بردنی ئەو ناڕەزاییانە بە ئاراستەیەکی حیزبایەتی تەسك کە هەندێك جار”دەستی دەرەکی”شی لە پشتەوەیە، هەڵبەتە ئێمە کاتێك لە هەرێمی کوردستان باسی دامەزراوەکانی کۆمەڵگەی مەدەنی ئەکەین، ئەوا یەکێك لە هێماکانی کاڵکردنەوەی هەژموونی حیزبایەتی و خودی دەسەڵاتە لەسەر هەڵوێستی گەڵ، بەڵام ئەوەی دیارە لە کوردستان تا ئێستا ئەوەیە کە هەندێك حیزب ولایەن دیانەوێت ناڕەزایی گەل بقۆزنەوە بۆ مەبەستی خۆیان بردنی بە ئاقارێکی حیزبایەتیدا کە لە ئەنجامەکەیدا سوودی حیزبێك یان بریقە بەخشینە بە ناوێکی تازە هەڵتۆقیو، لە کاتێکدا دەتوانین بەشڵێین کە ناڕەزایی گەل بەو جۆرە دەخسێندرێت و زێاتر نائومێدی لە ناخیدا دروست دەبێت بە کارابوونی رۆڵی لەسەر کەمتەرخەمی و کورتهێنانی دەسەڵاتی کورد.

ناڕەزایی حیزبایەتی شتێکە و ناڕەزایی گەلیش شتێکی ترە ئەم دوو بابەتەش زۆر لە یەك جیاوازن، چونکە ناڕەزایی گەل گەر بگاتە ئاستی و رٶڵی پێویستی خۆی ئەوا گۆڕانێکی سەرانسەری و لە بنەڕەتەوە ئەنجام ئەدات، لە کاتێکدا کام حزب ولایەنە سیاسییانەی کە لە هەرێمی کوردستاندا هەن کارێکی وایان پێ ناکرێت، بۆیە لێرەدا پێویستە گەل خۆی لەو حیزب و لایەنانە دورر رابگرێت کە مەبەستێکی تایبەتی و نادیاریان هەیە و دەبێت بزانن کە رۆڵی گەل زۆر گەورەتر و فراوانتر وبەرزترە لەوەی کە لایەنێك یان حیزبێك بیقۆزێتەوە و سوددێکی ناڕەوا و نەشیاوی لێ ببینیت.

گەلی زیندوو و هوشیار بە ئاگا دەتوانێت چارەنووس بخولقێنێت نەك تەنها گۆڕانێکی کاتی یان دیاری کراو، گەلی هوشیار دەتوانێت وەك چاودێرێکی پۆزەتیف بەسەر دەسەڵاتەوە بێت و رێگە نەدات مافی بخورێت یان پێشێل بکرێت، ئەوەتا لە وڵاتە دیموکراتییەکاندا لە کاتێکدا ئۆپۆزۆسیۆنی کارا لە پەرلەمانەکاندا هەیە بەڵام لەگەڵ ئەوەشدا کاتێك گەل بچووکترین کەمتەرخەمی لەو ئۆپۆزسیۆنە ببینێت و بزانێت رۆڵی خۆی بەو جۆرە پێویستە نابینێت، ئەوا خۆی دێتە گۆڕەپانەوە و کاتێکیش ئەو دێت ئیدی هەموو شتەکان بەو جۆرە دەبن کە ئەو دەیخوازێت.

Previous
Next

Leave a Reply