Skip to Content

137 Views

شادی و پەژارە …. حەوسەت

شادی و پەژارە …. حەوسەت

Be First!
by August 15, 2019 General, Literature
image_print

لەماڵ دەردەچم و هەوا لێڵ و ئاڵۆزە تەمومژ دونیای داپۆشیوەو چاوم چاو نابینێ پێدەچێ گەردەلولێکی بەهێز هەڵبکات و دونیا وێران بێت. چاوەکانم دادەخەم بەهیچ جۆرێ عاقیبەتی ئەم دونیایەو ئەم سەر ئەرزە بەخێر نابینم.
هێشتان بەدوار گێژەڵوکەی ژیاندا ڕێم نەکردوە تا تەرمی زوخاوی خۆم ببینم! ڕەنگە تەرمەکەم کونجێکی تاریکی وشک و ساردی زینداندا کزو مەلول خەڵتانی خوێن بێت ، یاخود ڕەنگبێ تفەنگێکی شەڕی مرۆڤ کوژ کەهێشتان دوکەڵی گوللە تەقئوەکە بەسەریەوە مابێت و کە ئەستەم بێ ئیتر لەدەستم جیابکرێتەوە.

کێ دەزانێ؟ ئەی چی ئەگەر من کیژۆڵەیەکی دەرون ترساوی نەخۆشبم و بەتەنها هاوارکردنێک، جنێو دانێک ، چاوسورکردنەوەیەک خۆم کوشتبێ؟ ئەی چی ئەگەر گەنجێکی لاسار بووبم، لەکاتی هەڵچڕینی نەمامێکا گیانم سپاردبێ، ئەی ئەگەر بازرگانێکی تەماحکار بووبێتم و لەناو کەشتی خنکابم!؟ یان ئاهی هەتیوێک منی گرتووە کە نەیتوانیوە کاڵاکانم بکڕێ؟ خۆ ئاهی دایکێکی جەرگ سووتاویش نەبێ کە موچەکەیم بڕیوە و لەکارگەکەم دەرم کردووە؟ وتوومە بڕۆ ئیتر چایەچیم ناوێ! تۆ بڵێی ئەو هەمووە پاسەوان و پارەی بازرگانێک مردنی دوانەخات؟” کێ دەزانێ ڕەنگە هەر پاسەوانەکان منیان کوشتبێ؟ سەیرە! چەند سەیرە بۆچی من بەر لەمەرگم بیرم بۆ ئەو شتانە نەدەچوو؟ ئەی چۆن بوو دەمزانی ناوو نازناوو پیشەم چیە؟ چۆن دەمزانی غەم بخۆم؟ ئەی چی دڵخۆشی دەکردم؟ هەر بەڕاست بەچی دڵتەنگ دەبووم؟ بۆ لە مردن دەترسام؟ دایکمم خۆشدەویست؟ دایکم لەژیاندا مابوو ؟

دایکم…دایەم ڕێگای دەدام خەونەکەم بێتە دی؟ منداڵێکی بێلانە بووم یان خێزانم هەبوو؟ باشە هەر بەڕاست دەبێ من کەسێکی چۆن بوبێتم؟ چۆن لەدایک بووم؟ چۆن ژیام؟ ئەی چۆن مردم؟ ئێستە لاشەکەم لەکوێیە؟ بۆچی ڕۆحم پەڕاگەندەی سەر لاشەکانە؟ ئێستە لاشەم لەژێر خاکدایە یاخود وەکو لاشەی چۆلەکەیەکی باڵ بڕاوی لە قەفەس ڕاکردوو بەملاو ئەملادا دەکەوێ؟ من دەبێت لاشەکەم بدۆزمەوە ! سەیرە پێشتر لاشەم هەبوو، هەستم دەکرد، ئازاریان دەدام، ئەی بۆ کە ئێستا بەدەورو خولیان دێم و دەچم هیچ کەس شتێ ناڵێ؟ ئەبێ هۆکاری هەموو ئەم لێکەوتانە تەنهاو تەنها تاوانی جەستەم بێ؟یانیش ئەوەی کە…من…زیندوو بوونی من تاوان بووە؟ چۆن هاتمە ژیان و بۆچی دەژیام؟ دەزانی خۆشی مەرگ چیە؟ ئەوەیە کە ئیتر کەس نیە چاوەڕوانت بێ چیتر هیچ کەسێ دەرگاکان بە واڵایی جێ ناهێڵێت لە چاوەڕوانی گەڕانەوەتدا.

