ڕوونکردنەویەک بۆ بەڕێز مامۆستا برایمی فەرشێ … دکتۆر : مەولود ئیبراهیم حەسەن
سڵاو مامۆستای بەڕێز ..هیوادارم شادو ئاسودەو تەندروست بن .
برای بەڕێز من دوێنێ ٢١/٨/٢٠١٩ ئەو نووسینەی ئێوەم کەوتە بەرچاو کە لە ژێرناوی – بریا ئێوە کەستان خۆشنەدەویست و قینتان لە کەس ، هه ڵنەدەگرت ! – کە لە فەیسبوکەکەتان و ڕۆژی ٢٥ ئۆکتۆبەری ساڵی ٢٠١٨ نووسیوتانە و بڵاوتان کردووتەوە . چوونکە لە نووسینەکەت دا و لە ناوە ڕاست گوتووتانە : (من لێرەتەنیا ئیشارەبە بەرنامەیەکی ڕادیۆیی باشوور دەکەم کە بە ناوی لێکۆڵینەوەی زانستی لە زمانی ڕابە خاتوونەوە دەگێڕدرێتەوە .) هه رچەند ڕەخنەی دروست و کاری زانستی وای دەخواست کە بەڕێزتان بەو پاشخانە ڕۆشنبیریی ونووسەرولێکۆڵەروشانۆکاریی ئەرشیفداریی و میدیایی و تاقیکردنەوە زۆرەی کە هه تانە ، ناوی ڕادیۆو بەرنامەو پێشکەشکارو بابەتی مەبەست و کەسی میوانی بەرنامەو ڕۆژوو کات و شوێنی بەرنامە کە ئاشکرا بکەن و ڕوون و ڕاست بە خوێندەوارەکانت بڵێی؛ من مەبەستم ئەمانەیە ! بەڵام مخابن واتان نەکردووە . ئێوەی بەڕێز هه ر مەبەستێکتان هه بێت لە – نەناسراو – هێشتنەوەی کەس و بابەت و بەرنامەکە !من تەنی بە مەبەستی ڕەخنەی زانستی ئەم سەرنجە دەخەمە بەرچاو . چۆن ئەمە جاری یەکەم نیە کە بەڕێزتان – ڕەخنەی زانستی!! – بە شێوەی توانج و پڵار لە ئێمە دەگرن . ساڵی ٢٠١٢ پاش دەرچوونی کتێبی ( ساواک بۆچی حەسەن زیرەکی کوشت ؟) ئەو دەمیش لە نامەیەکی کورتدا بۆ( دەزگای بەدرخان) لە باسی کتێبە کەو بابەتی ژەهرخواردووکردنی هونەرمەند حەسەن زیرەک گۆمانتان خستبووە سەر ڕاستیی مەسەلەکە ! هه رچەندە شێوەی نووسینی نامەکە زۆر لە خوار ئاستی نووسینی بەڕێزتانەوە بوو ، تەنیا پێناسەیەک بۆ نامەکە بشێ ئەوە یە کە (نامەیەکی گومان ئامێزبوو!) گومان! بەمانای ناڕاستیی و نا زانستیی نووسین و لێکۆڵینەوەکە هه رچەندە نووسەرەکە –بە تایتلی دکتۆر- خۆی عنوان کردووە !! لە وەڵامدا من لە نامەیەکی برایانەو بە وشەی گوڵئامێز داوام لە بەڕێزتان کردبوو کە سەرەتا کتێبەکە بخوێننەوە دواتر ڕەخنەی زانستی خۆتان بنووسن ، لەوە ناچێ کتێبەکەت خوێندبێتەوە و ڕەخنە زانستیەکەشتم نە بینیوە !! ئەوا جارێکی تریش بە نووسێنێکی پلار ئامێز ڕووی ڕەخنەکەت لە ئێمە دەکەیت و ناومان ناهێنی !؟؟ وەک چەند جارێکی تریش لێرەو لەوێ بە هه مان نەفەس –بێ ناو هێنان – پلارت تێگرتووین .
