Skip to Content

49 Views

كچه‌ نیگار كێشه‌كه‌/به‌شی سێیه‌م … ن: ئه‌حمه‌د كامه‌ران

كچه‌ نیگار كێشه‌كه‌/به‌شی سێیه‌م … ن: ئه‌حمه‌د كامه‌ران

Be First!
by September 28, 2019 General, Literature
image_print

مامم ئێمه‌ی برد ناوی هه‌ردوكمانی له‌ قووتابخانه‌یه‌ك نووسی و پاشان وتی: ئه‌مڕۆ ده‌تان به‌مه‌ خۆشترین شوێنه‌كانی ئه‌م شاره‌,سه‌ره‌تا منی برد بۆ شوێنه‌ هونه‌ریه‌كان كه‌ وێنه‌ی ده‌ستی تێدا كێشرابوون ,وه‌ به‌ڕاستی به‌ بینینی ئه‌و وێنه‌ سه‌رنج ڕاكێشانه‌ چاوه‌كانم له‌ شوێنی خۆی نه‌متوانی جوڵه‌یان پێ بكه‌م, ئای خوایه‌ ده‌بێت ئه‌مانه‌ كێ درووستیان كردوه‌؟ مامم وتی: ئه‌مانه‌ هونه‌رمه‌نده‌ به‌ناوبانگه‌كانی خۆمانن له‌گه‌ڵ به‌شێكی وڵاتانی دیكه‌, وه‌ هیوادارم تۆش ڕۆژێك ببیته‌ وێنه‌ كێشێكی زۆر سه‌ركه‌وتوو بۆ وڵاته‌كه‌مان, ته‌واوی ڕۆژه‌كه‌ به‌گه‌ڕانی شوێنی زۆر جیاواز برمانه‌ سه‌ره‌وه‌, بۆ شه‌وه‌كه‌ی گه‌ڕاینه‌وه‌ و منیش زۆر ماندوو بووم بۆیه‌ ڕاسته‌وخۆ چوومه‌ سه‌ر جێگاكه‌ی خۆم و خه‌وێكی ماندوو وانه‌م شكاند,
به‌یانیه‌كی نوێ و هه‌ستانه‌وه‌یه‌كی جیاواز بوو , چوونكه‌ هه‌ستانه‌وه‌كه‌ له‌ماڵی خۆمان نه‌بوو, وه‌ ئاماده‌كردنی خواردنه‌كه‌ هی ده‌سته‌ جوانه‌كه‌ی دایكم نه‌بوو, به‌ڵكو هی خزمه‌تكاری نێو ماڵه‌كه‌ی مامم بوو, ئیتر به‌هه‌ر حاڵ نانی ده‌ستی ئه‌و ئافره‌ته‌مان خوارد كه‌ هه‌رچه‌نده‌ش هیچ تامێكی نه‌بوو به‌ڵام ناچار بووین كه‌ بیخۆین, وه‌چوونمان بۆ قووتابخانه‌ من و براكه‌م وه‌كو ئه‌وڕۆژانه‌ی پێشوو نه‌بوو كه‌ به‌ پێیه‌كانی خۆمان ده‌ڕۆیشتین بۆ قووتابخانه‌كه‌مان وه‌ چه‌ندیش دڵمان خۆش بوو, ئه‌مجاره‌یان به‌نێو ئۆتۆمبێلێكی به‌رزدا كه‌ دووكه‌سیش له‌ نێوی دا بوون, له‌هه‌مان كاتدا پاسه‌وانی مامم بوون,به‌ڕاستی هیچ خۆش نه‌بوو وه‌كو ئه‌وه‌ی له‌نێو زیندانێك دابووین تاوه‌كو گه‌یشتینه‌ قووتابخانه‌كه‌مان , زۆر بیری ئه‌وڕۆژانه‌م ده‌كرد كه‌ له‌نێو خانووه‌ بچكۆله‌كه‌ی خۆماندا بووین.

