Skip to Content

225 Views

هەنگاوەکانی تارماییەک … شوان عەباس بەدری

هەنگاوەکانی تارماییەک … شوان عەباس بەدری

Be First!
by October 17, 2019 General, Poems
image_print

لەم دارستانە ڕێگەی دەرباز بوون لە کوێیە ؟
بەرەو کوێوە هەنگاو ئەنێم ؟!
من لە کام گۆشەی ئەم شەوە
لە سەر گەڵای کام داری تەنیای
نێو ئەم تولە ڕێیە پڕ لە جەنجاڵە
وەک شەونمێک دلۆپەم کردووە ؟
بە دیار قاسپەی کام خەونەوە
سەرخەوێکم لە گەڵ تەنیاییدا شکاندووە ؟
حەقیقەتی ژیان منی لە ناو
جەنگەڵێکی پڕ لە ڕووباری درۆ و
پانتاییەکی پڕ لە خیانەت و
قەدپاڵێکی پڕ لە دەمامەک
یەخسیر کردووە و
لە ناو بازنەیەکی تەژێ لە
گومان ئەخولێمەوە !
جار نا جارێ بە خۆم ئەڵێم :
خۆزگە هەورە تریشقەیەک بوومایە
تا بە جارێ بە گرمەیەک دەروونم بەتاڵ بەتاڵ بکردایە
لە برینەکانی قامچی تەمەن
خۆزگە شەکرۆکەیەک بوومایە
بە دەست مناڵێکی بەرگ دادڕاوی بێ لانەوە
تا لە گەڵ هەموو مژێکا
لێوەکانی تامی ژیان لە یاد نەکەن
خۆزگە ئومێدێک بوومایە
لەناو دڵی گەردوونێکی تاریکی تەنیاکەوتوودا
خۆزگە خودا بوومایە
تا بە جارێ شەڕگەی سەربازەکانم ڕۆشن بکردایە و
پێم بوتنایە : هۆۆۆۆۆۆ کەرینە
ژیان لەوە گەورەترە تا بۆ کورسییەک
خوێن بڕێژن و
لەوە بچووکترە تا نیشانێک لە سەر سنگتان بە ناوی ئازایەتییەوە هەڵواسن و
لەوە پووچترە
تا وەک ئاڵایەک
خەون بە ئازادی خاکەوە ببینن !
ژیان جگە لە چیرۆکێکی تراژیدی
سواغ دراو بە کۆمیدیا هیچی تر نییە .
لە جیاتی نیشان لەسەر سنگتان
وێنەی بەچکە ئاسکێک هەڵواسن و
لە جیاتی سەمفۆنیای تۆپ
گوێچکەکانتان بە ئاوازی کەنارییەک سەوز بکەن .
دەمەو غروب
لە کەنار دەریایەک
جگەرەیەک داگیرسێنن و
باوەش بە گەرمی لما بکەن .
گۆرانی بۆ شەپۆلی ئاو بڵێن
بە دیار هەورێکەوە
لای لایەی خەون و خەیاڵ بڵێنەوە و
کۆڵە پشتییەکانتان پڕ بکەن لە
خەندەی سبەی و وەک دیاری بەسەر
مناڵە ئاوارەکان بیبەخشنەوە
بۆنی ئەڤین لە هەناسە دامەماڵن
دڵی پیرە زەوی بە ئاوازی مەرگ و مۆتەکەی وێرانی مەڕەنجێنن !
ئاااااااااە ئەی دارستانی تەژی لە
خوێن و غوربەت و ڕەو
منی ماندوو
بۆ دەرباز بوون بەرەو کوێوە هەنگاو بنێم ؟
بەرەو کوێوە هەنگاو بنێم
کاتێ ڕێگەکان بە کلیتێکی داڕزاوی پڕ لە کابووس و غوربەت و کۆچ کۆتاییان دێ !
بەرەو کوێوە هەنگاو بنێم
کاتێ ئایندە بە چەقۆیەکی کول سەر بڕاوە ؟!
بەرەو کوێوە هەنگاو بنێم
کاتێ ئەزانم مرۆڤ
لەناو زەمهەریری نائومێدی قۆڵبەست کراوە !
بەرەو کوێوە هەنگاو بنێم
کاتێ بن بەستێک بە ناوی
م
ە
ر
گ
ڕێی لێگرتووم !

Previous
Next

Leave a Reply