مامۆستای خۆشەویست باجارێ من ئەو قەردە کۆنەت بدەمەوە ، کە کورد گوتوویەتی : قەرد کۆن دەبێت ناچێ ! وەک گوتم لە وێداساڵێ ٢٠١٢ بەڕیزتان گومانتان خستبووە سەر مەسەلەی ژەهری ساواک و کوشتنی هونەرمەندی شەهید حەسەن زیرەک بە دەستی ساواکیە بەدناوەکان .ئێستا زۆر بە کورتی و بەڕوونی هێندەی دەتوانم بۆ بەڕێزتان و بۆ هه موو ئەو بەڕێزانەی گومانیان لە و مەسەلە هه یە ، ڕوونی دەکەمەوە .
یەکەم : مەسەلەی ژەهر خواردنکردنی زیرەک تازە نیەو هه ر لە ڕؤژانی نەخۆشی زیرە ک و کەوتنی لە نەخۆشخانە ئەو ژەهرە – تام و بۆنی – بە وڵات دا بڵاو بووەتەوە . ئەوە تا ژنێکی کارمەندی نەخۆشخانە لە ڕۆژانی یەکەمی نەخۆش کەوتنی زیرەک ،ڕابە خانم دەباتە ژێرزەمینەکەو پێی دەڵێ: ڕابیعە خانم حەسەن زیرەک هونەرمەندێکی گەورەیەو بێکەسە، ژەهرخواردوویان کردووە دکتۆرەکان ڕاستییەکەت پێناڵێن،تکات لێدەکەم باخوێنەکەی بزرنەبێت ! بەڕێزیشت ئەوە دەزانی کە ڕابیعە خانم دوا خێزانی زیرەکەو تا دواچرکەی ژیانی زیرەک چرکەبە چرکە دڵسۆزانە لە خزمەتی دابووە . ئەو نە خۆشیەش کە زیرەک لە شاییەکە دەگەینێتە نەخۆشخانە بە لەخۆچوویی ، نەخۆشی سەرتانی جگەر نە بووە!!ئەو ژەهرە بوو کە لە کاتی نانخواردندا ژنێک !! قابێک شۆرباو قەنداخێک دێنێ دەڵێ : ئەمەم تایبەت بۆ ئاغای زیرەک هێناوە !! زیرەک کە دواجار دەچێتەماڵەو بۆ ڕابیعەخانم دەگێڕێتەوەو دەڵێ: من لە قابە شۆرباکە دوو کەوچکم خواردوقەنداخەکەشم خواردەوە ، کە چوومەوە نێو شاییەکە سەرم سوڕاو کەوتم و ئاگام لە خۆنەما !! من لە چاو پێکەوتنە ڤیدیۆییەکە لە ڕابیعەخانمم پرسێ ، کە زیرەک چووە شاییەکە نەخۆش بوو ؟ لە وەڵامدا گوتیان : نە خێر هیچ نەخۆشیەکی نەبوو !!ئەم ژەهر خواردنەی زیرەک لە کوردستان بەگشتی و کوردستانی ڕۆژهه ڵات و شنۆو بۆکان و مەهاباد بابەتێکە لە بیر نەچووەو شاهێدی زۆر ماون . پآش بڵاو بوونەوی کتێبەکەی ئێمە ( ساواک بۆچی حەسەن زیرەکی کوشت ؟ ) زۆر لە کوردانی ڕۆژهه ڵات ئەمەیان بەڕاست زانێ و هه ندێکیان گوتیان : ئەوەی ئێوە دەتوانن بینووسن ، قسەی دڵێ ئێمەیە ! بەڕێزێک لە کۆمێنتدا نووسیبووی ( ئەوەی کە زیرەکی ژەهر خواردوو کرد ئێستا لە سوید دەژی و زۆر کەسی تریشی ژەهر خواردوو کردووە .) مامۆستا برایم من دڵنیام جەنابت زۆر هه واڵی تریشت بیستووە و هه ندێک لەو هه واڵانە منیش دەیانزانم !! بەڵگە یەکی تر بۆ بە رێزتانی بهێنمەوە مامۆستا برایمی فەرشی ، قسەو دەنگ و ڕەنگی