Skip to Content

254 Views

فاشیست بوونی کورد چارەسەر نییە، تێکۆشان دژی فاشیزم چارەسەرە … ئاسۆس

فاشیست بوونی کورد چارەسەر نییە، تێکۆشان دژی فاشیزم چارەسەرە … ئاسۆس

Be First!
by October 15, 2019 General, Opinion
image_print

میللەتی کورد، یەکێکە لەو میللەتانەی قوربانی دەستی هزری فاشیزمە، لە هەمانکاتدا لە هزری ناسیۆنالیزم نەگەیشتووە و نەیتوانیوە وەک گەلانی تر لە ڕێگەی ناسیۆنالیزم بوونەوە ببێتە خاوەن دەوڵەتی خۆی. لە کوردستانی باشوردا ئێمە بووینەتە قوربانی ناسیۆنالیزمێکی کوێرانە، بەجۆرێک نەتەوەیی بوون و ناسیۆنالیست بوون لە عەشیرەتێک و بنەماڵەیەک و پارتێک و گووتارێکی پۆپۆلیستی کورتکراوەتەوە. جگە لەمەش، ناسیۆنالیستی بۆرژوایی هەڵگر و فوتێکەری ئەو گووتارەیە، کە هەمیشە پرسە گەورە نەتەوەیی و نیشتیمانییەکان دەقۆزێتەوە بۆ خۆێ و بەرژەوەندیی چینایەتییان. قوربانی یەکەمی هزری فاشیزم و ناسۆنالیستی خێڵەکیی چینی خوارەوە و ڕەنجدەرانە.

سەرکەوتنی هەرەگەورەی ڕۆژئاڤا کۆکردنەوەی گشت نەتەوەکان بوو لەژێر چەتری پێکەوەژیانی گەلان و وەلانانی هزری ڕق و قینەی نەتەوەیی و دروستکردنی هێزێکی هاوبەش، کە لە گشت نەتەوەکان پێکهاتووه و هەر دوو رەگەز، ژن و پیاو بەیەکەوە بەرگری لەو ئەزموونەیان دەکەن. یەکێک لەو سەروەریانەی شەڕڤان و گەلانی ڕۆژئاڤای کوردستان پێیانبڕاوە تێکۆشانە دژی فاشیزم و بەربەرییەتی ئاین. لە هەمان کاتدا، کاڵکردنەوەی هزری ناسیۆنالیزم لەناو گەلانی ناوچەکە و هێنانە پێشەوەی هزرێکی نوێ و پێکەوە ژیانی گەلان و مرۆڤانە. هەر ئەمەش وایکرد جیهان بە دیدێکی جیاوازی لەو ئەزموونە نوێیەی ڕۆئاوای کوردستان بڕوانێت و هاوسۆزی بێت. لەناو زۆنگاوی ڕۆژهەڵاتی ناوەڕاست، کە هەمیشە فاشی بوون و شۆڤێنی بوون و ناسۆنالیزمێکی ڕق هەڵگر بەسەر هزری کۆمەڵگە و تاکەکانی ئەو ناوچەیە زاڵ بووە، ئەم ئەزموونەی ڕۆژئاڤا ئومێد بەخش و ئیلهام بەخشە بۆ تێپەڕاندنی ئەو هزرە و سیستەمی بەڕێوەبردنی دەوڵەتی نەتەوەیی. ئەم ئەزموونە وەک شکۆفەی گوڵێکە لەناو باو و بارانی هزری بەربەریەت و دژە ئازاردی و یەکسانی نەتەوەیی و چینایەتیی.

