Skip to Content

26 Views

نمایش کردنی “چوکا ئێستا کاتژمێر چه‌نده‌یه‌” له‌ ده‌رهێنانی بێهرووز بوچانی له‌ فێستیڤاڵی فیلمی نێودەوڵەتی سلێمانی

نمایش کردنی “چوکا ئێستا کاتژمێر چه‌نده‌یه‌” له‌ ده‌رهێنانی بێهرووز بوچانی له‌ فێستیڤاڵی فیلمی نێودەوڵەتی سلێمانی

Be First!
by October 18, 2019 Cinema, General
image_print

مەنسوور جیهانی ـ فیلمی به‌ڵگه‌یی “چوکا ئێستا کاتژمێر چه‌نده‌یه‌” له‌ ده‌رهێنانی “بێهرووز بوچانی” و “ئارش که‌ماڵی سه‌روێستانی” له‌ به‌شی “نمایش کردنی تایبه‌ت” له‌ چوارەمین خولی فێستیڤاڵی فیلمی نێودەوڵەتی “سلێمانی” چووه‌ سه‌ر په‌رده‌.

بە پێی ڕاپۆڕتی لێژنەی ڕاگەیاندنی گشتیی چوارەمین خولی فێستیڤاڵی فیلمی نێودەوڵەتی سلێمانی، فیلمی به‌ڵگه‌یی “چوکا ئێستا کاتژمێر چه‌نده‌یه‌” Chauka, Please Tell Us the Time له‌ ده‌رهێنانی “بێهرووز بوچانی” رۆژنامه‌نووس و نووسه‌ری کورد و “ئارش که‌ماڵی سه‌روێستانی” سینه‌ماکاری ئێرانی دانیشتووی وڵاتی هۆڵه‌ندا به‌ دیمه‌ن و وێنه‌گه‌لی راسته‌قینه‌ له‌ دوورگه‌ی مانووس له‌ وڵاتی ئۆستڕاڵیا به‌ فێلمهه‌ڵگرتنی شاراوه‌ و به‌دزیی له‌ لایه‌ن “بێهرووز بوچانی” به‌ مۆبایله‌که‌ی به‌ دوور له‌ چاوی سه‌ربازان و لێپرسراوانی ئه‌م دوورگه‌یه‌ که‌ تیایدا زیاتر له‌ هه‌زار په‌نابه‌ر ده‌ژین، به‌ ئاماده‌بوونی “ئارش که‌ماڵی سه‌روێستانی” له‌ به‌شی ده‌ره‌وه‌ی رکابه‌ریی واته‌ “نمایش کردنی تایبه‌ت” له‌ چوارەمین خولی فێستیڤاڵی فیلمی نێودەوڵەتی “سلێمانی” Slemani له‌ هۆڵی سیتی سینه‌ما” له‌ شاری سلێمانی پایته‌ختی فه‌رهه‌نگ و هونه‌ری هه‌رێمی کوردستانی عێراق نمایش کرا‌.

دوورگه‌ی مانووس ئه‌و شوێنه‌یه‌ که‌ ده‌وڵه‌تی ئۆستڕاڵیا له‌م شوێنه‌ پڕله‌ کێشه‌یه‌ بۆ راگرتنی هه‌میشه‌یی زیاتر له‌ هه‌زار په‌نابه‌ر که‌ڵک وه‌رده‌گرێت. ئه‌م شوێنه‌ هه‌روه‌ها شوێنی ژیانی “بێهرووز بوچانی”یه‌ که‌ براوه‌ی خه‌ڵاتی نه‌ته‌وه‌یی ژیاننامه‌ی ئۆستڕاڵیا، براوه‌ی خه‌ڵاتی گرینگی رۆژنامه‌وانی شیکاری “ئانا پۆلیتکۆفسکایا”، براوه‌ی خه‌ڵاتی “ڤیکتۆریه‌ن پرێمیر” گرینگترین خه‌ڵاتی ئه‌ده‌بیی ئۆستڕاڵیا، براوه‌ی خه‌ڵاتی ئه‌ده‌بی “نیو سات ویڵز پرێمیر”، خه‌ڵاتی پیشه‌سازی کتێبی ئۆستڕاڵیا و هه‌روه‌ها براوه‌ی خه‌ڵاتی ساڵانه‌ی ئیندێکس بۆ په‌یامنێره‌ راپۆڕتنووسه‌کانی دژی سانسۆر بووه‌.