ئێمه‌یان گه‌یانده‌ قوتابخانه‌و وه‌ شۆفێره‌كه‌ وتی :پاش ته‌واو بوونی قوتابخانه‌ دێنه‌وه‌ به‌ شوێنتان بچكۆل گیان,كاتێك له‌ قووتابخانه‌ بووم هاوڕێیه‌كی خۆم بیركه‌وته‌وه‌ كه‌ ئه‌ویش میرال بوو, ئه‌و ئێستا له‌م شاره‌یه‌ به‌ڵام چۆن بیدۆزمه‌وه‌ , بۆیه‌ كاتێك له‌ قوتابخانه‌ هاتمه‌وه‌ ,منیش به‌ مامم گوت: كه‌ هاوڕێیه‌كم له‌م شاره‌یه‌ ناوی میراله‌ ئه‌توانی بۆمی بدۆزیه‌وه‌, مامیشم گوتی: ئه‌وه‌ هه‌ر زۆر ئاسانه‌ ئێستا په‌یوه‌ندیه‌ك ده‌كه‌م با بگه‌ڕێن بۆی بزانین له‌ كوێیه‌؟ پاش چه‌ند خوله‌كێك مامم هه‌واڵی هاوڕێكه‌می بۆ هێنام گوتی: ئه‌و ئێستا له‌ ژێر خاكه‌ , واته‌ چی له‌ ژێر خاكه‌, به‌داخه‌وه‌ ئه‌و هه‌فته‌یه‌ك له‌مه‌و به‌ر له‌ ژووره‌كه‌ی خۆیدا به‌ به‌تێك خۆی خنكاندووه‌.
ئیتر ئه‌م هه‌واڵه‌ تووشی شۆكی كردم نه‌م زانی چی بكه‌م بۆیه‌ گوتم: مامه‌ گیان هه‌ر ئێستا بمبه‌ بۆ سه‌ر گۆڕستان , مامیشم وتی: باشه‌ له‌گه‌ڵ دایكم پێكه‌وه‌ چووینه‌ سه‌ر گۆڕی هاوڕێ بێ نازه‌كه‌م , كه‌ ئه‌ویان هه‌رده‌مێك بوو زینده‌ به‌چاڵیان كردبوو, نه‌یان هێشت بگات به‌ ئاواته‌كانی خۆی,بۆیه‌ منیش نه‌مده‌زانی چ وشه‌یه‌ك له‌سه‌ر گۆڕه‌كه‌ی بڵێم چوونكه‌ هه‌رشتێكم بگوتبایه‌ هیچ سوودێكی نه‌بوو, چوونكه‌ ئه‌و ئێستا بۆخۆی نووستوه‌ و ئاگای له‌ من نیه‌,پاش ئه‌وه‌ی له‌سه‌ر گۆڕ هه‌ڵستاینه‌وه‌ و كه‌وتینه‌ ڕێ بۆ ماڵه‌وه‌, كاتێك گه‌یشتینه‌وه‌ ماڵی مامم , ده‌نگی ده‌مه‌قالیه‌كی زۆر گه‌وره‌ ده‌هات كه‌ باوكم و مامم شه‌ڕیان ده‌كرد پێكه‌وه‌ باوكم به‌ براكه‌ی خۆی ده‌وت ئه‌ی بكوژ , منیش له‌ شوێنی خۆم ڕاوه‌ستام و به‌ قسه‌كه‌ی باوكم زۆر تاسام , بۆچی مامم بكووژه‌ باوكه‌؟ باوكم ویستی پێم بڵێت , به‌ڵام مامم گوتی: با ئه‌و نه‌زانێت ئه‌و زۆر بچووكه‌ جارێ , نه‌خێر پێویسته‌ بزانێت كه‌ مامی چ جۆره‌ كه‌سێكه‌ وه‌ چ ده‌ستێكی باڵای هه‌بووه‌ له‌ كووشتنی چه‌ندان ڕۆڵه‌ی كوردی بێتاوان دا,كه‌ خێزانه‌كه‌نیان له‌ تاو ئازاری ڕۆله‌كانیان ڕه‌ش پۆش بوونه‌ وه‌هه‌موو ڕۆژێكیان به‌ ئازاری ڕۆله‌كانیان هه‌ڵده‌ستنه‌وه‌ , ئێستا تێگه‌یشتم بۆ باوكم براكه‌ی خۆی خۆشنه‌ده‌ویست , چوونكه‌ باوكم پیاوێكی مه‌رد بوو , به‌ڵام مامم كه‌سێكی وانه‌بوو, بینین و گوێبیستی