هونەرمەند ( قالە بۆکانی ) هاوڕێ و هاوتەمەنی زیرەکە ، کە لە بەرنامەیەکی دیکۆمێنتاری و بە بۆنەی ٤٧ ساڵەی ساڵفەوتی زیرەک لە تەلەفزیۆنی – کوردستان ٢٤ – دا کە بەحەق بەرنامەیەکی چاک و گرنگ و سەرکەوتووبوو. هونەرمەند قالە بۆکانی فەرموویان:( کوێراییم دایێ حەسەن زیرەکیان ژەهرخواردووکرد لە مەهاباد ،کوڕە خۆزیرەک هیچی نەبوو دەرمانخواردیانکرد ) مامۆستای بەڕێز جەنابت زۆر چاک دەزانی کە یەکێ لە بەلگە یاساییەکان شاهێدە . بآشە بەڕێزم شاهێدێک هه یە لە ڕابیعە خانمی دوا خێزانی زیرەک لەوە مە سەلەیە چاکتر بە شاهید بشێ ؟ ئەی هونەرمەند قالە بۆکانی کە بە تەواوی هوشیاریەوە و بەدەنگی خۆی و بێ ئەوەی کەس زۆری لێبکات دەفەرمووێ : کوێراییم دایێ حەسەن زیرەکیان ژەهرخوادووکرد لە مەهاباد . شاهێدو بەلگە لەوە ڕاستترو یاسایی ترو زانستی تر دەبێت !؟ شتێکی کەمن سەری لێدەرناکەم ئەوەیە کە هه ندێ کەس بە تایبەت برا ڕۆژهه ڵاتیەکان ، هه ندێکیان زۆر بە جددی دەیانەوێ ئەوە ڕەتبکەنەوە کە ساواک هونەرمەند حەسەن زیرەکی ژەهر خواردوو کردبێ !؟ .دیارە کەسێک بیەوێ ڕاستی ئەو مە سەلەیە بزانێ و ئێستاش پاش ٤٧ ساڵ لە مەرگی زیرەک غەدر لە و هونەرمەندە نەکرێ ، لەو سەردەمەی زیرەک لە تاران بووەو هونەرمەندی ڕادیۆبووەو ناوودەنگی ئێران و عێراق و هه موو کوردستان و ناو چەکەی پڕکردووە دەبینێ کە هه رئەو دەم – ساواک – بەوردی چاودێری زیرەک و میدیا خانمی کردووەو بەجێێ مەترسی زانیون و لەشەش بەلگەدا کە لە کتێبی – چپ در ایران بە ڕوایت ساواک – دا ئەو دەزگا بەدناوە ڕای خۆی لەسەر زیرەک بە بەرپرسانی ئەو دەزگایە گەیاندووە . ئەگەر بەوردی ڕاپۆرتی ڕاپۆرتنووسەکان بخوێنینەوە ، دەزانین چ دوژمنکارانە گوێان لە ترپەی دڵی زیرەک و میدیا خانم گرتووەو چ سەرفەوتێنانە ڕاپۆرتیان نووسیوە !!با شتێکی تریشت بۆ باس بکەم مامۆستا ؛ میرزا کەریم خۆشناو دەگێڕێتەوە لە پاش مەرگی زیرەک لە (حسێن زیرەک )ی برای حەسەن زیرەکی خوا لێخۆش بووم پرسی :(خوا لێخۆش بوو خەراپەی کەسی نە بوو حەزیشی لە شەڕو گێچەڵ نە بوو بۆچی تا لە بانە بوو دوو سێ جار شەڕی کرد ؟ گووتی : ئێمە چەند جار پێمان گووت کاکە ئەتۆ تەنها خۆت و برا ژنە – ڕابیعە –ی ژنتەو ئارەزوو ساکاریش لای دایکیانن، ئێمە زۆر چاک ئەتوانین بەخێوتان بکەین، یان وەرە لێرە کاسبی بکە و ئێمەش یارمەتیت دەدەین و چاویشمان لیت ئەبێ وکەسیش ناتوانێ بێ خود شەڕت پێ بفرۆشێ .-.