Skip to Content

پەیامەکانی  ئەم دواییەی ئۆجەلان و چەند سەرنجێك* … زاهیر باهیر

پەیامەکانی ئەم دواییەی ئۆجەلان و چەند سەرنجێك* … زاهیر باهیر

Closed
by ئاب 20, 2019 General, Opinion



من هەر نەك تەواو پشتگیریی پەیامەکەی ئۆجەلان دەکەم، گەر چی ئەم پەیامە زۆر درەنگکەوت، بەڵکو هیواداریشم کە ناوەرۆكی پەیامەکە بکەوێتە کار.
لەسەرەتای دەستپێکردنەوەی شەڕەوە لە باکور, من بە پەیامەکانی سەر فەیسبوك و وتار و نوسینەکانم و وتووێژ و قسەکردنم، نەك هەر لەگەڵ ئەو شەڕەدا نەبوم بەڵکو ئەوەندە دژی بووم بە تەواوکەری سیاسەتی دەوڵەتی فاشی تورکیام زانیوە لە وێرانکردنی باکور و بەشێکی باشوور و لاوازکردنی پێگەی بزوتنەوەی ڕۆژاواش.
پەیامەکانی ئۆجەلان زۆر هەر یەکجار زۆر درەنگ هات، لەگەڵ ئەوەشدا گەر سوودێکیشی نەبێت، ئەوە نیشان دەدات کە کورد لە باکور خوازیاری شەڕ نیین، ئەمە جگە لەوەی کە هەڵوێستی ڕوونی ئۆجەلانیش، کە ماوەیەکی درێژبوو لە گومانا مابوەوە لای ئێمە، ئێستا بە ڕاشکاوانە ئاشكرایکرد کە شەڕ و بەردەوامیدان بە شەڕ نامانگەیەنێتە هێچ شوێنێك و ئەوەشی کە بە ئاشتی بەدەستهێنراوە و بەدەستدەهێنرێت، بە شەڕ لەدەستچووە و لەدەستدەچێت.
سەرەڕای گرنگی و بەبایاخی خودی پەیامەکان بەڵام هشێشتا دەلاقەیەك کراوەیە تاکو لەوێوەی چەند سەرنجێگی گرنگی لەسەر بدرێت و ڕەنگە سەرسامبوننیشمان بڕەوێنێتەوە.

ئایا ئۆجەلان لەگەڵ شەڕدا بوو؟

من هەرگیز باوەڕم بەوە نەبووە کە ئۆجەلان لەتەك شەڕدا بووبێت. ئەوەی ئاگەداری هەڵوێستی ئۆجەلان و خوێندنەوەی نوێی ئۆجەلان بۆ بارودۆخەکە بێت و لە نزیکەوە پرۆژەکەی ئۆجەلان کە یەکسانی جێندەیی و کۆنفیدرالیزمی دیمۆکرات و ئیکۆلۆجیە، بزانێت، دەرك بەوە دەکات یا ئەو دروشم و پرۆژانە بەتاڵ و بێ گیانن یاخود دەبێت حیزب و بزوتنەوەی چەکداریی پەلبەستبکرێت تاکو ئەوانە جێبەجێبکرێت.
ئۆجەلان سیاسسیەکی گەمژە نییە. ئەو بە وردی و زۆریش بەوردی خوێندنەوە و توێژینەوەی لەسەر کوردستان و ناوچەکە کردووە، ئەو دەزانێت بوونی حیزب هەر جۆرە حیزبێك، هەروەها هەبوونی شەڕ لەگەڵ هەر لایەن و دەوڵەتێکدا، نەك هەر لەتەك پرۆژەکەیدا نایەتەوە بەڵکو دژیشن پێی. واتە لە هەر شوێنێک شەڕ و بەردەوامدان بە شەڕ هەبێت، ئەوە قسەکردن لەسەر ئەو پرۆژەیە قسەی ڕووتە و قسەش ناچێتە گیرفانی کەسەوە و هەوڵەکانیش لەو بارەدا نەزۆكدەبن . هەر ئەمەش بوو کە جەدەلی گەورەی لە کۆنفرانس و دانیشتنە گەورەکانی ڕیزەکانی پەکەکە دروستکرد و هەمیش ئاشتیخوازیی و ڕاگرتنی شەڕی یەکلایەنەی لەگەڵ خۆیدا هێنا.