دەزانی هەموویان بۆ جەستەی سوتاوو ساردی تۆ دەگرین، ئەمما هیچ کەس ئەم ڕۆحە ساردو بێهەستەت نابینێ کەوا..کەوا بەلایانا تێدەپەڕێت و بەشداری لە خۆشی و ناخۆشیاندا دەکات.
بە نێو هەناسەی بادا گوزەر دەکەم و ئاوێنەیەک بانگم دەکات، پێمەڵێ کەتۆ ڕەنگێکی پەڕیو قژێکی ڕەشی ئاوریشمی بەهیچ شتێکەوە نەبەستراوە، جلێکی ڕەشی سەردەمیت لەبەر دەکرد، تۆ هەمیشە کەمانچەیەکت بەدەستەوە دەگرت و دەنگ و ئاوازت دەڕژایە ناو شەوەزەنگی تار،پێمەڵێ کە تۆ تاسەردەمانێک بەڕازاندنەوەی ڕۆحتەوە بردە سەر بۆیە ئێستە هەست بەشێوەت ناکەی.

تۆ کەمتر سەیری ئاوێنەت دەکرد تابزانی کێی؟نا تۆ هەرگیز سوراوی سور بەر لێوت نەکەوتوە کە تەواوی ژیانی کیژۆڵەکانی گرتووە،تۆ هەرگیز خەوت بە کەسێک نەدیوە تا ببێتە مەعشوقی تۆ نا تۆ نەت دەویست هیچ کەس هاوبەشی لەژیانت بکا یاخود گوێی لەدەنگت بێت کە گۆرانی دەچڕی، تۆ هەمیشە لەهەموان ڕاتدەکردو خۆیانت لێ حەشار دەدان دونیای تۆ هی ئەوان نەبو نە ئەوان دونیای تۆیان بوو.

کێ دەزانێ؟ خۆ ڕەنگە تۆ لاوێکی تازە پێگەییو کە هەر گیز بیری بەلای کچانی شاردا نەهاتبێ کە چۆن بەدەوری دا گوزەر دەکەن و تێپەڕ دەبن،یان تۆ بەجێی ئەوەی بێزاریان بکەیت تا بزانن کە چەندە ناخ پێویستی بەڕازاندنەوەیە، تۆ بێدەنگ دەبوویت و بێدەنگیت هەلبژارد بەهەناسەیەکی ساردەوە دەستت دەخستە ناو گیرفانی پانیۆڵەکەت و سەیرێکی ئاسمانی تەماوییت دەکرد و سکاڵای دڵی بریندارت بۆ باوەشی دایکت دەبردو ڕۆژانە دەتپرسی ئەرێ دایە چۆن من لەدایک بووم؟ واتە ئەگەر هەمان شێوەی ئەوان لەدایک بووم لەسەر هەمان قەڕەوڵ، هەمان نەخۆشخانە ،هەمان شار، ئەی دایکە بۆچی دونیای من لەوان جیایە؟ واتە نامەوێت ئەوان بم و ئەوانیش من بن وەلێ دایکە فێرم کە تا بەزمانێک قسە بکەم تا هەمووان بزانن کەمن کەڕو لاڵ نیم تەنها ماندووم! ماندووم دایکە زۆر ماندووم ،لە نێو ئەم شارەدا من لاشەیەک نابینم ڕۆحی لەبەرا مابێ، دڵم دەسوتێ دایکە!من…من دڵم بۆیان دەسوتێ! دواتر دایکت سەرتی لەباوەش دەگرت و تا خەو دەیبردیەوە ماچیەکردی.

بەمانەبێ پەژارە وادیارە تۆ تەمەنت زۆری نەبردووە کە مردووی!پەژارە تۆ دڵێکی ئاڵوواڵ بووویت لەنێو دەستێک جلی ڕەشدا،بەڵێ پەژارە تۆ هەرگیز ئەوەندە کاتت بە من نەدا تا پێت بڵم چ ڕەنگ و ڕوخسارێ یان چ ڕەگەزێک بووی، پەژارە تەمەنی تۆ لەنێوان زەردەپەڕەیەکی شادی هێن و کازیوەیەکی ئومێد بڕاودا ناتوانی بزانی تەمەنی تۆ چەند ساڵ و مانگ و ڕۆژی برد! ئێ کێ دەڵێت تەمەنمان ڕۆژو ساڵ و کاتژمێرو چرکەو خولەک دەژمێردرێت؟ تەمەنمان بریتیە لەو فرمێسکانەی کە ڕشتوومانە، ئەو حەسرەتانەی وەکو گورزە ئاگر هەمووڕۆژێ، هەموو ساڵێ، هەموو کاتێ، دڵ و جەرگمان داخ دەکەن! دڵێکی تەزیوی مات و مردوو ڕۆحێکی گەڕیدەی فەرامۆشکراوم بەشوێن جەستەی نادیارەوە سەرگەردانم! ئیتر ئاوێنە من هەروەک چۆن پێشتر تۆم فەرامۆشکرد ئیستەش گوێ بەقسەکانت نادەم و بۆم گرنگ نیە کەتۆ چی دەڵێیت! پەژارە هەروەک پێشتر ماڵاوایت لێدەکا بەر لەوەی قسەکانت تەواو کەیت ،من ئەمەم کە هەم ئەوەبووم کە بوو!کاری گەڕانم قورس نیەو تەنانەت دەتوانم لە ناو دیوارەکانشا ڕیبکەم لەوێدا من تەرمخانەیەک دەبینم بڵێی جەستەی ساردی منیش لەپاڵ ئەوانەدا نەکەوتبێت؟ نا بڕواناکەم چون من زۆر دەمێکە مردووم و ئەوتەرمانەش هەر هی دووسێ ڕۆژ لەمەوبەرن.

