ده بێره‌وه … سه‌ردار جاف
ده‌بێره‌وه
جگه‌ر سوتاوی دوێنێم
له خه‌م و بێداری ڕابووم، هه‌ناسه‌م له شنه‌ی ده‌ریاوه
به شه‌ونمی سپێده سپاردووه
وا تیشكه‌ڵانی هه‌تاویش كرانه‌وه و
ئه‌و ده‌مه‌ی به‌سته‌ڵه‌كیش ده‌توێته‌وه
ژانی گوڵێ
له قه‌د باخچه‌ی ئه‌وین ڕا
بۆن و به‌رامه‌ی خۆی به به‌ژن و باڵای منا كردووه
ده‌بێره‌وه…….
با ئیدی ئازاره‌كانم
به مه‌رقه‌دی یاخی بوونتا هه‌ڵنه‌زنێ
شه‌رابی مه‌ستبوونی ئیشقم
پێ بنۆشه
له حزووری حه‌رزه‌تی تۆدا ئه‌ی یارم
هه‌ی نمه شه‌ونمی خه‌ونم
ڕاچه‌نینی هاتنه‌وه‌كه‌ت
به لێوی وشك هه‌ڵاتووما
دابپۆشه
ده‌بێره‌وه …….
با درێژه‌ی نامه‌ی ئیشقم ، ته‌زووی ته‌زینم سڕ بكا
له‌و ڕێگاوه ئولفه‌ت بگرێ
ئیدی له‌رزۆكی هه‌ڵ بێت و
ئاشنای بوخچه‌ی چاوانت بێ
ئه‌زیزه‌كه‌م
له نیگا غه‌مزه‌ی چاوته‌وه
موژده‌یی خۆتم پێ بده
با مه‌ستی ئه‌و ڕێگا دووره‌ی پێ بشكێنم
ژوانم به باڵات بگرم
ئۆخه‌ی بوونم له به‌ر ده‌رگای
باوانت بێ
ده‌بێره‌وه …….
ئاونگبارانی چیمه‌نی بیلبیله‌كه‌ی چاوی من به
سۆمام ده‌بێته ژیّر ڕاخه‌ری پڕ باران و
هه‌نگاوێكی شه‌ونمی به سه‌را بنێ
ژینی نوێم پڕ بۆن بكه‌وه
په‌نجه‌كانم
تینووی تاڵ تاڵی پرچتن، كه بێ من بژ و ژاكاون
چاوه‌كانم بۆ دیده‌نی قامه‌تی تۆ
دوا سه‌فه‌ری ڕێی كردووه
له گه‌ڕانه‌وه‌ی ئه‌مجاره‌ت
ئیشق و دڵی تازه مه‌یلت
به زه‌مه‌نی كۆن بده‌وه
ئه‌ڵمانیا
3 / 10 / 2019