حەسەن زیرەک- پێکەنی وگووتی :باوکم خۆ منیش ئەوەی تۆ دەیلێی ئەیزانم و زۆریشم بەڵاوە چاکە .بەڵام ، ئێوە شتێک ئەزانن و منیش زۆر شت .من بەڵاتان لێ وەدوور دەخەمەوە !منیش –واتە حسێن زیرەک- گووتم : بە ڵای چی کاکە ئەوە ئەو هه موو مودەتە ئێمە ئاگامان لە مردن و ژینی یەکترنیە !ئەو بە ڵایەی بۆ تۆ دێتە خوارەوە با ئێمەش شەریکی خەم هه ڵگرتنت بین غەمێکت بۆ بخۆین! تەماشایەکی ئەوڵاو ئەم لای کرد و بە دەنگێکی نزم گووتی : حوسێن ( زەدەی ئیتلاعات ) ئەزیەتم دەدات و ئەڵێ ئەبێ بچیتە ئەو دیو ئیشمان بۆ بکەی ! چەندی دەڵێم باوکم ئەمن هی ئەو جۆرە شتانە نیم و ( سەوادم نیە )ئیوە چۆن ئیستیفادە لە من ئەکەن ؟ ئەڵێن ئەتۆ بە ماڵەوە بچۆ عێراق ئێمە پارەیەکی زۆرت دەخەینە ئیختیار و خۆشمان خەڵکت بۆ دەنێرین تۆش هه رچی مەعلوماتت هه یە پێیان بڵێو ئەوانیش بۆ ئێمەی دەهێننەوە ! هه ڵبەت خۆشت دەزانی ئەم جۆرە شتانە بەمن ناکرێت و ئەگەر پێشم بکرێت نایکەم با لە ساڵێ دوو سێ جار تێم هه ڵبدەن و بە فەقیریش دەژیم وو بەڵام ، ( ئەو کانیەی ئاوم لێی خواردووتەوە هیچ کاتێک بەردی تێناخەم و خیانەت بە خاکی عێراقیش ناکەم )لە ناو خەلکیس سەر بەرز دەژیم . لە دواییدا پێکەنی و گووتی بە تەنیا بەربەرەکانی دەوڵەتێش دەکەم …! ) ( ل٩٢-٩٣ بەشی دووەمی حەسەن زیرەک هه ندێک لە بەسەرهاتەکانی )ئەم هه واڵە زیرەک بۆ حسێنی برای گێڕاوەتەوەو حسێنیش بۆ میرزا کەرێم و میرزا کەرێمیش بۆ بەڵگە و بۆ هه مووان نووسیویەتیەوە . ئەم هه واڵە پاکی و ئازایەتی و پیداگری زیرەکمان بۆ دردەخات تا پای مەرگ !! دڕندەیی و بە دواوەو بوونی ساواکمان بۆ دەردەخات بەدواوەی زیرەک تا دەرخواردندانی ژەهر !!
دووەم : بەڕێزان خوێندەوارانی خۆشەویست مامۆستا( برایمی فەرشی) ڕەخنە دەگرێ و ناوێ ڕەخنەلێگیراو ناهێنێ ! ئەوە ئەگەر دیدی مامۆستایە بۆ کەسی ڕەخنە لێگیراو !! بەڵام ، کورتی هێنانە لە پەیامی ڕەخنە . چۆن یەکێک لە ئەرکەکانی ڕەخنە گری زانستیانە ناساندنی بابەتی مەبەست و کەسی ڕەخنە لێگیراوە !مامۆستای بەڕێز ئەوەی نەکردووە . ئێستامن بۆتان ڕوون دەکەمەوە ئەوەی کە ئاغای برایمی فەرشی مە بەستیەتی ، بەرنامەکە لە ڕادیۆی دواڕۆژ بوولە شاری سلێمانی و بەرنامەیەکی تایبەت بوو بە ڕۆژی یادی ٤٦ ساڵەی فەوتی زیرەک بوو ، میوانی بەرنامە –من بووم ، مەولود ئیبراهیم حەسەن – و پێشکەشکاری بەرنامەش مامۆستا ی بەڕێز ( دەون مەعروف) بوو.بابەتی بەرنامەکەش ژیان و بەسەرهاتی زیرەک بوو .
