هەموان لەگەڵ داوای ڕەواكانی خەڵكدان … کارا فاتیح
ئەم ڕستەیە لە ڕواڵەتدا جوان و نزیك بە ئازاری خەڵك و بە قەولی خاوەنانی ڕستەكە دیموكراسیخوازانەیە، بەڵام گەر تۆزێك هەڵی بتەكێنێت، بە ئاسانی ناوەرۆكی قێزەون و فاشییانەی دەبینیت و نەبرەیەكی دژ بە دەنگی خەڵكی تێدا دەبیستی:
1- ئەوانەی دەڵێن، (لەگەڵ داوا ڕەواكانی خەڵكداین) واتە مەبەستییانە بڵێن ئاگامان لێیە خەڵك لە چ ئازار و مەینەتییەكدا دەژی، ئەوان تەنها ئاگایان لێیە، واتە خۆیان وا نیین و تەنها سەیر دەكەن و دەبینن، بۆ ئەوەی خەڵكیش ئەوان بە سەرچاوەی ئەو ئازار و مەینەتییانە نەزانن، دێن بە ئامرازی (لەگەڵ) خۆیان بە نزیك لەو ئازار و مەینەتییانە دەناسێنن، بەڵام هێشتا بەشێك نیین لەو ئازار و مەینەتییانە، بەڵكو بەشێكن (ئەگەر هۆكاری سەرەكی نەبن) لە دروستكەری كەشی ئەو ئازار و مەینەتییانە.
2- ئەوانەی دەڵێن، (لەگەڵ داوا ڕەواكانی خەڵكداین) لە واقیعدا خۆیان خەڵك نیین و لە شوێنێكی تری سەروو خەڵكەوە قسە دەكەن، شوێنێك كە ئازار و مەینەتیی خەڵكی مافخوراو و زەحمەتكێشی تێدا نییە، بەڵام بۆ درۆ و چەواشەكاری و مەبەستی سیاسی دەڵێن، لەگەڵ داوای ڕەواكانی خەڵكداین، بەڵام هێشتایش ڕستەكە ڕوونە، لەگەڵیدان نەك لە ناویدا، جیاوازیی لەگەڵ و لەناویش… ئاشكرایە كە زۆرە.
3- ئەوانەی دەڵێن (لەگەڵ داوا ڕەواكانی خەڵكداین) واتە ئێمە تێ ناكۆشین و خەبات ناكەین بۆ ئەم داوایانە، تەنها لە دوور و بە قسە لەگەڵیدان، هەر كاتێك خەباتی خەڵك بۆ ئەم داوایانە گەییشتە خاڵێك، ئەو كات دەتوانن بە هۆی ئەوەی دەڵێن (لەگەڵ داوای ڕەواكانی خەڵكدان) هەم خۆیان لە تووڕەییی خەڵك بپارێزن و هەم سوار شەپۆلی ناڕەزاییەكان بن و هەموو دەورێك بۆ ئەوان بێت.
بۆیە هۆشیاریی ڕاستەقینەی خەباتی خەڵك دەبێت لەوێوە دەست پێ نەكات، كە سوود لەو هێزانە وەربگرێت كە دەڵێن (لەگەڵ داوا ڕەواكانی خەڵكدان) بەڵكو سەرەتا دەبێت سەری ئەو هێزانە پان بكاتەوە، یان لانی كەم بێ دەنگیان بكات.
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
