زانایه‌كی بێ ناسنامه‌ی شیعر … سه‌ردار جاف
زۆرن ئه‌و خودان قه‌ڵه‌مانه‌ی بێ ناسنامه‌ی شه‌ونخونیان ماڵئاوایی له ئێمه و دونیای ئه‌ده‌ب و شیعر ده‌كه‌ن و ئیدی ونبوونی ناو و شیعره‌كانیان له ته‌ك خۆیاندا له گۆڕه تاریكه‌كاندا توند ده‌كرێ , حه‌یف كه‌وتووینه‌ته زه‌مه‌نێكه‌وه كه‌م كه‌س ته‌پ و تۆزی ئه‌و به‌رهه‌مانه ده‌ته‌كێنن و له كونه تاریكستانه‌كان قورتاری ده‌كه‌ن، شه‌هید زانا مه‌حموود یه‌كێكه له‌و خودان قه‌ڵه‌مانه‌ی بی ناسنامه‌ی نێكسته‌كانی هه‌ر ونبووه و وه‌ك چۆن گڵی هه‌ولێر جه‌سته‌ی ئه‌و مرۆڤه خه‌باتكاره‌ی شاردۆته‌وه ، خۆڵی ده‌ست و په‌نجه‌ی ئێمه‌یش به‌رهه‌مه‌كانی زینده به‌چاڵكردووه، شاعیری ڕه‌وان شاد به ساكار زه‌ندی ناسراو بووه و ساڵی 1968 له شاری هه‌ولێری قه‌ڵا و مناره چاوه ڕه‌نگینه‌كانی به خاك و نیشتیمانی دایكیدا هه‌ڵدێنێ و ژیانێكی پڕ ئازار و ده‌رده‌سه‌ری و بن ده‌ستی ده‌گوزه‌رێنێ, هه‌ر له پبَناوی ڕه‌وینه‌وه‌ی ته‌می داگیركه‌ران له 17 / 7 / 1991 به گژ داموده‌زگا داپڵۆسێنه‌ر و داگیركه‌ره‌كه‌ی به‌عس ده‌چێته‌وه و له هه‌ولێری پایته‌خت و بۆ هه‌ولێرییه‌كان گیانی به‌خت ده‌كات، لێ كۆمه‌ڵێ ده‌قی شیعری جوان جوانی بۆ جێ هێشتووین شایسته‌ن جرای ئه‌م رووناكیه‌ی وڵات په‌ی به ده‌قه‌كانی كاكه زانا ڕه‌وانشاده‌كان ببا كه مۆمی ته‌مه‌نی گه‌نجیان بۆ ئێمه به‌خت كرد و پێكی جوانه‌مه‌رگیان له ئاودامانی خۆیان هه‌ڵكێشا..
ئه‌مه‌یش دوو ده‌ق له شیعره‌كانی شه‌هید زانا مه‌حموود ( ساكار زه‌ندی )
مێژوو
چه‌نده سه‌یره
مێژوو منی له بیر ماوه
منێك تا ئێستا نازانم
مێژوو كه‌نگێ ……بۆیه ژانم…..
ئه‌ڵێن : مێژوو
به ئێسكی نێو … كۆسپی گڵكۆی ژێر
مناڵێكی سه‌رما بردوو
له دایك بوو ….
كه‌چی مێژوو ….
خۆی شه‌و و ڕۆژ
هاوار ئه‌كات … لاشه‌م له ژێر
زێرابێكا …. هاته دنیا
ناوه‌كانم له‌و ساته‌دا له دایك بوون
كه مه‌ردووم فێری درۆ بوون
ته‌نیام
وه‌ك شه‌قامی … چۆڵ و تاریك ,
ناخم له گه‌ڵ شنه‌ی بادا.. به‌لادا دێ,
په‌نجه‌ره‌كان.. هه‌موو یه‌ك یه‌ك.. داده‌خرێن و
ده‌نگی چرگه‌ی .. سه‌عاتێ دێ ,
ئه‌ستێره‌كان له خۆش خه‌ودا ڕاده‌په‌ڕن ،
به نێو ده‌ریای تاریكی دا نغرۆ ده‌بن ..
سێبه‌ری دره‌خت و مرۆڤ …
پریشك ده‌هاوێن …
دره‌خته‌كان.. ده‌توێنه‌وه.. ده‌بنه مرۆڤ …
به‌د مه‌سته‌كان .. ده‌ڕوێنه‌وه .. له جێی داره ،
بێ گه‌ڵاكان , هێدی هێدی ..
سه‌گوه‌ڕێك چه‌شنی باڵنده‌ی كفت و ترساو ..
لقی دره‌خته سه‌وزه‌كان .. بێزار ده‌كا ..
په‌نجه‌ره‌ێی .. ده‌كرێته‌وه ..
مۆمێكی تر داده‌گیرسێ ..
ئه‌وه شه‌وی ته‌نیاییمه ..
تا به‌یانی .. ده‌كرێته‌وه ,
ئه‌ویش خۆمم .. به حاڵ .. له به‌ر ڕه‌شه‌بادا
خۆم ڕاده‌گرم
به هیواین كاكه زاناكانی نیشتیمان ناو به ناو یاد بكرێنه‌وه و زیندوو و له به‌ر چاو و دید بن , د‌وزینه‌وه‌ی ئه‌وان ون نه‌كردنی خۆمانه ….
سه‌ردار جاف
ئه‌ڵمانیا