مامۆستا برایمی فەرشی وەک کەسێکی بەتواناو شارەزا لەم کورتە نووسینەدا ، هیچ وشەو ڕستەیەکی بەبێ مەبەست نە نووسیوە .خۆی گوتەنی : ناکرێ وەڵامی هه موو پرسیارو پلارەکانی بدەینەوە . ئەوەی گرنگە دیسان گومان لەوە دەکات ، کەمن گوتوومە : ڕابیعەخانم دەڵێ ،: تیمێکی پسپۆر لە ئەمریکاوە هاتبوون بۆ ئەوەی ((قورگی حەسەن زیرەک بکڕن بۆ ئەوەی لیکۆڵینەوەی لەسەر بکەن . مامۆستا فەرشی دەنووسێ : ئەو ئاکادیمیسیێنە ی کە لە ڕادیۆئەم باسە دەکا، لە ڕیگای ڕادیۆکەوە دوای تێپەڕبوونی ٤٦ساڵ داوا لە کوردانی ئامریکا دەکات بچن ئەو پسپۆرانە ببێننەوە .ئەو بەڕێزە جگە لەو قسانە هیچ نادات بەدەستەوە .ئەو کەسانە کێن، لە ئەمریکا بۆ کوێ چوون؟ بۆ ئیران بۆ بۆکان؟ گەرچوون چوونە لای کێ ؟ کێ پێی نەفرۆشتوون وبۆ ؟لە کوێ ئەم زانیاریانە بڵاو کراوەتەوە ؟ ڕابە خانم چۆنی زانێوە ؟ ئایا جگە لەو چەند کەسی دیکە بەو زانیاریانە دەزانن؟)
مامۆستا برایمی فەرشێ لە بەر ئەوەی چاوپێکەوتنەکەی ئێمەی لەگەڵ ڕابیعە خانم نە خوێندووتەوە ، کە لە کتێبەکەمدا بڵاو کراوەتەوە ، زۆر بەی پرسیارەکانی خۆی بە زیادە خستووەتە ناو نووسینەکەی خۆی !! .
-مامۆستا گومان لە ڕاستیی هه واڵ و زانیاریەکە دەکات ، کەمن بڵاوم کردوونەتەوە ، لە کاتێکدا هه ر ئەو بەڕێزە دەنووسێ – لە زمانی ڕابە خاتوونەوە دەگێڕدرێتەوە . بەڵێ . مامۆستا من چاو پێکەوتنێکی ڤیدیۆییم لە گەڵ ڕابیعە خانم کردووەو قسەکانی ئەوم لە کتێبەکەمدا نووسیوە . ئەوە بۆ ڕاستی قسەکان بەڕێز ڕابیعەخانم بەرپرسە ! من گواستوومەتەوە ، عەرەب ئێژن : ئەوەی کفر دەگوێزیتەوە ، کافرنیە ! ئەوەش کە ڕابیعەخانم بۆ من و بۆ زۆر کەسی تری گێڕاوەتەوە ، کفر نیە ! ڕاستیەکە کە ڕابیعەخانم تێیداژیاوە و خۆی ئازارکێژو کارەکتەری ڕووداوەکەیە ، ئەو خاتوونە دەڵێ : شەش کەس لە ئەمریکاوە هاتبوون ، دەیانەویست جەستەی زیرەک بکڕن ، پارەیەکی زۆریان دەدا ، جەستەکەمان نەدانێ ، داوای تەنیا گەرووەکەیانکرد ، ئەوە بوو خوشک و براکانی زیرەک بەوە ڕازی بوون ! من – واتە ڕابتعەخانم – گوتم، زیرەک لە ژیان نەسایەوە لە قەبریش لێیناگەڕێن بسیتەوە . ڕازی نەبووم گەرووەکەش بکڕن . کەواتە ئەوانەی هاتوون ، هاتوونەتە بۆکان وبۆکانیش شارێکی ئیرانە !؟! چوونەتە ماڵی خوشک و برای زیرەک و داوایان لەوان کردووە کە جەستەو وگەرووەکەیان پێ بفرۆشن ، ئەوەش کە ڕازی نە بووە گەروووی زیرەک بفرۆشرێ ، ڕابیعەخانمە !!. ئەوە کەواتە تەواوی خانوادەی زیرەک ئاگادارن و هه ر جەنابیشت دەنووسی : (ڕاستی مەسەلەکە چییە؟ هه ربەدوای مردنی حەسەن زیرەک لە ماڵی خوشکی لە خەیابانی سەقز ، نزیک مەدرەسەی بوعەلی ، بازاڕی دەنگۆ لە شاری بۆکان و شارەکانی تر گەرم بوو، یەک لەو دەنگۆیانە هه رئەوە بوو ، کە لێرەو لەوێ ناوی وڵاتەکەش دەگۆڕا ،. ئێستا هه ر ئەوە بۆتە سەرچاوی لێکۆڵینەوەو بووتە زانیاری لەسەر زیرەک ) لە ڕاستیدا مامۆستا لەم نووسینە دا گومان دەخاتە سەر ڕاستی مەسەلە کە !! کەچی ماڵی ئاوابێت هه رخۆی بەشێک لە ڕاستیەکە دەخاتە ڕوو. ئەوتە ئەوە دەسەڵمـێنێ کە هه ر ئەو کات پاش مەرگی زیرەک ئەو – دەنگۆ- یە لە ماڵی خوشکی زیرەک بڵاو بووەتەوەو نەک هه ربۆکان شارەکانی تریشی گرتووتەوە ، ئەو دەنگۆیەی کە لە دوای مەرگی زیرەک بە ماوەیەکی کەم و لە نێو کەس وکاری نمرەیەکی زیرەک واتە خێزان و براوخوشکی زیرەک بڵاو دەبێتەوە ، ئێستا خیزانی زیرەک بە دەنگ و ڕەنگ ئەو دەنگۆیە دەکات بەڕاستی و بەڵێ منیش ئەو بە لگەیە بە بەلگەیەکی تەواو زانستی دەزانم و لە کارە زانستیەکەی خۆم پشتێ پێ دەبەستم و تائێستا هیچ بەلگەیەک لەو بە لگەیە بەڕاست و زانستی تر نازانم . ئەرێ کێ لە خوشک و خێزانی زیرەک ئاگادارترو جێ بڕوا ترن ؟ بەتایبەت بۆ مەسەلەیەک کە لە نیو ماڵ و بەردەست و بەرچاوی ئەوان ڕووی دابێت ؟!مامۆستا لە درێژەی پرسیارەکانی دەنووسێ : لە کوێ ئەم زانیاریانە بڵاو کراونەتەو ؟ لەوەش سەیرتر مامۆستا برایمی فەرشی دەپرسێ : ڕابە خانم چۆنی زانیوە !؟ مامۆستا ئەوەی لە بیرکردووە کە ڕابە خانم دوا خێزانی زیرەک بوو ! ئەو خاتوونە تا توانیویەتی خزمەتی کردووەو کە مردووە و شاردوویانەتەوە تازیەیان بۆداناوە ، ڕابەخانم پێش لە خوشک و براکانی خاوەنی مەسەلەکە بووە . ئەوەتە دواجار بە قسەی خۆی ئەو ڕازی نەبووە جەستەو گەرووی زیرەک بفرۆشن دەڵێ: خزم و کەسی هه ندێک ڕازی بوون ، بەڵام من کە بیستم یەخەی خۆم دادڕی وچووم شکاتم کرد ،گووتم: ئەوە هێورەکانم دەیانەوێ لاشەی زیرەک بفرۆشن لێننەگەڕام .) (ل١٣٦ ،ساواک بۆچی حەسەن زیرەکی کوشت ؟) مامۆستا وادیارە گومانی لە ڕابەخانم هه یەو دەپرسێ چۆنی زانیوە ؟!؟ ئەو ڕابەخانم چۆنی زانیوە بۆ مامۆستا لێدەگەڕێم چۆن بەڕێزیشیان لێکۆڵەرن ! بەڵام ، من لە کوێم زانیوە ؟ ئەوە لە و ڤیدیۆ تۆمارکراوە ڕەنگی و دەنگییەی چاوپێکەوتنەکەدا کە لە ڕۆژی ٢٠/٧/٢٠١٠لە هه ولێرو لە ماڵی ڕابیعەخانم ، بە ئامادەبوونی کاک عومەر کارمەندی دەزگای بەدرخان تۆمارمان کردووەو کاسێتەکەش ماوەو منیش تەنیا نە بووم کە چوومە خزمەت ڕابیعەخانم . هه رئەو بابەتە بەڕێزی تر کە چاوپێکەوتنیان لە گەڵ ڕابیعەخانم کردووە ، بە تۆمارکراوی هه یانە ، هێندە هه یە جارێ بڵاویان نەکردووتەوە بۆیە منیش ناوێان ناهێنم .