ئه‌م هه‌موو ڕووداوانه‌ مێشكی منی زۆر ئاڵۆز كردبوو ,به‌هه‌ر جۆرێك بێت ئیتر ئێمه‌ لێره‌ ده‌ڕۆین واته‌ ماڵی مامم به‌جێ ده‌هێلین , ته‌نیا تاقیكردنه‌وه‌كانی كۆتایم ماوه‌ وه‌ پاش ئه‌وه‌ باوكم گوتی: ده‌ڕۆین بۆ ئیسته‌نبۆڵ هاوڕێیه‌كی منداڵیم هه‌یه‌ له‌و شاره‌یه‌ كه‌ هه‌ر له‌منداڵیه‌وه‌ ئێمه‌ پێكه‌وه‌ گه‌وره‌ ببوین, ئێستا بانگێشتنامه‌ی بۆ من ناردوه‌ و ئێمه‌ش ده‌ڕۆین بۆ ئه‌وێ, له‌وێ ژیانێكی ساده‌ دووباره‌ دروست ده‌كه‌ینه‌وه‌, هاوڕێكه‌ی باوكم ناوی (بڕوا)بوو وه‌ كچێكی گه‌وره‌ی هه‌یه‌ , كه‌ له‌ منداڵیه‌وه‌ به‌بێ نازی دایكی گه‌وره‌ بووه‌, منیش پاش ئه‌و ماندووكردنانه‌ی خۆم توانیم له‌ كۆتایشدا قۆناغێكی خوێندن ببڕم و پێمه‌ بخه‌مه‌ نێو قۆناغێكی تری خوێندن, وه‌ بۆ دواجاریش مامم ئێمه‌ی له‌ باوه‌ش دا گرت و , به‌ ئێمه‌ی گوت هه‌رگیز مامتان له‌ یاد نه‌كه‌ن, منیش تۆزێك له‌ مامم دڵگران ببووم , به‌ڵام منیش بۆ دواجار ماچێكم كرد پێم گوت: خوات له‌گه‌ڵ بێت , ئێمه‌ی تاوه‌كو فڕۆكه‌خانه‌ گه‌یاندو , وه‌ كاتێك سه‌ر كه‌وتین به‌نێو فڕۆكه‌كه‌دا, باوكم باسی ئه‌و هاوڕێیه‌ی خۆی بۆمان كرد,كچم من و بڕوای هاوڕێم كوڕی یه‌ك گه‌ڕه‌ك بووین له‌ حه‌له‌ب, وه‌ ئه‌و كوڕێكی ئازاو چاونه‌ترس بوو هه‌موو جۆره‌ كارێكی ده‌كرد بێ ئه‌وه‌ی گوێ به‌ هیچ شتێك بدات , ئیتر ڕۆژێكیان هه‌لێكی بۆ ڕه‌خسا كه‌ به‌ ناچاری شاره‌كه‌ی خۆی به‌جێ بهێلت و بڕواته‌ شارێكی تر, وه‌ له‌وێ بۆ خۆی ئێستا كۆگایه‌كی بچووكی داناوه‌, به‌ڵام تاوه‌كو ئێستاش ئه‌و هاوڕێیه‌م هه‌ر شانازی به‌ كورد بوونی خۆی ده‌كات كه‌ هه‌رچه‌نده‌ ئه‌و ئێستا له‌نێو وڵاتێكی ڕه‌گه‌ز په‌رست دایه‌, به‌ڵام هه‌میشه‌ كورد بوونه‌كه‌ی خۆی خۆش ویستوه‌, باشه‌ باوكه‌ ئه‌و ئیسته‌نبوڵه‌ كوێیه‌ , كچم ئه‌ویش ده‌وڵه‌تێكی زۆر گه‌وره‌یه‌ له‌نێو ڕۆژهه‌ڵاتی ناوه‌ڕاستدا,وه‌ ئه‌وانیش پارچه‌یه‌كی ئه‌م كوردستانه‌یان بۆخۆیان داگیركردووه‌,وه‌ سته‌مێكی زۆریان لێده‌كه‌ن به‌ درێژایی مێژوویان, جگه‌ له‌وه‌ش به‌ به‌رده‌وامی هه‌وڵده‌ده‌ن بیان چه‌وسێننه‌وه‌ , به‌ڵام كچی خۆم هه‌رگیز چۆكیان بۆ چه‌وساندنه‌وه‌ی خۆیان نه‌داوه‌,چوونكه‌ ئێمه‌ی كورد به‌ درێژایی مێژوو جه‌نگاوین له‌گه‌ڵ هه‌موو چه‌وساندنه‌وه‌یه‌ك