Skip to Content

!چەند دەستڕۆیشتووە، منداڵیی … ڕێباز مەحمود

!چەند دەستڕۆیشتووە، منداڵیی … ڕێباز مەحمود

Closed
by تشرینی دووه‌م 29, 2016 General, Poems

منداڵیی شۆفێرێکە
لە لۆفەکانی کارەساتیشا
فریای ئەوە دەکەوێ
لە پەنجەرەکەوە
ژیان ببینێ و
نەهێڵێ بەتەواوی وەرگەڕێێن .. !

لە بناری گوندێکا ،
منداڵیی هەمیشە ئەستێرێکی پڕە
لە سەتان هەورو
چەندەها سوچی ئاسمانەوە
بەرەدەوام ڕێژنەی سەرسامی و
لێزمەی بارانی تێدەڕژێ ..
گەر تەنانەت
جەنگ فەزای گشتیشی
داگیرکردبێ و
ڕەهێڵەی ئاگرو ئاسن ببارێ !

تەنیا لە منداڵیدا
شریخەی دەستڕێژ و
زرمەی ناپاڵم
بە گرمەی هەورو
چەهچەهەی بولبول و
خوڕەی قەڵبەزەی قاقا ناگەنەوە ..

دەستی منداڵیی هێندە چاپووکە
دەتوانێت چنگ بکات بە قاسەی زەمەندا و
ساڵێک دەربێنێ و
هەمووی هەڵڕێژێتە ،
ناو مشتەکانی ڕۆژێکی جرپنەوە …
ڕۆژێک ،
کە فریای هەموو شتێک بکەوێ …
بۆ نموونە سەر لە کازیوە بدات و
وەرزێک لای بمێنێتەوە .
چەندین هەفتە
لە ئاست بزەی ڕژاوی خۆر
لە سیمای چێشتەنگاوا
بەسەربەرێ و
هێشتا زۆر زوو بێت بۆ نانی نیوەڕۆ …!

ئاه .. ئەگەر ئێمە ،
هەگبەیەکی پڕ منداڵیمان پێ نەبوایە ..
لاوێتیمان
مەرەکەبی ڕەنگاوڕەنگی
نامەکانی وەفا و
دێڕە تەڕەکانی ئەڤینداری ،
لە کوێوە دەست بکەوتایە ؟!


ڕێباز مەحمود

Previous
Next
Kurdish