مامۆستا برایمی فەرشێ لە سەر پرسیارو گومانکردنەکانی بەردەوامەو دەنووسێ :ئەو ئەکادمیسیۆنەی کە لە ڕادیۆ ئەم باسە دەکا، لە ڕیگای ڕادیۆکەوە دوای تێپەڕ بوونی ٤٦سال داوا لە کوردانی ئامریکا دەکات بچن ئەو پسپۆرانە ببێننەوە . ئەو بەڕێزو جگە لە قسانە هیچ نادات بەدەستەوە ،ئەو کەسانە کێن؟لە کوێ ئەمریکا بۆ کوێ چوون ؟ بۆ ئیران بۆ بۆکان ؟گەڕ چوون چوونە ڵای کێ ؟کێ پێی نەفرۆشتن و بۆ ؟
وەڵامەکان دیارن و ڕوونکرانەوە ، ئەوەی ماوە داواکەی منە لە نووسەرو ڕۆشنبیرو هونەرمەندانی کوردی دانیشتووی ئەمریکاو بەدوا داچوون و دۆزینەوەی ئەم پسپۆرانەیە ، کەوادیارە مامۆستا ئەم پرسیارەی لا سەیرەو پێی وایە کاری کردەنی نیە !!. مامۆستا برایمی فەرشی لە من چاکتر دەزانێ کە ئەمریکا وڵاتی سیستەم و دامازراویی و ئەرشیف و بەلگەیە ، ٤٦ سال ماویەکئ ئەوەندە دوور نیە کە بەڵگەکان دەسنەکەون ، ئەوانەی هاتوون پسپۆری مۆسیقان و سەر بە نێوەندێکی هونەری زانستی ئەمریکابوونە ، کە هاتوون بێ شک بەلگەی هاتن و پسولەی خەرجی و ڕۆژو مانگی هاتن و ناوی کەسەکان تۆمارکراوە و هه لگیراوە و ئامانجی هاتنەکەشیان دیاری کراوە !ئێستآش من دۆزینەوەیان بە زەحمەت نازانم ، دوور نیە لەو شەش کەسە هه ندێکیان لە ژیاندا مابن وکوردی دڵسۆزو شارە زا دەتوانی بەدوا دابچێ لە مانگی ٦و٧یساڵی ١٩٧٦ دا بە دویان دابگەڕێی و بگاتە ئەنجام . کە هیوادارم من نەمرم و ئەم ئەنجامە ببێنم .
ئێستا دەگەڕێمەوە سەر ناو نیشانی نووسینەکەی مامۆستا برایمی فەرشی .
مامۆستا نووسیویەتی :بریا ئێوە کەستان خۆشنەدەویست و قێنتان لە کەس هه ڵنەدەگرت !
ئەم ناونێشانە جۆرێک گشتگیری دراوەتێ؛ بەڵام ، لە ناوەڕۆکدا مەبەستی ئێمەیە . ئەوی ڕاستی بێت برای بەڕێزم برایمی فەرشێ ، من مامۆستای هونەرمەندان حەسەن زیرەکی شەهیدم یەکجار زۆر خۆشدەوێ ، ئەوی جێگای داخی منە خۆشەویستیەکەی من هێشتا لە ئاست گەورەیی و زانایی زیرەک دا نیە! چؤن بەڕاستی هێشتا من زۆر کەم لە بارەی زیرەکەوە دەزانم ! ئەوەتە من لە ڕووی زانستی مۆسیقاوە ، شارەزای دەنگی زیرەک نیم ، هه رهێندەیە دەزانم دەنگی خۆشە و لە ززەت لە دەنگی وەردەگرم ، خۆشیەک ڕووحی داگیرکردووم ، من لە نێو ئەم کوردستانە پڕ لە گرفت و لەو هه موو کێشەو دردی سەریەی کە دیومە تا پای مەرگ چووم !! ئەگەر دەنگی زیرەک نەبوا من ئێستا ئەم هاوڵاتیە ئاساییە نەدەبووم کە هه م .بۆیە من هه رتەنیا زیرەکم خۆش ناوێ ، بەشێكی ژیانم لە سایەی زیرەکە. هه ربۆیە هه ر پێدا هه ڵگوتنێکی کە بە زیرەکم دا هه ڵگوتووە ، ڕای تەواو بێ چەندو چوونی خۆمە پاش دەیان ساڵ گوێگرتن لە زیرەک و خوێندنەوەی ژیانی. ئەوە ش کە بە لێکۆڵینەوە بەرگریم لە زیرەک کردووەو سەڵماندوومە کە – ساواک – زیرەکی ژەهر خواردوو کردووە ، بەڵگەکانم لە نووسین و قسەی خەلکی نزیک لە زیرەک بیستووەو خوێندووتەوە . تا ئێستا بڕوای تەواوم بە لێکۆڵینەوەکەی خۆم هه یە . ئەگەر ڕؤژێ مامۆستا برایم و هه ر لێکۆڵەرێکی تر بە بەلگەو بە زانستیەوە سە لماندیان کە پیچەوانەکەی ڕاستەومن هه لەم و ڕووی ڕەشی ساواکیان سپی کردەوە !! ئەوا بە و پەڕێ ڕاستگۆیی و ئاشکراوە بەدەنگ و نووسین من دوای لێبووردن لە حکومەتی شاهه نشاهی و دەزگای ساواک و خوێندەوارەکانم و ئەو بەڕێزانەش دەکەم و ئامادەم سزاو جەزای خۆم وەرگرم .
بەشی دووەمی ناونیشانی نووسینەکەی مامۆستا برایمی فەرشێ نووسیویەتی : بریا ئێوە …قینتان لە کەس هه ڵنەدەگرت !برای بەڕێز ئەوە لە کوێندەرت خوێندووتەوەو بیستووە و بینیوە کەمن وام قین لە کەسان هه ڵگرتبێت !! و بەو قین هه ڵگرتنە کارێکی وام کردبێ ، کە ئێستا بەڕێزتان نزای ئەوە بخوازن کەمن ئەو قین هه ڵگرتنەم نەکردبا ! ! تکایە نموونەیەکم بۆ بێنەوە کە بۆ- بریا – یەکەتان بشێ !؟ مامۆستای بەڕێز جەنابت زۆر باس لە لێکۆڵینەوەی زانستی دەکەیت ، ئەوە پاش چ لێکۆڵینەوەیەکی زانستی و بەلگەدار ئێوە لە ئانجامدا گەیشتنە ئەوەی کە ئێمە – قین – لە کەسان!!هه ڵدەگرین..قین هه لگرتنێک وا لە جەنابت بکات ، نزا بکەی و بریا بخوازی کە من وام نە کردبا !؟ مامۆستا برایمی فەرشی بەڕێز..ئەوەی ڕاستی بێت من وەختئ ئەوەم نیە تاڕقم لەو کەسانەش ببێتەوە ، کە پیویستە ڕقم لێیان ببێتەوە ! من هێندەی کاتم هه یە دڵ و دەروونی خۆم بە خۆشەویستی خۆشەویستانە وە خەریک دەکەم و ڕێگە نادەم ڕق دڵ و دەروونم داگیر بکات . هه تا بۆ ئەوانەش کە هه وڵی بە کوشت دانیان دام و بەردەوامیش هه وڵدەدەن !! نایانکەم بە با بەتی ڕق هه ڵگرتن، هێندە هه یە بەدڵ هیوا دەخاوزم ببنەوە بە مرۆڤ .
هه ولێر-٨ /٢٠١٩
……………………………………
تێبینی : بەڕێزان ..ئەگەرچی نووسینەکەی مامۆستا برایمی فەرشی ، نووسێنێکی کورتە ! بەڵام؛ تەواوی نووسینەکە پرسیاری گومانئامێزو سوک سەیرکردنی کاری ئێمەوبە نازانستیی و نا ئاکادیمی لە قەڵەمدان و بەرگومان خستنە !! هه ربۆیە ناچاربووم بەشێک لە پرسیارەکان وەڵام بدەمەوە . هه موو لایەکیش ئەوە دەزانن کە زۆرجار وەڵام لە پرسیار دریژترە،