هەر کە لە تەرم خانەکە هاتمە دەر ئیتر لێم ڕونە کە هیچ لەوتەرمانەی ژوورەوە هی من نین. کێ دەزانێ؟ ڕەنگە لەسوچێکی ئەم نەخۆشخانەیە لەگیانەڵڵادابم و هێشتا گیانم دەرنەچوبێت،بەدەم ڕێگاوە بیرم دەکردەوە تەرمێکی سپی پۆش دەبینم ڕۆحەکەی وا خەریکە جێی دێڵێ! تاو نا تاوێ دەڕوات و بەرەو لای من دێ دوو هەنگاو دەچێتە دواوەو ئەچێ یا جەستە ساردو کزەکەی وە ئاگا بێنێ! دکتۆرەکان دەوریان گرتووەو ناتوانم چێتر بیبینم .

گوێم لێیە دەنگێک بەچرپە بە ئەوانی تر دەڵێ ئیتر با خزم و دۆستان لای سەریەوە دانیشن هەر کەسێکی ویست بۆی بانگ بکەن ئەو تەنها ۳٤ کاتژمێری ماوە ئەبێ ئەو دڵڕەقە کێ بێ وا بێبەزەییانە هەواڵی مەرگی ڕۆڵەی ئاوا بێنێ! ئا بیرم کەوتەوە ئەوە دکتۆرە ئا! چاویلکەیەکی لەسەر لووتی ڕاگرتووەو نێوچەوانی داوە بەیەکدا و بەدەنگێکی ئابڕو بەرانە بەم دایکە جەرگ سووتاوە دەڵێ کە ئارام بگرێت و بێ دەنگ بێ نەبادا کەش و هەوای نەخۆشخانە لەبار چێ! بەجێی ئەوەی شادیەکەمت پێ چارە ناکرێ دەنگم بەسەردا بەرزەکەیتەوە دکتۆر؟! شادیەکەم…تاقانەی دایە وەی هەموو کەسم ڕۆ، وەک سنەوبەرێکی لە ئەرز چەقیو لەگەڵ ڕەشە بادا بەملاو ئەولا دا دەکەێ ئەم دایکە بەستەزمانە نەهۆش بەسەریەوە ماو نەفرمێسک لەچاوەکانی قەتیس دەبوو هەرچی کردیان و کردیان بۆیان ژیر نەدەبویەوە هەرچی دەیانکرد لەناوی شادی و ڕۆ ڕۆ بترازە قسەیەکی نەکرد شادیەکەم! شادی.. بۆ کوێ دەڕۆی دایەگیان؟
ئاخر تۆ بەم بچوکیەتەوە سەرماتە بێ چۆن دڵم بێ بەتەنها لەو شوێنە ساردو تاریکەدا جێت بهێڵم،هۆ ڕۆڵەکەم تۆ کەی ئەوەندە گەورەبوویت کە لەمن جیابیتەوە و ماڵت بچێتە گۆڕستان؟! ئەی خودا ئەی خودا ئەمە شوێنی ئەو نیە! باشتر لەمن ئەوە دەزانی بەڵام تۆ ئەوەندە کچەکەمت خۆشەوێ تەنانەت بەم ناوەختە دەیبەیتە لای خۆت دەزانم خۆشت ئەوێ دەزانم ، خۆزگە بۆ دایکە دڵ سووتاوە کارێک دەکرا ئاخر بڵێم چی چما کەس لەڕوی دێ پێی بڵێن چیتر مەگری؟ ئای دونیا تۆ چ زاڵمێکی ڕەحمت بۆ مەزڵومێک نیە! هەنگاوێکی تر دەچمە پێشەوە ڕوخساری هەرزەکارێکی زەردهەڵگەڕاو دەبینم کە ئەستەم بوو ڕەنگی ڕوخساری لەڕەنگی پرچی جیابکەیتەوە، جلێکی ڕەسەنی سپی پۆشیبوو تەنانەت دەنکە گەردێکی ڕەشی لێ نەنیشتبوو.

