بەستەڵەکی دەروون و سەفەرێک بە ناو خوددا … شوان عەباس بەدری
تیک تاکی ئەم کاتژمێرە نەفرەتیە هەڵواسراوەی سەر دیوارەکە مێشکمی شڵەژاندووە ، دەرەوە بەستەڵەکە و بێ دەنگیەکی سامناک شەقامەکانی شارەکەی داپۆشیوە و منیش وەک هەمیشە لە ماڵەوە بە دیار دوکەڵی جگەرەکەم و پیاڵە چاکەم دانیشتووم و خۆم خزاندۆتە باوەشی تەنیاییەکی سامناکتر لە بێدەنگی و ساردی بەستەڵەکی شەقامەکان !
حەز ئەکەم بە چەکوشێک بەر بمە گیانی ئەم کاتژمێرە لە خۆم ماندووتر و خەمۆکە و چرکەژمێرەکانی لە جوڵە بخەم تا ئیتر ئەمەندە سەختی تێپەڕبوونی چرکەکانم بەڕوا نەکێشێت ، ئیمرۆ بۆ چەندمین جار لە خوێندنەوەی ڕۆمانەکەی تاعونی ئەلبێر کامۆ و زندە بگور و بوف کوری سادق هدایەت بوومەوە و حەزم ئەکرد دەفتەری شیعرەکانی ڕامبۆشم لابوایە ، سەیرە بەم ساتە سامناک و بێ دەنگە سەرشێتی سەفەرێک لە مێشکی داوم و حەز ئەکەم پانتۆڵە شینە کاوبۆکەم و پۆستاڵە ڕەشەکانم لەپێ بکەم و بلوزێکی ڕەش و قەمسەڵەیەکی ئەمریکی سەوز ڕەنگ لەبەر بکەم و مل پێچێکی درێژ لە ملم بئاڵێنم و کۆڵە پشتیە ڕەنگ خاکیەکەم هەڵگرم و لە ژێر نەرمە بارانێک بە ئارامی بەرەو ژوانگەیەکی نەزانراو و نەبینراو هەنگاو بنێم
. بە گەیشتنم قەمسەڵەکەم بە دیواری زەردهەڵگەراوی میوانخانەیەکی شێداری شەست حەفتا ساڵ لەمەوبەر هەڵواسم و لە تاو ماندوویەتی وەک ساوایەکی برسی کە ئەنووسێ بە مەمکی دایکیەوە خۆم فڕێ بەمە سەر نوێنی ژوورەکەم و تاوناتاوێ سەیری جاڵجاڵۆکە پیر و ماندووەکەی سووچی لای ڕاستی دیوارەکە بکەم کە چۆن چاوەڕێی نێچیرێکی نوێ ئەکات و دوای ئەوە بڕوانمە سیسرکە ڕەنگ قاوەییەکەی لای دەستشۆرەکە کە لە ترسی ماچی تاکە نەعلێک یا پێڵاوێک بە خێرایەکی زۆر لەم کون بۆ ئەو کۆن ڕائەکات و تاوێ هەستمە سەر پێ و بچمە بەردەم پەنجەرەی ژوورەکەم لە میوانخانەکەدا و بڕوانمە کیوسکی تەلەفۆنی سەرشەقامەکە کە کیژێکی دەم بە پێکەنین لەناویا قسە لەگەڵ یارە دوورەکەیدا ئەکات، دوای ئەوە بگەرێمەوە و جارێکی تر خۆم فڕێ بەمەوە سەر نوێنەکەم ، چاوەکانم داخەم و گوێ لە دڵۆپەی بەلوعە ژەنگاویەکەی مەخسەلەی لای چەپی ژوورە پیس و هەرزانەکەی میوانخانە کۆنەکە بگرم، بە خۆم بڵێم : هۆوووو غوربەت نشینە تەنیا و خەمۆکەکە، لێرە لە ئۆروپا هەموو شتێک هەیە جگە لە بیرەوەری.