نامەکانی ئۆجەلان چ پەیامێك دەدەن؟
یەکەم: لە نامەی یەکەمدا هاتووە ” ئەو دەتوانێت تەواوى کێشەکان چارەسەر بکات و کۆتایى بە ئەگەرى شەڕ بهێنێت لەماوەى یەک هەفتەدا” وردکردنەوەی ئەم پەیامە ئەوە دەگەیەنێت، کە ئەو تاکە کەس و مەرجەعی باڵایە بۆ دانی بڕیارە گرنگەکان و دەتوانێت بێ پرس و تەدبیری سەرانی پەکەکە ئەم کێشە گەورەیە لابەلابکاتەوە. پرسی دیمۆکراتییەت لێرەدا بزرە. یاخود ئەو دەزانێت کە سەرانی پەکەکە یا زۆرینەیان لەگەڵ شەڕدان و لای ئەوان شەڕ ئەگەر وێرانکاریش بێت لە دانیشتن باشترە، لەم بارەشدا پێویست بەوە ناکات کە پرسیان پێبکات بەڵکو بڕیاری خۆیی و سەپاندنی باشترین حەلێکە.

دووەم: گەلێك لە ئەندامانی پەکەکە هەتا لە پلەی باڵادا و لایەنەگرانیشی زۆر بەگەرمی پێشوازی ئەم بانگەوازەی ئۆجەلان دەکەن، بە هەنگاوێکی زۆر باش و دروستی دەزانن و شیکردنەوەی ئەرێیانەی بۆ دەکەن ئەمەش بۆ من یانی ڕەخنەکردنی شەڕەکەیە و گۆڕینی تاکتیك و ستراتیجییەتی پەکەکەیە. ئا لەم بارەدا دوو پرسیار دێتە پێشەوە. یەکەم: باشە خۆ ئەم برادەرانە دەنگ و ڕەنگ وەزنیان لەناو پەکەکەدا هەیە و لە دەرەوەی بەندیخانەشن کە دەبێت بارودۆخەکە باشتر ببینن، کەواتە بۆچی دوای زیاتر لە 4 ساڵ ئەمان هەست بەوە دەکەن کە پێویستە شەڕ ڕاگیرێ و پرۆسەی ئاشتیی بەگەڕ بکەوێت و ئەم شەڕە یەکجار زەرەرمەندە نەکەن و ئەم هەمووکەسە نەبنە قوربانی و ئەم هەموو شوێنە وێران نەکرێن و ئەم هەموو خەڵکە لە زێدی خۆیان هەڵنەکەنرێن و ئەم هەموو دەسکەوتە گەورەیەی کە بەدەستهێنرابوون لە دەستنەچن؟! باشە پاساوی بەردەوامیدان بەم جەنگە وێرانکاریییە چی بوو؟ ئایا بستێك بزوتنەوەی پەکەکە و کێشەی کوردی باکوری بردە پێشەوە یاخود بۆ سی ساڵ بردییە دواوە؟ ئایا ئەمە لێدان بوو لە پرسی کورد لە باکور و لە بزوتنەوەی جەماوەریی لە خودی باکور و تورکیا، یا دەستکەوت بوو؟ دووەم: ئەی بۆچی لە کاتێکدا کە من و زۆرێکی ترمان کە دۆستی نزیک و هاوپشتی کوردانی باکور و ڕۆژاواین و هەر لە سەرەتاوە دەمانزانی وەڵامی ئەردۆگان بە شەڕی چەکداریی بە دەردی ئێستای کورد ناخوات، کەچی لە باشترین حاڵەتدا ناڕەزاییدەربڕین بوو بەرانبەر بۆچونەکانمان و شەڕەکەیان بە شەڕی بەرگریی دەدایە قەڵەم و لە خراپترین حاڵەتیشدا جار جارە تاوانبارکردنمان بوو بەوەی کە خودی ئەو برادەرانە خۆیان ئارەزوویان دەکرد؟
ئەنجامگیریی:
ئەوە ڕاستیە کە ئاکەپە و خودی ئەردۆگان و تەواوی دەوڵەتەکەی لە قەیرانێکی گەورەدان، بەڵام هەر وەکو پێشتریش وتوومە پەکەکەش لە قەیرانێکی زۆر گەورەدایە**. ڕووداوەکانی ئەم چەند ساڵە ئەوەی سەلماند کە سیاسەتەکانی ئەردۆگان لە بەرانبەر دۆست و دوژمنەکانیا، یەکجار سەرکەوتووبووە و سیاسییەکی بە توانا و بە ئەزموونە و حساباتی وردی دوورمەدا بۆ هەموو هەنگاوەکانی دەکات. ئەو ئەوەندە زیرەکانە هەنگاوەکانی ناوە،کڵاوی لەبانسەری هەمویان ناوە هەر بە داعش و بە حکومەتی هەرێم و بەشێکی زۆری گەلی تورکیا و ئەمەریکا و وڵاتانی ڕۆژاوا و و وڵاتانی دەرودراوسێش..