چەند سەیرە! بەم نیگاو شێوازە ڕێک لە فریشتە بێتاوانەکان دەچوو، تاو ناتاوێ ڕۆحەکەی لە جەستەدا دەردەهاتوو دواتر دەگەڕایەوە شوێنی خۆی هەر کاتێکیش کە ئەمە ڕوی دەدا شادی هەستی بە ناڕحەتی و ئازارێکی زۆر دەکرد، دەگریاو هاواری لە دایکی دەکرد ، تادایکی بەچاوی پڕ فرمێسکەوە کە لەچاوانی دا قەتیس ببون وەلێ دڵی نەهات لە بەردەم کیژۆڵەکەیدا بیانڕێژێت بەزەردەخەنەیەکی پڕ ئازارو قوڕگی پڕلە گریانەوە دەستی دەگوشێت باشتر دەبی دایەگیان باش دەبی کەمێکی تر سەبر بگرە خودا ئاگای لێمانە تەنها من دەزانم کە ئەو چەندە تۆی خۆشەوێت چیتر فرمێسکەکانی بەرگەیان نەگرتوو ڕژانە سەر زوڵفە ساردو بێهەستەکەی شادی ، بۆ ماوەی هەفتەیەک ئەبێت لەسوچێکی نەخۆشخانەدا کەوتووەو چاوی لەسێبەری دایکیەتی و گوێیەکانی هەردەم کراوەبوون بەخاتری هەواڵێکی خۆش کە ژیانی بۆ بگەڕێنێتەوە بەڵام بەداخەوە زوبانی دکتۆرە دڵڕەقەکان،نەک هەر هەواڵێکی خۆشیان نەهێنا بگرە بە چەند نیگایەکی ژەهراوی پێیان دەوت کە ئیتر بوون و نەبوونی تۆ هیچ لەم دونیا ناگۆڕێ جا ئیتر ئەوەت لەسەرە کە بەرۆکمان بەردەی! ئەوە بۆ جاری سێیەم دەچێ کە ڕۆحەکەی دەبینم لە نێو حەوشەی

نەخۆشخانەدا دێت و دەچێ بەم هاتنو چوونەی تەواو هەراسانی کردم، چیتر خۆم بۆ نەگیراو ویستم پەلاماری بدەم بەڵام ئەو زۆر بە هێواشی دەستی کردە سەر شانم و بە زەردەخەنەیەکی زۆرزانانەوە تۆ چیتە ئەی دۆست؟ بەم سەرو سیماتەوە وەک باڵندەیەکی پەڕاگەندە دەچی چیتە تۆ ڕاوچی هێلانەتیان تێکداوە یاخود ڕێوی بێچوەکانتی خواردووە دواتر ڕوی لەمن وەرگێڕاو ڕوی کردە ئاسمان و دەستەکانی ڕوەو ئەوێ بەرز کردەوە ”ئاخۆ تۆ چۆنەبێ لەم جەنگەڵە فراوانەدا هێلانەیەک بۆ خۆت نەدۆزیەوە؟” من کە ئیتر نەمدەزانی باسی چیدەکات بۆچی وا خەریکە بەزمانی هێماو نیشانە لەگەڵ من بدوێ؟ دەتوانی دەردەکەت بە من بڵێی بەڵکو دەوایەک بزانم بەزەردەخەنەوە ڕوی کردەوە من.

گوێ بگرە من نازانم تۆ چ شتێکی بێ سەرو بەر ئەڵێی بەڵام واز لە من بێنە بۆچی ئەوەندە ئازاری جەستەی شادی دەدەیت؟ بۆ بەیەکجار لێی دەرناچی و جێی بێڵی بهێڵە با ئەویش ئیسراحەت بکا ئەو هەمووە وێڵی و سەرگەردانیەت بۆچیە؟ ئەمجا دای لە قاقای پێکەنین و نزیکتر بووتەوە دەستی کردە سەر شانم کەواتە هاتووی فێری ژیانم بکەی؟ نەخێر من هاتووم تا پێت بڵێم کە تۆ ڕۆحێکی ئازادیت و لەناو جەستەیەکی بێواتادا بەند کراوی کە هەمووان مەرج و سنورت بۆ دادەنێن ئەی ئێستە بۆچی نایەی لەگەڵم تا پاشماوەی ڕۆحە بەجێماوەکان جەستە ساردو سڕەکان کۆ بکوینەوە تا چیتر ڕۆحیان بە شوێن جەستەدا پەڕاگەندە نەبێت؟ من فەرمانم پێکرا بێم ڕاستەوخۆ هاتم ئێستە کەی فەرمانی دەرچونم دێ لە ناو جەستە تا ئەو کات لەوێ دەبم هەنگاوێک گەڕایەوە دواوەو خودا حافیز ئەی دۆست بڕۆ بزانە هێلانەکەت لەکوێیە بیدۆزەوە! بەڵام خۆ تۆ هەر نەتزانی من کێم؟ بۆچی دەگەڕێم! کێ دەزانێ ڕەنگە تۆ کلیلی دەرگا داخراوەکەی من بیت ئێ نەتبیستووە کە دەڵێن دەرگا داخراوەکان تەنها بەکلیلی خۆیان دەبنەوە.