په‌یامنێران ئیجازه‌ی چوونه‌ ناو دوورگه‌ی مانووسیان نیه‌ و بوچانی که‌ بۆ خۆی ئه‌زموونی ژیانی راسته‌قینه‌ی له‌م دوورگه‌یه‌دا هه‌یه‌، هیوا ده‌خوازێت که‌ له‌ به‌ڵگه‌ فیلمی “چوکا ئێستا کاتژمێر چه‌نده‌یه‌” بارودۆخی مه‌ترسیدار و تاقه‌ت پرووکێنی ئه‌م ناوه‌نده‌ی راگرتنی په‌نابه‌ران به‌ دونیا نیشان بدات.

به‌ڵگه‌ فیلمی “چوکا ئێستا کاتژمێر چه‌نده‌یه‌” له‌ دوای به‌شداریی له‌ فیستیڤاڵی فیلمی نێودەوڵەتی سیدنی له‌ وڵاتی ئۆستڕاڵیا، له‌ نوێترین نمایش کردنی جیهانیی خۆیدا له‌ شه‌ست و یه‌که‌مین خولی فیستیڤاڵی فیلمی نێودەوڵەتی له‌نده‌ن له‌ وڵاتی به‌ریتانیا چووه‌ سه‌ر په‌رده‌.

ناوی ئه‌م فیلمه‌ که‌ له‌ ناوی باڵنده‌یه‌کی خۆجێیی له‌ دوورگه‌ی “پاپۆوا گینه‌ی نوێ” به‌ ناوی “چوکا” وه‌رگیراوه‌، له‌ راستیدا ناوی به‌ندیخانه‌یه‌کی تاکه‌که‌سیشه که‌ له‌ ناو ئۆردووگاکه‌دا بۆ په‌نابه‌ران کراوه‌ته‌وه‌. باڵنده‌ی چوکا به‌ بڕاوی که‌سانی خۆماڵی ناوچه‌که‌، هێمای پێناسه‌ی خه‌ڵکی خۆجێی ئه‌م ناوچه‌یه‌‌یه‌ که‌ به‌ ئاواز و ده‌نگی به‌رز و سه‌رسووڕهێنه‌ری خۆی، کات راده‌گه‌یه‌نێت. ئه‌و په‌نابه‌رانه‌ی که‌ وێنه‌یان له‌م فیلمه‌دا گیراوه‌، له‌و رۆژانه‌ی که‌ له‌ چوکا تێپه‌ڕیان کردووه‌، وه‌کوو خراپترین رۆژه‌کانی ژیانی خۆیان ناو ده‌به‌ن.

چواره‌مین خولی فێستیڤاڵی فیلمی نێوده‌وڵه‌تی “سلێمانی‌” له‌ لایه‌ن کۆمپانیای سینه‌مایی “مه‌ستی فیلم” به‌ به‌ڕێوه‌به‌رایه‌تی “فوئاد جه‌لال”، به‌ سه‌رۆکایه‌تی “مه‌لا به‌ختیار” به‌رپرسی به‌شی پاڵپشتیی ئه‌م فێستیڤاڵه‌ و له‌ که‌سایه‌تییه‌کانی به‌رجه‌سته‌ی سیاسیی هه‌رێمی کوردستانی عێراق، به‌ به‌ڕێوه‌به‌رایه‌تی هونه‌ریی “دانه‌ر عومه‌ر فارس” و به‌ به‌ڕێوه‌به‌رایه‌تی به‌رنامه‌داڕشتنی خاتوو “لینا ره‌زا” و به‌ نمایش کردنی 134 فیلم له ده‌رهێنه‌ره‌کانی 79 وڵاتی جیهان؛ له‌ دوو به‌شی رکابه‌ریی سه‌ره‌کیی “سینه‌مای جیهان” (نێوده‌وڵه‌تی) و به‌شی رکابه‌ریی “سینه‌مای کوردی” (نه‌ته‌وه‌یی) و هه‌روه‌ها سازدانی وۆرکشۆپه‌کانی پیشه‌یی و پسپۆڕانه‌ی سینه‌مایی و کۆڕ و کۆبوونه‌وه‌ی به‌رهه‌مهێنانی هاوبه‌ش؛ به‌ دروشمی “شێرپه‌نجه‌ی زه‌وی” له‌ 5 هۆڵی “سیتی سینه‌ما”، “سینه‌ما سالم”، هۆڵی “ئه‌منه‌ سووره‌که‌” و هه‌روه‌ها له‌ ته‌لاری “هونه‌ر” له‌ شاری سلێمانی له‌ هه‌رێمی کوردستانی عێراق به‌ڕێوه‌چوو.

بەڕێوەبەرایەتی ڕاگەیاندنی گشتیی فێستیڤاڵی فیلمی نێودەوڵەتی سلێمانی.

Previous
Next

Leave a Reply