Skip to Content

پووکانەوەی گەرای گومان … شیعری : عەبدوڵا سڵێمان(مەشخەڵ)

پووکانەوەی گەرای گومان … شیعری : عەبدوڵا سڵێمان(مەشخەڵ)

Closed
by تشرینی یه‌كه‌م 9, 2019 General, Poems

بە ڕاپەرینی ئۆکتۆبەری ٢٠١٩ی عێراق پێشکەشە


بزانن چۆن هەنگاو لەنێو گلێنەکانا ڕێ ئەکا
هاوار دەبێ بە کوانووی دڵێکی جۆشدراو
چاویش بە پەنجەرەی بیر و زەردەخەنەش بە ئاڵای بەرزی تووڕەیی
ئیتر گەرای گومان لە کوێی شیعر دانێم
کاتێ شەقام سوور دەبێت و شار دەبێتە تابلۆیەکی برسی و یاخی
کاتێ ترس جانتای سەفەر هەڵدەگرێت و
کۆچ دەکا بۆ سنوورەکانی ئەودیو ژین
ئیتر گومان لە چیبکەم ؟
لە تیژیی نووکی شمشێری ئیمامەکان
یان لە تەقەی چەکی دەستی فریوخواردووە بێچاوەکان
لە خوێندنی نزای دایکانی نێو کۆلیتە قوڕاوییەکان
لە جەربەزەی گەنجەکان و بیم شکێنی ڕاپەریووی نێو کۆڵانە بێ ناسنامەکان و ژمارەکان
لە برسێتی چۆلەکەیەک
لە تینووێتی ماسییەکی کوژراوی نێو ڕووباری خەم
لە ئارەقەی ڕژاوی سەر نێوچەوانی کرێکارێکی سفرە چۆڵ
نا..نا ئەوەی ئەمڕۆ شەقامەکان دەهەژێنێ
سۆراخی نانێکی گەرم و
گەڕانە بەدوای ژیان و
قۆڵ کردنە قۆڵی پێکەنینێکی سادەی
هەناسە و ئۆخەی دڵێکی شەقار شەقاری پڕ خوێیە
ئەوەی ئەمڕۆ گڕ لە ستەمکار بەردەدا
ڕوحێکی پڕ لە شۆڕش و پڕ لە برینی بە سوێیە.

چواری تشرینی یەکەمی ٢٠١٩

mm

ساڵی 1964 لە شاری کەرکوک لە دایک بووە. خوێندنی سەرەتایی و ناوەندی و ئامادەیی وپاشان پەیمانگای تەکنەلۆجیای لە ساڵی 1986 هەر لە کەرکوک تەواو کردووە. لە سەرەتای هەشتاکانی سەدەی رابردووەوە شیعر دەنووسێ و لە زۆربەی گۆڤار و رۆژنامەکانی کوردستان و دەرەوەی کوردستان و سایتە ئەلەکترۆنییەکان شیعر و وتاری رەخنەیی ئەدەبی و سیاسی و جەماوەری بڵاو کردۆتەوە.

Previous
Next
Kurdish