چەندێك ئێمە لە سۆز و ویست و ئارەزووەوە دژ بە دەوڵەتی فاشی تورکیا،بنوسین و قسە بکەین ئەو ڕاستییە ناگۆڕیت کە تورکیا لە پێگەیەکی بەهێزدایە و پەکەکەش لە پێگەیەکی زۆر لاوازدایە. ئۆجەلان ئەم ڕاستییە دەزانێت ئەگەر ئاگربەستییەك نەکرێت ئەوە تورکیا بەو پرۆژەیەی کە پلانی بۆکردووە زۆرێك لە ڕۆژاوا داگیردەکات کە دژ بە خواست و یستی کوردە لەبەرئەوە ڕاگرتنی شەر و سازشکردن لە تەك دەوڵەتی تورکیادا باشترین پلانە تاکو هەرچۆن هەیە لە ماوەیەکی دوورو درێژدا بتوانرێت ئەوەی کە پێش شەڕەکە بەدەستهاتبوو، بەدەستبێتەوە، لە ماوەیەکی زۆر درێژتردا بتوانرێت هەوڵی جێ بەجێکردنی پرۆژەکەی ئۆجەلانیش بدرێت.

ئەمە جگە لەوەی کە ئاگربەستی پەکەکە و وتووێژ لە تەك دەوڵەتی تورکیادا، مەترسی هێڕشی تورکیا بۆسەر ڕۆژاوا دەڕەوێنێتەوە و ڕەنگە پرسی کشانەوەی هێزی تورکیا لە عەفرین لە قۆناخی دووەمی وتووێژدا بخاتە سەر مێزی دانوستاندن لەتەك تورکیادا. سەرەڕای ئەمانەش نەبوژانەوەی داعشیش ئەگەری ڕوودانی دەبێت. زیاتریش لەمانە هێڕشی تۆپ و تەیارەی دەوڵەتی تورکیا بۆسەر قەندیل و دێهاتەکانی بناری و هەروەها هاوپەیمانێتی تورکیا و ئێران و حکومەتی هەرێم ڕەنگە عێراقیش لە پلانی هێڕشکردنیان بۆسەر پەکەکە، ئەگەر کاتیش بێت، لەباربچێت.
بەڕای من ئاکەپە و ئەردۆگان پەلەیان نییە یا رەنگە زۆر بە جددی ئەو بانگەوازەی ئۆجەلان وەرنەگرن، ئەوەش لەبەر بەهێزی پێگەیان و لاوازی پەکەکە کە لەم بارەدا ڕەنگە پیویست بێت کە فشار بخریتە سەر ئاکەپە تاکو بە پیر ئەو بانگەوازەوە بچێت، دیارە جۆری ئەم فشارانەش زۆرن و لە زۆر کەناڵەوە دەتوانرێت بخرێنە سەر دەوڵەتی تورکیا. هاوکایش ئەگەر تورکیا هەر ئامادە نەبێت، وەستانی شەڕ، یەکلایەنە لای پەکەکەوە، هێشتتا لە سەدا هەزار لەو شەڕە دۆڕاوە باشترە لەبەر ئەو هۆکارانەی کە لە سەرەوە ناونوسم کردن.


Zaherbaher.com
زاهیر باهیر – لەندەن
16/08/2019

—————————————————————————————————
*مەبەست لە نامەکانی ئۆجەلان : یەکەم نامە لە ڕۆژی 08/08/19 لە ڕێگای پارێزەرەکانییەوە. نامەی دووهەم، ڕۆژی 12/08 بوو کە لە ڕێگای موحەمەدی برایەوە ناردییە دەرەوە.
**http://zaherbaher.com/2019/05/08/دەبێت-پەکەکە-ئەم-هەلە-لەدەستنەدات-پێش
http://zaherbaher.com/2018/01/10/پەکەکە-بەرەو-کوێ-مل-دەنێ؟

Previous
Next
Kurdish