زۆرێک لە بەناو ڕۆژنامەنووس و چاودێرانی سیاسی لەژێر کاریگەریی هزری ناسیۆنالیستییە خێڵەکییەکەیان هوتافی فاشی بوون لێدەدەن. بەجۆرێک ئەگەر دەسهەڵاتیان هەبێت ڕەنگە هەمان ئەزموونی قێزەونی فاشیزم و دووبارە بکەنەوە. “عارف قوربانی” کە وەک نووسەر و چاودێری سیاسی ناسراوە ڕێگە چارەی فاشی بوون دەخاتە بەردەم کورد و دەڵێت: “دەبێت بیسەلمێنین بەهای خوێنی کورد ئاسان نییە، ئەگەر منداڵێکی کورد کوژرا دەبێت 10 منداڵی تورک بکوژین.” هەروەها دەڵێت: “ئەگەر بمانەوێت بمێنینەوە دەبێت بۆ ماوەیەک ببین بە میللەتێکی فاشی.” کاتێک کورد خۆی قوربانی فاشیزمە، بە فاشیزم بوونی ناتوانێ چارەسەری کێشەکانی بکات، بەڵکو هەمیشە گرێیەکی دەرونیی بۆ پەیدا دەبێت کە نەتەوە بچوکەکان بچەوسێنێتەوە و هەمان ئەزموون و شێوەی وڵاتە فاشییەکان دووبارە بکاتەوە. وەک چۆن تورک هەمیشە پەلاماری کوردەکان دەدات و گرێی خۆ بەکەمزانی بەرامبەر ڕۆژئاوا بەکوردەکان بەتاڵ دەکاتەوە، لە هەمان کاتدا گرێی خۆبەگەورە زانیش هەر بەسەر سەرکورددا بەتاڵ دەکاتەوە و کورد وەک نەتەوەیەکی بچوک و بێدەسهەلات دەبینێت و هەوڵی قڕ کردنی دەدات. هەروەها دروست بوونی دەوڵەتی تورکیا لەسەر هزری فاشی و تواندنەوەی نەتەوەکانی تر وای کردووە ئەو نەتەوانەی کەمینەن بەتورکی بکرێن. ئەمەش بە لێساندنەوەی هەموو مافە نەتەوەییەکان. بۆیە دەبینن ئەو وڵات و نەتەوانەی هزری فاشیزمیان هەیە هەمیشە له دۆخێکی ناسەقامگیری سیاسی و کۆمەڵایەتیدان، ئەمەش بەهۆی ئەو زۆرداریی و تواندنەوەی نەتەوەکانیتر لە پێناو نەتەوەیەکدا.
عارف قوربان دەیەوێ، کورد ئەم ئەزموونە کۆنەی هیتلەر و مۆسۆلینی و ئێستای ئەردۆغان دووبارە بکاتەوە و پێشنیازی بۆ دەکات! بەڵام، بۆ سەرکەوتن بەسەر فاشیزم پێویست بە یەکگرتن و ڕێکخستنی ئایدۆلۆژی و کۆمەڵایەتی و سەربازری گەلان هەیە بۆ مانەوە و تێکۆشان دژی هزری فاشیزمی قەومی و بەربەریەتی دینیی. ئەمە بەوە ناکرێت گەلی کورد دەستبەرێت بۆ فاشیزم، وەک ئەوەی فاشیزم بوون لە ڕۆژهەڵاتی ناوەڕاست تاکە ئەلتەرناتیف بێت بۆ چارەسەری کێشە و پرسی کورد. لە کاتێکدا لە ڕۆژئاڤای کوردستان پێکەوەژیانی گەلان بەکردارەکیی سەرکەوتنی بەدەست هێناوە.

جەنگان و وەستانەوەی هێزەکانی ڕۆژئاڤا بەرامبەر فاشیزم و هێزە ئاینخوازەکان، خۆی سەرکەوتنە. ئەم شۆڕش و بەرەنگارییەی ڕۆژئاڤا بەهەمان شێوەی شۆڕشی ڤێتنام دژی ئیمپریالیزمی ئەمریکا و وەستانەوەی لینینگراند دژی نازیزم شکۆمەندە و جێگەی شانازییە. هەمیشە هێزە داگیرکەرەکان لەبەردەم ئیرادە و خۆ ڕێکخستن و ئایدۆلۆژیای تەنداو بە ئازادیخوازیی و یەکسانی نەتەوەیی و کۆمەڵایەتیی و یەکسانی ڕەگەزیی شکست دێنێت. جێگەی ئاماژەیە لە ڕۆژئاڤا ئەزموونێکی نوێی سیستەم و بەڕێوەبردن جێبەجێ دەکرێت، سیستەمی بەڕێوەبردنی کانتۆنات دەتواندرێت وەک ئەلتەرناتیڤی دەوڵەتی نەتەوەیی جێگەبگرێت، بەتایبەت لە ڕۆژهەڵاتی ناوەڕاست.

ئاسۆس

Previous
Next

Leave a Reply