Skip to Content

گەرمایی شەقام … ئیسماعیل سابیر

گەرمایی شەقام … ئیسماعیل سابیر

Closed
by تشرینی یه‌كه‌م 6, 2019 General, Poems

بە پەیڤەکانتەوە، بە ڕۆیشتن و هاتنەوەکانتەوە، دەڵێم: تۆی
بەگەمەی تێپەڕین و تێنەپەڕینەکانتەوە، من هەر دەڵێم: تۆی
بە نەگەیشتن و دیسان دەیڵێمەوە؛(بە چاوەکانیشتەوە) پەخشانە شیعر تۆی، کە لە قورگ و کەلێنی ددان و زمانم ڕادەپسکێ، ڕەشاییت له جیات گلێنە بەسەر وشەمدا شۆڕدەبێتەوە. گوێبگرە دەڵێم: تۆی…

کات مناڵێکی سەرەڕۆ بوو وەک دیارنەمانی تەڕایی لە نێوانمان بێئاگا هەڵخلیسکا
(چەشنی سووڕت لەسەر کاشییەکاندا خوێنم لێ دەڕۆیی بانگت نەیپەرژاندمەوە ناو ڕێزمان، بۆیەش ڕام دەکرد بەدوای ئارەزووی زیاتردا)
بەشکستەکانمەوە پانتایم بووەتە قەرەباڵغیت،
دیارنەمانت زەوی چاومی تەنیوە، هەوا(لەشێوەتدا نیە)
دەستم لە وێنەکاندا تۆی بۆ نادۆزرێتەوە،
کەچی بۆ خۆ گەرمکردنەوەی شەوان، مقەبای تەڕ دەکەمە ئەلبوم و بۆ داگیرسانی پێکەنینەکانت عەرد دەسووتێنم،
لە داخان شۆفێری دەکەم، بەماشێنەکەم پێ لە قوتووە بەتاڵەکانی” ئیسکان “دەنێم
کەچی لە شەقامەکان وەک عارەبانەی هەژارانی شەو پارێزراو بووم چونکە دڵم لە گەراجەکاندا بۆی بەجێما
کەڕووم لێ نیشت چونکە بەتەنیا هەوای گەرم لێیدام
چونکە دەستم هەمیشە چاوەڕوانبووە لەناو کەلێنی پەنجە ساردەکانیدا عەمباربکرێت.
زمانم بوو وابزانم قەت نەبووە لە سەر نینۆکەکانیدا هاوشێوەی فلچەیەک غەمباریم نەنەخشێنێ؟
خۆ پۆلیسی بازگەکان شاهێدی ئەوەن
سەرخۆشێکی هاوڕێت لە خەمی تۆدا بتڵێکی زیاتری بۆ بێ غیرەتیت هەڵدا
سەربادان و دەست ڕاوەشاندنەکانت لە مەستیەوە نەبوون
دەنگبەرزیت گوتت چەن خۆشە لەناو ماشێنەکاندا باوشی پێدابکەم!
لە ڕیتمی هەموو گۆرانیەکان ئەوکاتم باڵات پێ خۆشتربوو،
چونکە دارستانی ئەوکاتم بووی زیاتر لەو وشە خراپانەی گوتم.

لەبەر ئەوەشە گۆرانیەکان بەهەمانشێوەی تۆ،
ئەوکاتیان وەک ئێستا بریندار نەدەکردم.

شۆستەکان شاهێدبوون، شارەوانی و زێرەڤانی تەنیا تووڕەییان بۆم دەهاوێشت
چونکە دەیانزانی پیاوێکی (بێکێشەم) دەمێکە پسولەی باجم لەداگیرکردنی ئەو هەموو ڕووبەرەی ئەڤین داوە
هەربۆیش داڕماوی و کەلوپەلەکانی شکستم دەهێنا دەرەوە و
لەسەر جادەکاندا ئازارم تێدا نمایش دەکرد.

سێبەرەکەشت بەهەمانشێوەت شاهێدبوو کە تێدەپەڕی؛
زۆر غەمگین بووی زۆر زۆر…

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish