Skip to Content

ئۆردوگاتان باش …  نەوزاد بەندی

ئۆردوگاتان باش … نەوزاد بەندی

Closed
by ئاب 31, 2019 General

پاش دەیەھا ساڵ جا بۆتان دەردەکەوێت ئەوەی تیایدا ئەژیان وڵات نەبوو ،بەڵکو ئۆردوگای زۆرەملێ بوو ..

قەت لە خۆتان ناپرسن بۆچی خواردن و دەرمانی کولێتی باش دەست ناکەون ؟قەت ناپرسن بۆچی کێشەی ئاو و کارەبا چارەسەر ناکرێن ؟قەت لە خۆتان نەپرسیوە بۆچی سەرباری ئەو ھەموو سامانە سروشتیە ھێشتا ھەر قەرزار و بێ کار و ھەژارن ؟؟
پرسیار لە خۆتان ناکەن بۆچی کشت وکاڵ و پیشەسازی و خوێندنی باڵا و داھێنان ڕۆژ بە ڕۆژ ئەپوکێنەوە ؟؟ ناپرسن بۆچی دەرچووی کۆلێج و پەیمانگاکان بێ کار و بێ داھاتوو ئەسوڕێنەوە و لەوەیش زیاتر حەوت ھەزار ھەڵگری بڕوانامەی ماستەر و دکتۆر ا بە بێ کار چاوەڕێی ڕەحمی خوا دەکەن ؟؟
لە خۆتان نەپرسیوە بۆچی تروسکاییەکی چارەسەریی لە ھیچ ئاسۆیەکەوە دیار نییە و ھیوا بۆ خوێی چێشتیش دەست ناکەوێ ؟؟

وەڵامی ئەو پرسیارگەلە ئازاربەخشە ئەوەیە کە تۆ لە ئۆردوگای زۆرەملێدا دەژیت و بە تامی دەوڵەت دەرخواردت دراوە ..پۆلیسگەلێک بە ناوی سیاسەتمەدارەوە لەسەر کۆڵەی سنگت وەستاون و ناھێڵن تەنانەت پڕ بە سنگی خۆیشت ھەناسە بدەیت ..

پۆلیسگەلێک بۆ ئەوە دانراون ووشەی (نییە) بخەنە ناو کڕۆمۆسۆمەکانتەوە وەک ئەوەی تۆ لە ئەستێرەیەکی نامۆدا لە دایک بووبیت کە بنەماکانی ژیانی تێدا دەست ناکەوێ ..سەیرترین (نییە)یش ،نەبوونی سووتەمەنی زستانە بۆ ھاوڵاتیان لە کاتێکدا زەریایەک نەوت و ئاسمانێک گازی سروشتی لەم خاکەدایە ..

لە ئۆردوگای زۆرەملێدایت ھاوڕێ ..تۆ دەست بەسەریت ھەتا ئەو کاتەی ڕۆحت دەردەچێ ..
باشترین بەڵگەیش ئەوەیە بۆت نییە لە ئۆردوگاکە بچیتە دەرەوە مەگەر بە پارەیەکی خەیاڵیی بۆ نمونە پاسپۆرتێکی دۆمینیکان بۆ یەک کەس بە سەد و پانزە ھەزار دۆلارە ..
ئازادی سەفەر و گەڕان تەنھا بۆ پۆلیس و مقاولەکانیانە ..بۆ فێڵباز و زەمانەسازەکانە ..

نەوزاد بەندی

Previous
Next
Kurdish