ته‌نهایی و برینێكی تر … ئه‌حمه‌د حاجی سامی


ترسنۆكانه‌،
له‌سه‌ر شۆسته‌ی ئه‌و شه‌قامه‌ تاریكه‌،
خۆم گرمۆله‌ ده‌كه‌م و
بیر له‌ تاریكییه‌كانی داهاتووم ده‌كه‌مه‌وه‌.

له‌ ڕه‌حمی ژنێكی جوامێردا،
شیعرێك ده‌كوژم ..
چونكه‌ ئه‌و شه‌وانه‌ی من ئازاره‌كانی خۆمم ته‌جوید ده‌كرد،
تۆ له‌ مه‌عبه‌ده‌ ته‌ڵبه‌ندكراوه‌كانه‌وه‌؛
مه‌مكه‌كانت ده‌خسته‌ ناو ده‌ستی پاسه‌وانه‌كان و
به‌ لیباسێكی سپییه‌وه‌،
سه‌مات بۆ موبه‌لێغه‌ خه‌سێندراوه‌كان ده‌كرد.

ئێره‌ چییه‌؟
جگه‌ له‌ نیشتیمانی ده‌ڵاڵه‌ چلێسه‌كان،
كه‌ له‌ ده‌غیله‌یه‌كی گه‌وره‌دا،
فرمێسكیان بۆ هه‌ڵده‌گرتین.
كه‌ له‌ زیندانێكی ئاسنیندا،
ئازاریان بۆ عه‌مبار ده‌كردین.

تاكه‌ تاوانی ئێمه‌ گه‌ڕانه‌وه‌ بوو بۆ ژیان،
له‌و عه‌ده‌مه‌ی به‌ خه‌ونه‌كانمان قۆڵبه‌ستكرابووین.
ئیدی كاتیه‌تی له‌ حه‌ره‌می دیواره‌ ڕووخاوه‌ پیرۆزه‌كان بێینه‌ ده‌ره‌وه‌ و
حاشا له‌و ده‌قیقانه‌ بكه‌ین؛
كه‌ به‌ هاتنی قیامه‌ت تاقیمانده‌كه‌نه‌وه‌.
ژه‌هر به‌ خۆشی ئه‌و فریشتانه‌ی جله‌كانیان دڕاوه‌ و
ڕۆژانێك په‌یامبه‌ره‌كه‌ی سینه‌یان مه‌ستكردوه‌،
بخۆینه‌وه‌.

بێئه‌وه‌ پیتێك گۆ بكه‌ین،
كه‌وتینه‌ ناو ئه‌و ئۆقیانووسه‌ جوانه‌مه‌رگانه‌ی شیعریان ده‌ژنه‌وت.
یاخیبووین و
تۆڵه‌ی فه‌نابوونی خۆمان له‌ با كرده‌وه‌.
بووینه‌ هه‌ڵۆیه‌كی گومڕا و
به‌سه‌ر عه‌ڕشی تاریكی زه‌مه‌ندا نۆڕین.
چونكه‌ له‌ گزه‌نگدا،
كه‌ خۆر نیگا خه‌واڵووه‌كانی خۆی به‌ شه‌رمنی هه‌ڵده‌هێنا،
له‌ به‌رینترن ئاسۆی نێوان هه‌وره‌ قه‌یره‌كان و
ئاسمانی تاقانه‌مان ده‌نواڕی؛
كه‌ باران وه‌ك شه‌سته‌یه‌كی به‌دمه‌ست،
ده‌پڕژا سه‌ر جه‌سته‌م و
هێلانه‌ی بۆ ئرمسه‌كانم چێده‌كرد.

له‌ كازیوه‌یه‌كی زوودا،
ئاگرم له‌ دارستانه‌كانی سه‌ر شانم به‌ردا و
له‌ناو زامدا وێنه‌ی ئێسكه‌ به‌جێماوه‌كانی خۆمم كێشا.
چونكه‌ زووخاوی ئه‌و دنیا پووچه‌ به‌ منی ئالووده‌ هه‌رسنه‌كرا.
كه‌ من تا دوا وێستگه‌ی نائومێدی،
نائومێدبووم ..

ئێمه‌ بۆ زادگه‌ی ساردوسڕی په‌ڕه‌سێلكه‌كان كۆچمانكرد و
په‌ڕوباڵی خۆمان قرتاند.
كه‌چی سێبه‌ری ناواده‌ی هوما نه‌گه‌یشته‌ ئه‌و كاروانچییانه‌ی؛
به‌ مقه‌ست ئه‌ستێره‌یان بۆ له‌تده‌كردین.
كه‌ هیچ وه‌همێكی نه‌زۆك به‌ هه‌قیقه‌ت،
له‌و سه‌فه‌ری گومانه‌دا بوونی نه‌بوو.
كه‌ ئێمه‌ی یاوه‌ری تارماییه‌كان،
پلانگێری ده‌ستگیرانداره‌كانی خۆرمان بۆ خودا باسكرد،
زه‌وی به‌رگی خۆی گۆڕی و
ئاسمان تاریكی داگیرساند.