ئەی بۆچی من لەدەرگا داخراوەکان ناترسم ؟ ئەوکات زیاتر لێم نزیک دەبوویەوە هەستم بە ترسێکی بێوچان دەکرد، بەدەنگێکی لەرزۆکەوە کەخۆشم نەمدەزانی چۆن دەنگم لە قوڕگم دێتە دەرەوە لێم پرسی ئەی ئەگەر ڕۆژێک هاتوو هەموو دەرگاکانت لەسەر داخران چی دەکەی؟ تۆ نازانی! من قەڵاکەم لە ئاسن و دەرگاکانم لەشوشە دروستکردووە تا کاتێ کلیلەکانم ون کرد دەرگاکان بشکێنم و ڕابکەم بۆیە ئازیزم من لەهیچ قوفڵ و دەرگایەک ناترسم.

بیکە بەخاتری خودا من لە تۆ هیچ تێناگەم! لەپڕا کە ئاوڕم دایەوە لەهیچ شوێنێ دیار نەمابوو، کەڕۆشتمە قاوشی نەخۆشخانەکە بینیم کەوا بەسەر سەری شادیەوە وەستابوو سەبر بگرە ئەوەندەی نەماوە هەر دوسێ ڕۆژی تری پێدەچێ ئەو دەمرێت و منیش لەگەڵتدا دێم تا خۆت دەدۆزیتەوە یارمەتیت دەدەم من دەزانم کە دەبێ بۆ کوێ بڕۆی.
لەخۆڕا نیە کە هەمووان بۆتۆ هاتوونەتە هەژان شادی وەک بڵێی گەردەلوولێکی بەهێز هەڵی کردبێ و هەمووان وەک سنەوبەری باهەژێن بۆت بەملاو ئەملادا دەچن و دێن بۆت ڕۆ ڕۆ دەکەن سەیرە چۆنەبێ جیهان کەسێکی وەک تۆ لەدەستبدا؟ چ کارەساتێکە کەسێکی وەک تۆ دەمرێ و خوێن مژێک لەویادا هەندێکی تر دەمژێت و ئەکێک ڕۆحی ئەوی تر تێکدەشکێنی ، کەسێک لەسەرەمەرگا لێوانلێوە لەشادی و کەسێکی تر تکا دەکا کاتی زیاتری پێبدەن تا بتوانێ هەڵەکانی ڕاستکاتەوە یان هیچ نەبێ چێژێک لەو پارەیە ببینێ کە بەتەواوی ژیانی جگە لەوە بیری بەلای هیچی ترەوە نەبو،جا کەسێک هاوارەکاو دەڵێ من بەسەر ژیانی ئەوانی ترەوە چاودێربووم و نەم زانی ژیانی من چۆن بەڕێکرا ،یەکێ ئەڵێ ئاخر من سێ ئەوەندەی ئەوانی ترم دەزانی چۆن دەکرا کە وەکو ئەوان بم یان ئەوان یەکسان بن بە من یان من یەکسانم بە ئەوان؟ چ بێ ئاگا لەوەی ئەوان تۆن و تۆش ئەوانیت جا کێ دەڵێ تۆ ڕاست و ئەوان هەڵەن؟
وای دونیا تۆ سەرابێکێ بێئاگایانی. ئەوا بۆ سێ ڕۆژ دەچێ هیچ هەواڵێک لەشادی نیە بەدیقەتەوە چاوم چوەتە سەر ئەوکانیاوەی کە تاو نا تاوێ چۆڕاوەکانی زیاد دەکات تا وای لێدێ بەڕادەیەک وشکەبێ کەکۆتا دڵۆپ دڵۆپەکانی دێنە خوارەوەو هیچی تیا نامێنێت سەیرە ئەم دڵۆپە ئاوانەو ئەو مرۆڤانەی ئەمڕۆ مردن چەندە لەیەک دەچن؟ بەدەم نیگای منەوە بۆ زەردەپەڕەی ساوا شادی دەرکەوت وەک بڵێی باڵندەیەکی باڵ بڕاو بێ یان شێرێکی لەقەفەس ڕاکردوو بەبێ دەنگی تا درەنگانێکی شەو بێ ئەوەی یەک وشەش قسە بکەین بەدیار یەکەوە وەستا بووین، من کە چیتر خۆم بۆ نەگیراو دەمویست لێی بپرسم کە ساتەوەختی گیان دەرچونەکەی چۆن بووە بەڵام ئەو بە ئاماژەیەک دەستی هەڵبڕی و منی وەستان و پێ وتم لەگەڵ کازیوەی بەرەبەیاندا دەست بەگەڕان دەکەین بەشوێن لاشەکەمدا بۆیە تا ئەو کاتە من بۆم نیە دەنگم ببیسترێ، منیش بە سەر لەقانێک پێم وت باشە.