و سته‌مكاریه‌ك كه‌له‌به‌رامبه‌رمان كراوه‌, واته‌ باوكه‌ گیان ئێستا پارچه‌یه‌كی تری كوردستان له‌و وڵاته‌دا به‌ بێنازی كه‌وتووه‌ بۆخۆی, ڕاسته‌ كچم پارچه‌یه‌كی تری كوردستانه‌كه‌مان له‌و وڵاته‌دایه‌, به‌ڵام كچی خۆم به‌بێناز نه‌كه‌وتووه‌ چوونكه‌ ئه‌وانیش به‌ به‌رده‌وام سینگی خۆیان ناوه‌ته‌ به‌رده‌م تێكۆشان,له‌ قسه‌كانی باوكم تێگه‌یشتم كه‌ له‌نێو دڵیدا چ گڵپه‌یه‌كی ئاگر هه‌ڵگیسراوه‌ , به‌وقسه‌نای باوكم كه‌چه‌ند كاتژمێرێك كردی ئیتر فڕۆكه‌كه‌ گه‌یشته‌ نێو ئیسته‌نبۆڵ, ئێمه‌ش دابه‌زین له‌ نێو فڕۆكه‌كه‌دا وه‌ چاوه‌ڕێی هاوڕێكه‌ی باوكمان كرد تاوه‌كو بگاته‌ لامان, به‌ڵام ناوێك له‌ نێو فڕۆكه‌خانه‌دا نووسرابوو, كه‌ كاتی خۆی بۆ جارێك من گوێبیستی ببوم نووسرابوو (ئه‌تا تورك) منیش گوتم:
باوكه‌ ئه‌م ئه‌تا توركه‌ كێیه‌, باوكم كه‌سێكی زۆر ڕۆشنبیر بوو زۆرترین زانیاری لای بوو , هه‌میشه‌ش ده‌یوت ده‌بێت مڕۆڤه‌كان خاوه‌نی زانیاری جۆراو جۆر بن ده‌رباری باته‌كان و به‌ تایبه‌تیش ده‌رباره‌ی نه‌ته‌وه‌كه‌ی خۆیان , كچم ئه‌وه‌ ناوی مسته‌فا كه‌مال ئه‌تا توركه‌ , ناسراوه‌ به‌ باوكی توركه‌كان, ئه‌وه‌ یه‌كێك بوو له‌ فه‌ڕمانڕه‌واكانی ئه‌م شاره‌ له‌پاش جه‌نگی جیهانی یه‌كه‌م دا وه‌ له‌هه‌مان كاتیشدا به‌ یه‌كێك له‌و كه‌سانه‌ داده‌نرێت كه‌ دووژمنایه‌تیه‌كی سه‌رسه‌ختی میله‌تی كوردی كردوه‌ له‌ هه‌موو ڕوویه‌كه‌وه‌,هه‌میشه‌ هه‌وڵی ده‌دا ناوی كورد بسڕێته‌وه‌ له‌ مێژوودا,كه‌چی له‌ كۆتایی دا نه‌یتوانی له‌هه‌وڵكه‌ی سه‌ركه‌وتووبێت كچه‌ تاقانه‌كه‌م , باشه‌ باوكه‌ گیان بۆ هه‌موو كه‌سێك ڕقی له‌ ئێمه‌ ده‌بێته‌وه‌ , خۆ ئێمه‌ هیچ تاوانێكمان نیه‌ وه‌ ئێمه‌ چیمان لێیان كردووه‌ تاوه‌كو ئه‌وان به‌م شێوه‌یه‌ سته‌مان لێ بكه‌ن,باوكم به‌م پرسیاره‌ بێده‌نگ بوو پاشان گوتی:
هه‌موو پرسیارێكت وه‌ڵام ده‌ده‌مه‌وه‌ به‌ڵام ئه‌مه‌یان وه‌ڵامت ناده‌مه‌وه‌ چوونكه‌ ته‌نها داهاتوو وه‌ڵامی هه‌موومان ده‌داته‌وه‌, هاوڕێكه‌ی باوكم گه‌یشته‌ لای ئێمه‌ و ئێمه‌ی برد بۆ ماڵه‌كه‌ی خۆی , وه‌ به‌م شێوه‌یه‌ باوكم له‌ گۆگای هاوڕێكه‌ی ده‌ستی به‌كار كردوو ئێمه‌ش بۆخۆمان خانوویه‌كی به‌ كرێمان گرت و, بۆ خۆمان تێدا نیشته‌جێ بووین,وه‌ هه‌رچه‌نده‌ ژیانما وه‌كو پێشووتر نه‌بوو كه‌ له‌ شاره‌كه‌ی خۆمان بووین, به‌ڵام به‌هه‌ر شێوه‌یه‌ك ڕۆژه‌كانی ژیانمان تێپه‌ڕاند له‌م شاره‌ بێگانه‌یه‌,وه‌ من و براكه‌م ده‌ستمان به‌ خوێندن كرد له‌و شاره‌دا, له‌ خوێندنگایه‌ك كه‌ تایبه‌ت بوو به‌ كۆچ به‌ره‌كان, ئیتر به‌و شێوه‌ من براكه‌م درێژه‌مان به‌ خوێندنه‌كه‌ی خۆمان دا, وه‌كاتێك ده‌هاتمه‌وه‌ بۆ ماڵه‌وه‌, به‌ڵام ماڵه‌ ڕاسته‌قینه‌كه‌ی خۆمان نه‌ , به‌ڵكو ده‌هاتمه‌وه‌ بۆ ماڵه‌ بێگانه‌كه‌مان, چوونكه‌ من له‌شارێكی بێگانه‌دا بووم , وه‌ بینیم باوكم به‌دیار ته‌له‌فزیۆنه‌وه‌ دانیشتوه‌ سه‌یری ڕووداوی دڵته‌زێن ده‌كات ,منیش به‌ باوكم گوت: باوكه‌ ئه‌مه‌ ماڵه‌ ڕاسته‌قینه‌كه‌ی خۆمانه‌ وا وێرانی ده‌كه‌ن بۆمان, به‌ڵێ كچم ئه‌مه‌ ماڵه‌ ڕاسته‌قینه‌كه‌ی ئێمه‌و هه‌موو كوردێكی خێر له‌ خۆ نه‌دیوه‌, باوكم فرمێسكه‌كه‌ی وه‌كو باران ده‌هاته‌ خواره‌وه‌ , باوكه‌ گیان تكایه‌ مه‌گری, كچم ئه‌وه‌ گریانی من نیه‌, ئه‌وه‌ گریانی نێو ناخی هه‌موو كوردێكی سته‌ملێكراوه‌, ئه‌وه‌ گریانی هه‌موو دایكێكی كورده‌ بۆ له‌ ده‌ستانی ڕۆڵه‌ ئازاكانیان له‌هه‌ر چوار پارچه‌ی كوردستانمان , كچه‌كه‌م ڕۆژانه‌ له‌ هه‌رچوار پارچه‌كه‌مانه‌وه‌ چه‌ندین ڕۆڵه‌ی قاره‌مانمان ماڵ ئاوایی له‌ خاكه‌كه‌یان ده‌كه‌ن,وه‌ ئه‌وانیش به‌وحه‌سره‌ته‌وه‌ ده‌چنه‌ ژێر خاكه‌كه‌یان كه‌ ڕۆژێك بێت سه‌ر خاكه‌كه‌یان ئازاد بكرێت, ئازاره‌كانی باوكم زۆر گه‌وره‌ بوو چوونكه‌ ئه‌و یه‌كێك بوو له‌ نموومه‌كانی ئازاری گه‌له‌ سته‌ملێكراوه‌كه‌مان, گه‌وره‌ترین ئازاری باوكم كه‌ هه‌ڵیده‌كێشا بۆ ئێمه‌ بوو چوونكه‌ به‌ردوام ده‌ی گوت:

من ودایكت ته‌مه‌نێكی پڕ له‌ ناخۆشیمان تێپه‌ڕاند له‌سه‌ر خاكه‌ پارچه‌كراوه‌كه‌مان, بۆیه‌ نامه‌وێ دووباره‌ تۆ و براكه‌ت هه‌مان ئه‌و ناخۆشیانه‌ی ئێمه‌ ببیننه‌وه‌, به‌م ئازارانه‌وه‌ ڕۆژو مانگ وساڵمان تێپه‌ڕاند ,منیش به‌بێ یادكردنه‌وه‌ی ساڵی له‌دایك بوونم ته‌مه‌نم گه‌یشته‌ هه‌ژده‌ساڵ و قۆناغێكی تری خوێندنم تێپه‌ڕاند, به‌ڵام نه‌م ده‌زانی چۆن گه‌یشتمه‌ ئه‌م ته‌مه‌نه‌ , باوكیشم ڕووخساری زۆر گۆڕا وه‌دایكیشم به‌هه‌مان شێوه‌ به‌ڵام دایكم ئازاره‌كانی خۆی هه‌رده‌م له‌ نێو دڵی خۆیدا