میری مه‌ره‌كه‌ب … ئه‌مین بۆتانی
دیاری بۆ گیانی عه‌بدلغه‌نی بۆتانی
حه‌رفێكی ره‌شتاڵه
چۆله‌كه‌ی مه‌عنای
به ئاسمانی مه‌تنه‌وه نه‌هێشت!!،
خڕیلانه‌یه‌كی بزێو
له‌و پێده‌شته‌ی بۆتان
له گرده‌پان،
حوبری پرسیار
له ماسیه‌كانی تینوێتی
ده‌پارزنێ.
له ریوایه‌تێكدا هاتووه؛
له‌سه‌ر خه‌ره‌ندی زه‌ینالی
خۆی و پۆلێك وشه‌ی هاوڕێ ی
به پێخواسیی
به ناو ته‌باره‌ی ره‌شگوڵ ده‌كه‌ون،
هه‌رچی هێلكه‌ی فڕین هه‌یه
ده‌یگرنه به‌رسیله‌ی مراز.
كه‌وشه‌كانیان
پڕ ده‌كه‌ن له گوڵه گۆگه‌م،
ده‌ستوپه‌نجه‌ی كه‌لام
ره‌شهه‌ڵده‌گه‌ڕێ و
له‌و رۆژه‌وه
غه‌نی و وشه
كتومت له‌یه‌ك ده‌چن و
ده‌بنه میراتگری حوبر.
جار هه‌بوو له جیاتی خۆی
وشه‌یه‌كی عاقڵی ده‌نارده‌وه ماڵ،
خۆیشی له‌گه‌ڵ مه‌له‌كانی مانا
به‌دوای سڕی بێماناییدا
ده‌بووه عه‌وداڵ.
له‌ته‌ك ره‌وه‌زی رسته‌دا
نشتیمانێك وا ده‌پشكوێ؛
ئه‌م هه‌موو خۆڵه
له كوێ ی ته‌ڕبوون هه‌ڵخه‌م؟.
له‌ته‌ك سه‌به‌ته‌ی چاوه‌ڕوانیی
خه‌ریكه مێوژی ئه‌مه‌ل ده‌ڕسكێ؛
من ئه‌م هه‌موو بارانه
له كوێ ی وشكبوونه‌وه هه‌ڵگرم؟.
قه‌رسیل قه‌رسیلی خودایه
بنووسه ئاگر؛
له یه‌ك رسته‌ی موبییندا:
” كێ ئه‌جری بێ وڵاتییم ده‌داته‌وه”؟،
له جزمی فه‌نا
كێ غوربه‌ت و هۆگریی
هه‌ڵدێنێ له چیڕۆكی ماڵ؟،
له جزمی به‌قا
كێ خڕنووكی قه‌فه‌س ده‌سوێ
بۆ په‌ڕ و باڵ؟،
سه‌برێكم لێ بگرن
من هێڵكاریه‌ك ده‌كێشم
بۆ جه‌ور و سته‌م،
برین موسیبه‌ته
یان سه‌به‌ته‌ی زۆر و كه‌م؟!.
گوتم سه‌برێكم لێ بگرن؛
هه‌ر هه‌موویتان وه‌ڵام ده‌ده‌مه‌وه،
ل جزیرا بۆتان
هه‌تا پونگینه،
زه‌هری گومانم راونا
به‌و شه‌كری یه‌قینه،
ئه‌و شه‌وه كاغه‌زم پێ نه‌بو
به‌ڵام هه‌ر هه‌موویم له بیره،
ئێمه هه‌تا لای ئه‌شكه‌وته‌كه
یه‌ك بووین؛
په‌ڵه هه‌ورێكی سپی
به ته‌وێڵی جوودی یه‌وه،
دواتر
سه‌گی ئه‌و خه‌ونه
پێنجه‌ممان بوو،
ئاااای گابه‌ڵه‌كی دنیا
ئه‌و شه‌وه چی كرد!!!
كاسه و كه‌وچكی عه‌داله‌ت
به سه‌مای ئه‌هریمه‌ن
ورد و خاش..
ئه‌و هه‌موو فه‌قیری یه
چۆن خه‌وی لێ ده‌كه‌وێ غه‌نی؟!،
له هیچی به‌لاش.