سەیری ئاسمانی تارم دەکرد و یەک یەکە ئەستێرەکانیم دەژمارد چ گەشتێکی خەیاڵی و جوانە تۆ بڵێی بۆچی ئەم کارەم نەکردبێ بەر لە مردنم تۆ بڵێی بەشی ئەوە کاتم نەبووبێ؟ یان من کاتم زۆر بووە و نەمزانیوە چی بکەم! ئای خودا دونیا چ لاشەیەکی پەککەوتووە کە ئەگەر بەرزی نەکەیتەوە بەرەوخۆی پەلکێشت دەکاو تۆش ئیفلیج دەبی.
وا بەرەبەیانەوە لەودیو چیاوە دوکەڵێکی ڕەش دەبینم پێ دەچێ تەپ و تۆزی شەڕ بێ و دونیای تەنیبێ پەژارە پێویستە کە تۆ بچیتە قەد پاڵی ئەم چیایە لێم مەعلومە ئەشێ لاشەی تۆ لەنێو تەرمی سەربازانەدا کەوتبێ شوێنم کەوە تا نیشانت دەم، تۆ بڵێی دونیا چ زوڵمێکی لێکرابێ بە لەدەستدانی تۆ شادی؟ گوێ بگرە پەژارە هیچ کاتێ زوو نیە بۆ هیچ شتێ وەکو ئەوەی کە درەنگیش نابێ هەموو شتێ لەکاتی خۆیدا دێ سەبارەت بە جیهانیس هیچ خەم مەخۆ پەژارەی ئازیز من دەمێکە پەیامی خۆمم پێگەیاندوون ئیتر ڕەنگە بوونی من لەوێدا ناپێویست بێ.

سەد خۆزگە بەخۆت شادی ئازیزم هیچ نەبێ تۆ دەزانی کە کێ بووی بۆ چی ژیات و بۆچی مردی هیچ نەبێ خۆ دەتزانی چ سیماو شێوەیەکت هەیە هیچ نەبێ دەزانی کە تەرمەکەت لەکوێ نێژراوە، دەزانی چی ئازیزم من بۆ جارێکیش بێ نە ڕومکە کردە ئاوێنە و نە زانیم چ سیماو نیگایەکم هەبوو.
ئەوەی بوو وێڵی و سەگەردانی من بوو بە شوێن خۆمدا وەلێ بۆجارێکیش بێ خۆمم نەدۆزیەوە، من لەنێوان ئەوانا خۆمم لێ ون بوو لەزیاتی خۆم هەمووانم دۆزیەوەو خۆمم لە ناو تاریکایی چەرمی دونیادا لێ ون بوو. باشە کێ دەڵێ چونە ناو تاریکی ون بوونە کێ لە نێو تاریکیدا ون دەبێ؟ئازیزم پەژارە مۆمەکان بە دانەگیرساوی لەگەڵ تاریکایی شەودا جیاوازییان نیە جا خۆشبەخت ئەو مۆمەیە کە بەر لە هەمووان دەسوتێ و ئەوانی تر دادەگیرسێنێ سا ئەگەر هەمووان داگیرسان تۆ پێویستە خامۆشبیت و ببە بە تاریای شەو دەوریان بدەیت تا جوانتر بدرەوشێنەوە.
شادی ئازیزم! لەنیشتیمانی مندا چراکان بەدەست کاڵفامەکانەوەن بۆیە بەر لە گەیشتن بە ئامانج پێش گەیشتنی کازیوەی بەرەبەیان لەتایکی شەودا لەنیوەی ڕێگادا دەکوژێنەوە، پەژارە بەڵام تۆ شتێکت لەبیر کرد کە چرای ڕاستەقینە هەرگیز نابێتە مەشخەڵی دەستی کاڵفامان شا پەژارە بۆچی دەبێ نیشتمانی تۆ لەگەڵ نیشتمانی ئەواندا هاوتا بێ کە تۆ چرا بیت و ئەوانیش تاریکی؟بزانە ئەی دۆست من لەپێناو هەموواندا ون بووم کەچی من لە گەل هەمووان منمان ون کرد. نا تۆ ون نەبووی تۆ لەنێو ئەوانا توایتەوە… تۆ دوور کەوتبوویەوە لەخۆت پەژارە لەهەمووان نزیک بیتەوە شێتیە لەخۆت دووربی! ئینجا پێم بڵێ تۆ بۆچی چوییە ئەوشەڕە؟
پەژارە: چون ئەگەر نەچووبام وەکو کو ئەوانی تر دەبووم بە بەندە تەوق لە مل و زنجیر لەدەست دەبووم هەرگز هەوای ئازادیم هەڵنەدەمژی!