لە دەر و دیواری ئەم قاڕە نەفرەتییە بە ناو بەهەشت ئاسایە تەنیایی ئەبارێت و مرۆڤەکانی ئەم بەشەی گۆی زەوی بە دەست چەندین شڵەژانی دەروونیەوە ئەناڵێنن ، لێرە بەزەیی و مرۆڤدۆستی تەنها و تەنها لە ناو فیلم و ریکلامەکانیان بەدی ئەکرێت و لە ناو جیهانە ڕاستەقینەکەیان هەموان ڕۆبۆتێکی قورمیشکراوی بە سیستەم کراون و کەس ئاگای لە سێبەرەکەی خۆیشی نییە چ جای دەوروبەری ! لێرە ئەبێت سەگ بیت تا گورگەکان لەت و پەتت نەکەن و بە ناوی یاساوە پانت نەکەنەوە ، لێرە کە کەوتی هەموان لە سەر جەستە بریندارەکەت سەما ئەکەن و کەسێک نییە بۆ دووبارە هەستانەوە دەستت بگرێ ، ژن لێرە کاڵایەکی بە نرخ و نایابە و لەش و لاری بە هەموو جۆرێ بۆ قازانجی دارایی بە کار ئەهێنرێت و بازرگانی پێوە ئەکرێت ، پیاوانیش کۆیلەگەلێکی بەهێز و باشن بۆ کاری قورس و سەخت و حەقدەستێکی نەچەندان زۆر و سودێکی لەڕادە بەدەری خاوەن کار .
هەموان لە ناو پوچیەکی سامناکا ئەخولێنەوە و سەریان لێشێواوە ، کە هێزیشیان لێ بڕا فڕێ ئەدرێنه دەرەوەی یاری و سیستمەکە و لەناو ئاسایشگەیەکی حکومی بە ناوی چارەسەرەوە بەند ئەکرێن و جۆرها حەپ و دەرمانی جۆراوجۆریان لەسەر تاقی ئەکرێتەوە و زۆربەی کات لە ژێر کاریگەری ئەو حەپ و دەرمانانە بێهۆشانە ژیانیان بە سەر ئەبەن و خۆ گەر شانسیش بێنێ و پارەی هەبێت و بچێتە ئاسایشگەیەکی ئەهلی ئەوا لەوێ وەک مرۆڤ مامەڵەی لە گەڵ ئەکرێت بۆ ؟!!! وەڵامەکەی ئاسانە چونکە ساڵانە هەزاران یۆرۆ ئەبەخشێتە ئەو ئاسایشگە ئەهلییە ، قسەی سەرەتا و کۆتایی پارەیە و پارەیە و پارە و مرۆڤ و مرۆڤدۆستی کیلۆی بە چەنە ؟ گوزەشت ئەو ئەیامەی نامەبەر نامەی مەجنونەکانی جیهانی ئەگەیاندە لەیلاکان و لەیلاکان دڵیان ئەکەوتە خورپە و سەعاتێک بۆنی نامەکانی مەعشوقیان ئەکرد ، پرسیارەکانی ئەم سەردەمە پرسیارگەلێکی بێ مانان و وەڵامەکانیش لە پرسیارەکان بێماناتر ! بۆنی خیانەت و درۆ و دوڕویی سەرتاپای هەوای شارەکەی ئاڵودە کردووە و دەمێ ساڵە مڕۆڤ لە ناو مەکینەی عەولەمە و پێشکەوتن و تەکنەلۆژیا هاڕاوە و قەسەم بە گەورەیی خودا ئێستا ئەو جاڵجاڵۆکە و سیسرکە لە مرۆڤەکان عاشقتر و دڵپاکتر و جوانترن .
دانیشەو تەمەنی خۆت بە دیار جگەرە و چا و کتێب و وڕێنەکانی دەروونت بەسەر بەرەو چیت داوە لە گەمژەیی و جەهلی مرۆڤ ؟!!!