بڵێ من خه‌ریكی نووسینم؛
كاتم نیه بۆ خوێندنه‌وه!!!؛
بڵێ من
ده‌سته راستی
حوبرێكی تووڕه‌م،
پێی گوتووم
ئه‌گه‌ر هیچت شك نه‌برد؛
مه‌خوێنه‌وه
هه‌تا وشه‌یه‌كی ته‌ڕ ته‌ڕ
به فرمێسكی شۆڕش نه‌یه‌ته خه‌ونت،
هه‌تا چاپی نوێی ئازادی
نه‌گاته كتێبخانه‌ی نه‌وازش
هیچ مه‌ڵێ.
بڵێ من
ده‌سته چه‌پی ئه‌و هێڵه راسته‌م
به خواروخێچی
به‌رتاندایه له‌وحی ئختیار.
من كاتی خۆی
هه‌موو شتێكم به زیاده‌وه نووسیبوو؛
داتانه كێ؟!
به كام ده‌ست وه‌ریگرت؟،
ناشێ دڵیتان ره‌نجاند بێ!!!
ده‌ترسم
له‌سه‌ر ئه‌و كڵپه‌ی هه‌ناوی
باسی ئاگر و ماگرتان لا كرد بێ!!!
ئه‌و مه‌شخه‌ڵی
راهاتووی كوێستانه؛
به ره‌چه‌ڵه‌ك
پشتاوپشتی رێبه‌ندانه؛
جه‌فای ده‌ورانی كوردی چه‌شتووه
هه‌رگیز خه‌می ئه‌وتان نه‌بێ؛
ده‌یان ساڵ
ئه‌و به‌رده‌ستیی تاڵیی كردووه،
زه‌مهه‌ریری
بۆ سه‌رما ماڵیی كردووه.
حه‌یف…
حه‌یف… ده‌ترسم
دوای گوڵزاری وه‌ته‌ن؛
باڵكۆنی خه‌یاڵی ره‌نگینی ئه‌وتان
به فیرده‌وس فریو دابێ!!!
ئامممان…
ئه‌و شتانه‌ی له‌گه‌ڵدا باس نه‌كه‌ن!
دوای ئه‌و هه‌موو ته‌راتێنه
تاقه‌تی پیاسه‌ی نه‌ماوه.
به بیانووی ئاخیره‌ت
دنیای بیر نه‌هێننه‌وه؛
ده‌نا غه‌ریبی مه‌ینه‌تیی كورد ده‌كا و
له‌و چۆڵه‌وانییه نشتیمان كوا؛
له‌و جه‌ننه‌تولمه‌ئوایه
به كام ئومێده‌ی ئیستیقلال ژیر بێته‌وه؟!،
پێم بڵێن كورد چی به‌سه‌ر دێ؟
كوا ته‌عقیبی خه‌به‌ری كورد له‌وێ؟!
ئه‌و له مووسڵ
داد و بێدادی بوو
به‌ده‌ست وادی حه‌جه‌ر و دیجله‌وه،
هه‌میشه
سه‌ری لای هه‌وری هه‌ندرێن و
قاچه‌كانی له نێو گیرفانی سه‌فه‌ر،
ئه‌و له هه‌ولێر
ره‌شنووسی راز و نیازی
ده‌نارده لای حه‌زره‌تی خه‌ته‌ر،
ئه‌و پیاوه به كه‌ڵكی ئێوه نایه
بۆ بردتان؟!.
بۆ ئێوه زانیتان؟
ئێمه كێ بووین؟؛
هه‌تا دوو فه‌رسه‌خ نزیك ئه‌شكه‌وته‌كه‌ش
ده‌ست و دڵمان یه‌ك بوو،
هه‌ر كه سفره‌ی رازاوه‌ی خه‌یاڵ
ئه‌ژنۆكانی لێ سه‌ندین؛
چوارمشقی به‌ربووینه وێزه‌ی مه‌حاڵ.
ئه‌و هه‌موو ته‌پ و تۆزه
مه‌خه‌نه ئه‌ستۆی كه‌س؛
من به پێ هاتم.
ده‌مێك بوو
ئه‌سپه‌شێكانی ئه‌زه‌ل
تڕوتفاقی جه‌نگیان
بۆ گه‌یاندبووینه بناری ئه‌جه‌ل.
ئه‌جه‌ل…
ئه‌وه هه‌موو چیڕۆكی خه‌تاكه نیه!!!
كه‌س كاغه‌زی كه‌سی نه‌خوێنده‌وه
ئێمه‌ش له‌ناچاریی
ده‌ستمان كرد به نووسین…
ئه‌مین بۆتانی
22/7/2019
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