شادی: ئینجا کێ دەڵێ کۆیلەکان زنجیر لەدەست و تەوق لە ملن؟ تۆ نازانی پەژارە بە چونت بۆ شەڕ نەخۆت و نە هیچ کەسێکت ئازاد نەکرد! بگرە تۆ بەرگریت لە خوێن مژو خوێنڕێژان کرد، ئەوان ئیستە بە کۆمەکی تۆ بەردەوامن لە خوێن مژین! دواتر تۆ دەبوو بهێڵی بتخەنە نێو قەفەس و تەوقت لەمل بکەن تاکو ئازاد دەبی!
پەژارە: بەڵام دلنیام کە تۆ هەڵەیت شادی ئازادی چۆن لە نێو قەفەزدا بەدی دێ کاتێ کە مرۆڤ هەوڵی بۆ نەدابێ و لەناو سوچێکی بەندیخانە وەکو مشکە کوێر خۆت حەشار بدەیت تاکو نەتکوژن؟
شادی: ناحاڵی تۆ ئەی دۆست گەلێ ناحاڵی، دەزانی هەرکات ویستیان دەست و ملت ببەستن خۆشحاڵ بە چونکە نەیانتوانیوە دەست بەسەر جیهانی ناوەوەتا بگرن ئەمە تاکە شتیکە لەدەستیان بێ تۆ کە مێشکت ئازادە تەوق و قوفڵەکانت دەشکێنی!، بەڵام هەر کات دەستیان نەگرتی ئەوکات تۆ دەبێ بترسی چونکە ئەو پەتە نادیارەیان لە ملکردووی کە هەرگیز ناپچڕێ !

