بەشی ھیچ شتێ ناکەم … نەوزاد بەندی

ئیتر
بەشی ھیچ شتێ ناکەم
جێی ھیچم تیا نابنەوە

لەبیرم چوون
ھەموو ئەو کارەساتانەی
ئەمووت بیرم ناچنەوە ..

کرانەوە و
ھیچیشیان تیا بەسەر نەبوو
ئەو دەرگا و پەنجەرانەی کە
ئەمووت ھەرگیز ناکرێنەوە..

گەڕانەوە و
ھیچیشیان تیا بەستە نەبوو
ھەموو ئەو شتە وونانەی
ئەمووت قەت ناگەڕێنەوە ..

ئێستا
لە ناوەڕاستی ڕێ
جار جار ئاوڕ ئەدەمەوە ..
ئەڵێم
نەک
ئەو
لەپڕ
گەڕا بێ
بە دواما ..
وەسڵی ئەو سەرانە و
باجە لەسەر خۆم پڕ ئەکەمەوە

باجی کورد بوون
باجی لە عێراقا سڕ بوون
باجی لە عێراقا پیر بوون

نەوزاد بەندی

Nawzad Bandi