با یەکێک بێت پێمان بڵێت گوێگرتن لە موزیک وانابێت…. هەتوان یاسین

لەهەفتەی ڕابردووەوە چەند چالاکییەک هەبوو،ڕۆیشتم بۆ دوانیان (فێستیڤاڵی فیلمی سلێمانی) یەکەم ڕۆژ کە ڕۆشتم و یەکەم فیلمم سەیرکرد،لە کاتی سەیرکردنی فیلمەکە ئامادەبووان لە نێوان بەشێکی زۆر لە دیمەنە هەستبزوێنەکان وەک ئەوەی کارێکی باش بکەن چەپڵە و فیکەیان لێدەدا،کە ئەوە پێناسێکی خراپ بوو بۆ نیشاندانی ئاستی هۆشیاریمان بە میوانە بیانییەکان.
دووەمیان کۆنسێرتی ساڵانەی ئۆرکێسترای سلێمانی بوو،کە دوو بارە بەر ئەو کلتوورە ناشرینە کەوتمەوە و بینیم وەک چۆن نازانین چۆن سەیری فیلم بکەین،چۆن بخوێنینەوە،چۆن بخەوین،چۆن پیاسە بکەین،چۆن یەکتریمان خۆشبوێت…هتد بەهەمان شێوەش نازانین گوێگرتن لە موزیک چۆنە.
ئەو ڕۆژە بە چاوی خۆم بینیم کە پێش نمایشەکە ئاگەدارکراینەوە لەوەی کە فلاشی کامێرە بەکارنەهێنین،بەڵام چەند چرکەیەکی نەخایەند دوای ئەوەی ڕابەری ئۆرکێسترا هاتە سەر ستەیج فلاشێکی بەهێزی کامێرا بەر ستەیجەکە کەوت.
ئاگەدارکراینەوە کە دەنگە دەنگ و حەتتا چپەچپیش نەکەین،بەڵام لەلایەکەوە گوێم لە گریانی منداڵ و لەلایەکیشەوە گوێم لە قاقای پێکەنینی گەورەکان بوو.
ئاگادار نەکراینەوە،بەڵام کاتێک بڕیاردەدەین بچین بۆ کۆنسێرتێکی ئۆرکێسترالی،پێویستە هۆشیاری ئەوەمان هەبێت کە دەشێت پارچە هەبێت لە چەند جووڵەیەک پێکبێت،کە ناکرێت لە نێوانییاندا چەپڵە لێبدەین،بەڵام دوبارە گوێم لە چەپڵە بوو و هۆڵی سینەماکەی بیرخستمەوە،،ئەگەر من ژەنیارێکی ئەو ئۆرکێسترایە بم،،بێگومان هیچ شتێک پاڵم پێوە نانێت بۆ ئەوەی بەباشی ڕاهێنان بکەم و تۆنی پاک و ڕەنگی جوان پێشکەشی گوێگرێک بکەم کە ڕێزی کارەکەمی لەلا نییە،بۆیە بەتەواوی پێموایە ئەو دوو لایەنە ڕاستەوانە هاوڕێژەن،بوونی گوێگری باش یەکسانە بە بوونی ئۆرکێسترا و دانەر و ژەنیاری باش.
بۆیە هیوادارم یەکێک بێت پێمان بڵێت گوێگرتن لە موزیک وانابێت

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.