هێشته‌وه‌و هیچ كات نه‌یان ڕشت, برا بچووكه‌كه‌م عیسا ڕووخسارێكی جیاوازی لێی هه‌ڵكه‌وت سمێڵێكی زۆر جوانیشی بۆ هاتبوو, به‌رده‌وام پێم ده‌وت پشیله‌ بچكۆله‌كه‌,كه‌چی ئه‌ویش زۆر تووڕه‌ ده‌بوو, بارودۆخی ژیان هه‌روه‌كو خۆی مابوو,به‌ڵام له‌پاڵ ئه‌و هه‌موو جه‌نگ و نه‌هامه‌تیانه‌ی كه‌ ئێمه‌ بینیمان, هیچ كات خۆشه‌ویسته‌ خێزانیه‌كه‌مان كۆتایی پێ نه‌هاتبوو, كه‌چی ڕۆژێكیان گوێبیستی ئه‌وه‌ بووم كه‌وا ڕێكخراوێكی بیانی تایبه‌ت به‌ بواری هونه‌ری كراوه‌ته‌وه‌, منیش سه‌رجه‌م وێنه‌كانی خۆم برد بۆ ئه‌و ڕێكخراوه‌, ئه‌مه‌ ڕه‌نگه‌ هه‌لێكی ژیانم بۆ هاتۆته‌ پێشه‌وه‌ بۆ ئه‌و خه‌ونه‌ی منداڵیم, به‌هه‌ر حاڵ وێنه‌كانم پیشانی ڕێكخراوه‌كه‌دا, پاش ئه‌وه‌ی سه‌یری وێنه‌كه‌ی منیان كرد, كوڕێكی بیانی كه‌ سه‌ر به‌و ڕێكخراوه‌ بوو , منی بانگ كرد و وێنه‌یه‌كی منی له‌ده‌ست بوو, گوتی: مانای ئه‌م وێنه‌یه‌ی تۆ چی ده‌گه‌یه‌نێت , به‌ڵام به‌زمانی بیانی قسه‌ی له‌گه‌ڵ من كرد , كه‌سێكی تر له‌ ته‌نیشتیه‌وه‌ بوو قسه‌كانی ئه‌وی بۆ من وه‌ڕگێرا, ئه‌و وێنه‌ی هی خۆم و براكه‌مه‌ كه‌ وێنه‌ی كچ و كوڕێكی كوردی خێر له‌خۆ نه‌دیوی هه‌ر چوار پارچه‌كه‌ی كوردستانه‌,كه‌ دایم به‌حه‌سره‌ته‌وه‌ ته‌ماشای ئازادكردنی خاكه‌كه‌یان ده‌كه‌ن وله‌چاوه‌ڕێی ژیانێكی ئاسووده‌ن له‌سه‌ر خاكه‌كه‌ی خۆیان دا, ئیتر كوڕه‌ بیانیه‌كه‌ سه‌رسام بوو به‌ وێنه‌كه‌و پاش ئه‌وه‌ی كه‌ چه‌ند كاتژمێرێك چاوه‌ڕێم كرد,منیان بانگی ژوورێك كرد , وه‌له‌گه‌ڵ به‌ڕێوبه‌ره‌كه‌ هه‌ندێك قسه‌مان كردو له‌ كۆتایدا به‌ڕێوبه‌ره‌كه‌ گوتی: ئێمه‌ كاره‌كانی تۆمان زۆر به‌دڵه‌ تۆ كه‌سێكی زۆر لێهاتوویت بۆ وڵاته‌كه‌ی خۆتدا, به‌تایبه‌تیش له‌ كێشانی وێنه‌ی ئه‌و كچ و كوڕه‌ كه‌ له‌ ته‌نیشتی یه‌كتریه‌وه‌ دانیشتوونه‌و فرمێسك ده‌ڕژێنن, بۆیه‌ ئێمه‌ بڕیارمان دا ئه‌و وێنه‌یه‌ی تۆ له‌ له‌نده‌ن له‌نێو پێشانگایه‌ك دانمایش بكرێت بۆ ئه‌وه‌ی هه‌موو جیهان بزانێت كه‌ نه‌ته‌وه‌ی كورد چه‌ندین سته‌می له‌به‌رامبه‌ردا ده‌كرێت و ,كه‌چی له‌ پاڵیشیدا به‌ خۆڕاگری و سه‌ربه‌رزی ماونه‌ته‌وه‌ , وه‌ له‌هه‌مان كاتدا تۆ له‌گه‌ڵ خێزانه‌كه‌ت ده‌ڕۆن بۆ ئه‌وشاره‌و له‌وێ درێژه‌ به‌خوێندنی شێوه‌كاریه‌كه‌ت ده‌ده‌یت .

منیش له‌خۆشیدا نه‌م ده‌زانی كه‌ چ وشه‌یه‌ك بڵێم, چوومه‌وه‌ بۆ ماڵه‌وه‌ و به‌ماڵه‌وه‌م ڕاگه‌یاند, دایكه‌ باوكه‌ كاكه‌ كاره‌كانی منیان به‌دڵ بوو, وه‌ ڕازی بوون كه‌ من له‌ ده‌ره‌وه‌ی وڵاتدا بخوێنم, هه‌موومان كۆبووینه‌وه‌ باوه‌شێكی خێزانیمان به‌ یه‌كدی دا كرد,منیش پێانم گوت: ده‌بێت ئێوه‌ش له‌گه‌ڵم بێن , باوكم ڕاسته‌وخۆ گوتی: بێگومان دێین كچم, چوونكه‌ ئێمه‌ خۆ هه‌ر ده‌ربه‌ده‌ری وڵاتانی بێگانه‌ین هیچ جیاوازیه‌ك نیه‌,بۆیه‌ ئه‌مجاره‌ له‌نێو فڕۆكه‌خانه‌دا پێش ئه‌وه‌ی فڕۆكه‌كه‌ بفڕێت , سه‌یرێكی دواوه‌وه‌ی خۆم كردو گوتم: ئێستا وا دووباره‌ ده‌فڕم به‌ره‌و ئاسمانی وڵاتێكی تری بێگانه‌ وه‌ چۆنیش من له‌سه‌ره‌تادا یه‌ك خه‌ونم هه‌بوو كه‌ ببم به‌ شێوه‌كارێك,كه‌چی له‌ئێستادا به‌شێك له‌و خه‌ونه‌م هاته‌دی , به‌ڵام خه‌ونه‌ گه‌وره‌كه‌ی ئه‌م جاره‌م ئه‌وه‌یه‌ كه‌ له‌ئاسمانی بێگانه‌وه‌ بفڕم, له‌ ئاسمانی كوردستانه‌ یه‌ك پارچه‌كه‌م دا بێمه‌ خواره‌وه‌ , وه‌ ببینم ئاڵا كه‌ی كوردستانم به‌ گه‌شاوه‌یی له‌سه‌ر یه‌ك پارچه‌كه‌ی كوردستان ده‌گه‌شێته‌وه‌, وه‌ ئه‌و كاته‌ منیش به‌ده‌نگی به‌رزه‌وه‌ هاوار بۆ هه‌موو جیهان ده‌كه‌م وه‌ ده‌ڵێم من زیلانی كچه‌ كوردی شێوه‌كارم…

                                                 بێ كۆتایی...

*یه‌ك پارچه‌یی و سه‌ربه‌خۆیی كوردستان نه‌ك ته‌نها خه‌ونی زیلانی كچه‌ شێوه‌كاره‌, به‌ڵكو خه‌ونی هه‌زاران تاكی كوردی هه‌رچوار پارچه‌كه‌یه‌,وه‌ له‌گه‌ڵ هه‌ر كوردێكی تردا كه‌ له‌هه‌رشوێنێكی ئه‌م جیهانه‌دا به‌بێ نازی ده‌ژین…
*ئه‌حمه‌د كامه‌ران

Previous
Next

Leave a Reply