ده‌مێك كه‌ هه‌ستده‌كه‌م گوێگرێك هه‌یه‌،
هه‌ناسه‌ په‌نگخواردوه‌كانی شیعرم هه‌ڵده‌مژم و
یه‌قین به‌ وشه‌ كوژراوه‌كانی نێوان په‌نجه‌كانم ده‌ده‌م.
یاده‌وه‌ریم وه‌ك ئاونگی سه‌ر په‌لكی گه‌ڵایه‌كی وشك؛
به‌سه‌ر وه‌همه‌كانم ده‌ڕژێنم.
ده‌گه‌ڕێمه‌وه‌ كه‌لاوه‌ كۆنه‌كانی ته‌نهاییم،
برینێكی تر له‌ ده‌فته‌ری یاده‌وه‌رییه‌كانم ده‌كێشم و
زه‌مه‌ن به‌ هه‌موو گوناهه‌ ڕه‌ش و سپییه‌كانیه‌وه‌ ده‌نووسمه‌وه‌.

تۆ بچوكتر له‌ شمشێری واعیزێكی گومڕا،
ئه‌و بته‌ خواروخێچانه‌ی دواهه‌مین چه‌كوشیان له‌ ڕۆژگاری پڕ خوێنینی مندا،
بۆ تۆ ..
ئه‌و خودایه‌ی كه‌ شه‌وێك چه‌قۆكه‌ی ده‌ستی لێسه‌ندم و
به‌ حه‌رف و پیرۆزیه‌كانی خۆی ئاشناكردم،
بۆ من ..
منیش له‌ ئه‌شكه‌وتی تاریكی ته‌نهاییمدا،
ئه‌و ئاوێنه‌ خوێناوییه‌یی منداڵی دزیم ده‌شكێنم و
دێمه‌ده‌رێ:
گه‌وه‌ترین هیوای به‌شه‌ر ..
كه‌ من له‌ نێوان ئه‌و هه‌موو بته‌به‌ردین و
ئه‌و هه‌موو نه‌فه‌سه‌ چكۆله‌یه‌دا؛
تۆم هه‌ڵبژارد.
به‌ ئه‌فسانه‌ بێده‌نگه‌كانی ناو كتێبه‌كانتم مه‌سپێره‌.
مێهر به‌ ئازاره‌كانم ببه‌خشه‌ و
برینه‌كانم ماكیاژ بكه‌.

تۆ كه‌ هه‌رگیز له‌ ئاینده‌مت نه‌ڕوانی،
كه‌ نه‌تده‌زانی ته‌نهاییم شیوه‌نی قه‌رنێكی پڕ له‌ مه‌راقه‌ و
برینه‌كانم شاهێدی پاڵه‌وانبوونی منن؛
له‌و جه‌نگه‌ڵه‌ فێڵبازه‌ی له‌ ناخی خۆیدا،
گۆرانی بۆ فاحیشه‌ زوویره‌كانی خۆی ده‌چڕی.
نه‌كه‌ی له‌ باوه‌شی ته‌مومژی دوای ته‌مێكی كوێر بتوێیته‌وه‌،
بگه‌ڕێوه‌ و
له‌ سێبه‌ری ته‌نهایی مندا پشوو بده‌.
منیش وه‌ك تاقه‌نه‌ترین به‌شه‌ری ئه‌و مه‌حشه‌ره‌ چۆڵكراوه‌،
چاوه‌نواڕی وه‌رزی چرۆكردنی هه‌ناره‌كان ده‌كه‌م،
كه‌ من له‌ قووڵایی ده‌ریاكانه‌وه‌؛
ئاواز بۆ ته‌نهاییم ده‌ژه‌نم و
هیچ شاعیرێك بوێری ئه‌وه‌ی نییه‌،
برینه‌كانم تێلاوه‌ت بكات.

كه‌ ئێره‌ پڕیه‌تی له‌ شه‌یتان،
له‌ گێڵاسی بۆگه‌ن،
له‌ درۆزنی قاتله‌به‌ر،
با ئێمه‌ نه‌فره‌ت له‌ گۆانیبێژه‌ زۆڕه‌وه‌كان،
له‌ قاچاغچییه‌ سه‌وداكه‌ره‌كان،
له‌ مه‌یته‌ره‌وانه‌ ڵاڵه‌كان بكه‌ین و
هه‌رگیز ڕاستی نه‌ڵێین.
با بگه‌ڕێینه‌وه‌ ناو ته‌نهاییه‌كانی خۆمان و
بۆ جارێكی تر،
برینێكی تر سه‌فته‌ بكه‌ین.

ئه‌حمه‌د حاجی سامی – 2018