پەژارە: باشە دەبوو من تەماشام کردبا کە تاقمێک بەبەر چاوی خۆمەوە تەوق لە مل و کەلەپچە بەدەست ڕاپێچی یەخسیری بکرێن ئەوان مرۆڤن مرۆڤ تۆ نازانی مرۆڤ بۆ ئەوە دروست کراوە تا ئەرکی بونەوەرانی تر بگرێتە ئەستۆ نەوەک لە نێو قەفەس بەند بکرێت
شادی: بەڕای تۆ ئازادی تەنها بۆ مرۆڤە؟ یاخود تەنها مرۆڤ بۆی هەیە لەدەرەوەی قەفەسدا ژیان بەڕێ بکات
پەژارە: نەخێر! بێگومان خودا هەموو بونەوەرانی تری بە ئازادی دروست کردووە ئەواتە دەبینین باڵندەکان بەسەرمانەوە دەفڕن و ماسیەکان لە ئاوا مەلە دەکەن هیچیان لە ناو قەفەسا نین!
شادی: بەڵام لەسایەی مرۆڤەوە هیچیان ئازاد نین! هەموویان سنووردارو کۆت و بەند کراون، من نازانم ئەگەر کتێبە کۆنەکان مرۆڤیان بەو پیرۆزیە وەسف کردبێ بەڵام لە ئێستادا مرۆڤ دڕەندەترین بونەوەرە کە زوڵم لە تەواوی گیاندارانی سەر ڕوی زەوی دەکا
پەژارە: باشە تۆ سەبارەت بە مرۆڤ بوونت ڕات چیە؟
شادی: کە جیهانی ڕاستەقینەیان دەبینم حەسرەت دەکێشم ،کە چەوساوەیەک،زوڵم لێکراوێ، یا ئاژەڵێکی بریندار دەبینم لەناخەوە شەرمەزارم!
پەژارە: ئەی دەبێ لەگەڵ یەکتریدا مەمەڵەیان چۆن بێ؟
شادی:کەسێ قەفەسێکی زێڕین دروستەکا ئەوە تا کەسێکی تری پێ لەبەند بکا بۆیە ئەستەمە ئەو دیلانە ئازاد بکایت کە کەلەپچەی زێڕیان لەدەستا بێ، ئینجا تەواوی ژیانیان دەبێتە سەرابێک.
خویان داوەتە ماددە پەرەستی و هیچ ڕۆ‌‌حێکیان بەبەرەوە نەماوە، ڕاستە کە ئەوان لە گیانی خودایان پێبەخشراوە بەڵام کە ئەمە سیفەتی گیانە کە پەراوێزت خست ئیتر بە ئاگا نایەتەوە لەزیاتی ئەوەی ڕاچڵەکاندنی ئەو تۆ ڕادەچڵەکێنێ.
سەختە بۆ بەندەیەک دەست لەکەلەپچەی زێڕین هەڵگێت و چەندە زەحمەتە بۆیان تا لە تام و چێژی ئازادی لەززەت بکەن، نا ئازیزم ئەم جۆرەیان ئازادی خودا پێدراوی خۆیان لەپێناو چەند ماددەیەکی بێبایەخی کاتیدا دەدۆڕێنن ئەوان ڕێک لەو قومار بازە دەچن کە هەمووشتێکیان لەسەر مێزی قومار دادەنێن و دواتریش زۆر گەمژانە خوێنیشیان دڵۆپ دڵۆپ دەچێتە سەر ئەو مێزە جا ئازیزم خۆشەویستیان زیندانێکەو یاکتری لەبەندێ دەکەن، دۆستایەتیان بێ کەڵکیەو لە هەنگاوی دووەمدا پشت تێدەکەن، دوژمنایەتیان بێ عەقڵیەو بەتەنها جوڵەیەکی بەرژەوەندی دەست دەکەنە ناو دەستت!
وا ئێمە بەدەم قسە کردنەوە ئاگامان لە ڕێگا نەماوە کەوا خەریکە دەگەین بە لوتکەی چیاکە ئەو شوێنەی دوکەڵی لێبەرز دەبێتەوەو بۆنی لاشەی سوتاوی لێ دێ.
شادی: لاشەی کەسێکی بەتەمەن دەبینم بە ملوانکەو کەرەسە سەربازیەکانی بێت کەسێکی پلەداری بەرزەو تەرمەکەی لێرە فڕێ دراوە
پەژارە: ئای خودایە! ئەمە مەنسورە سەکردەی سوپا حەیف! سەد حەیف بۆ ئەم قارەمانە دەستی دوژمن بشکێ!
شادی بەزەردەخەنەیەکی زۆرزانانە ڕوی کردە پەژارە: بەڵام ئازیزم… دوژمنەکانت ئەویان نەکوشتووە بەڵکو هاوڕێکانی تۆ دوای تەواو بوونی جەنگ زانیویانە کە بوونی سەرکردەیەکی وا مەزن ڕێگری لەدەستکەوتەکانیان دەکا لەشوێنێکی وا بێدەنگ تۆ نازانی ئەوە دۆستەکانمانن کە ئەوەی هەمانە لەدەستمان دەردێنن و خوێنمان دەمژن و تاوانی مەرگیشمان دەکەوێتە ئەستۆی دوژمنە مەردەکانمان!
پەژارە: حەیف ئەو دونیایە لە دۆستێکی بێ پایانی وەکو تۆ بێبەشی کردم !
شادی: دونیا بێبەشی نەکردی تۆ خۆت کەوتیتە دوای ڕێکوێران و ون بوویت نابێت تاوانی خۆت بکەیتە ملی دونیاو زەمانە ماڵاوا ئەی دۆست خۆشحاڵ بووم دوای مردن تۆم بینی.
پەژارە: بەڵام ئەی کوا بەڵێنەکەت خۆ هێشتان لاشەی من نادیارە!
شادی: وا نەزانی من بێبەڵێن بم شوێنم کەوە ئەی دۆست لەسەر گردەکە گۆڕستانی بریندارانی جەنگی لێیە وا ئێستە خەریکن تەرمی من و تۆ لەوێ بەخاک دەسپێرن
پەژارە: بەڵام خۆتۆ لە جەنگدا نە کوژرای بۆ دەبێ لەوێ بت نێژن؟
شادی: چونکە جەنگ وەکو گەردەلوول وایە کە ڕوی کردە شوێنێک ئیتر هەمووان بەبێ زیاد و کەم ڕاپێچ دەدا ئیتر ئەوە تۆیت و خۆت بدۆزەوە!
دوای بەخاک سپاردنیان ناوی گۆڕستانەکە لە جەنگەكستانی جەنگەوە گۆڕا بۆ شادی و پەژارە لەدەروازەی گۆڕستانەکەشدا لەسەر بەردێکیان هەڵکەندبوو:
”تۆ دڵت لەکۆت و بەند ئازاد بکە و واز لە تەوقی ملت بێنە تا کڵپەی ئازادی ناخت گڕ بگرێت دەستت ڕوەو ئاسمان هەڵبڕەو هەرگیز باوەش بە زەویدا مەکە”

Previous
Next

Leave a Reply