Skip to Content

84 Views

دوو هۆنراوە … نەوزاد بەندی

دوو هۆنراوە … نەوزاد بەندی

Be First!
by October 13, 2019 General, Poems
image_print

عەمودێک لە ئازار

ئەمڕۆ
بە لای قوتابخانەی
مناڵیمدا تێپەڕیم
(ناوەندیی کاوە )
سەرسام بووم
کە ٤٠ ساڵ زیاترە
عەمودی کارەبای بەردەرگاکەی
ھەر وەستاوە
یەک ھەنگاو چیە
نەیناوە ..
سەرتاپای ژەنگ لێیداوە..

دەستم کردە ملی و
تێر تێربۆی گریام..

ئەبێ چەند جەژن،
بەم جلە ژەنگاویەوە،
دڵی لە خۆی دامابێ ؟؟
ئەبێ چەند جەنگ
فیشەکی پیا کێشا بێ ؟
چەند زستان تا بەیانی
ھەڵلەرزی بێ ؟
بە دیار سایەقەی ساماڵەوە
دەست و پەنجەی تەزی بێ ؟؟

ئەبێ تەنیایی و
بێکەسیی
ئەو ھەموو ساڵە ،
چەند تەنگیان کردبێ
دڵ و دەروونی ؟؟
چەنێ گریابێ ،
بە دیار خۆیەوە ؟
کەس نەیزانیوە
ساتێ بە بوونی ..


بارانێکی دڵڕەق

باران
چەند دڵ ڕەقە ..
بێ پێشەکیی ،
لە پڕ تۆی بیر ھێنامەوە ..
دیسان ڕۆیشتی و
ھەمدیسان تەنیا مامەوە ..

ئاساییە ..
ئاساییە بەلامەوە ..

باران نەبووایە
وا خێرا
بۆ گوڵێکی پاییزیی
نەئەگەڕامەوە.

نەوزاد بەندی

Previous
Next

Leave a Reply