Skip to Content

70 Views

تارمایی یەکانی قەدەر … سەرهەنگ خامۆش

تارمایی یەکانی قەدەر … سەرهەنگ خامۆش

Be First!
by August 31, 2019 General, Poems
image_print

ئێوارەیەک بەر لە هاتنى
تارمایى یە هێمنەکانى شەو
پێش ئەوەى خۆر
لە تخوبى شار ئاوابێ
خۆم بە باڵى
باڵندەیەکى کۆچەر هەڵدەواسم

لە ژێر هەورە یاخى بووەکان دا
دەبمە پەیامێکى پڕ لەحەسرەت
بە لێوى قڵیشاوى خاک پێدەکەنم
لە گەڵ سیمفۆنیاى باران سەمادەکەم
سەفەرێک بۆ ئەودیوى
سەرابە تاڵەکانى غوربەت دەکەم

دەڕۆم پێش ئەوەى
سەردولکەى مەرگى پایز
پرچی حەزەکانم بهۆنێنەوە
هەگبەى سەوزم
لەبەر دەرگاى زەردى خەزان هەڵدەڕێژم…

پەنجەکانم لە تەنیایى دەتۆرێن
لەگەڵ نۆتەکانى
پرچى تارى کازیوەدا
بە دیار نامۆ بوونى شیعرێکمەوە
ئاوازى عەشق دەژەنن

بەر لەوەى خەرمانەى وشەکانم گڕبگرن
لە ئاوێنە شکاوەکانى تەمەنم
لە تارمایى پیریم ڕادەمێنم
لە کەنارى مەستى گەنجیم وەنەوزێ دەدەم
دەچمەوە نێو
ئەلبومى یادگاریەکانم
کۆلارەکانی خەون
لە ئاسمانى منداڵیم هەڵدەدەم

دەگەڕێمەوە نێوسۆزى باوەشى دایکم
گۆیم بۆ لایلایە شیرینەکانى ڕادەگرم
تا ئەوساتەى خۆزگەکانم
لە نیۆ جۆلانەى قەدەرى شەو
چاولێک دەنێن…

Previous
Next

Leave a Reply