Skip to Content

حورمەت…  پشکۆ ناکام

حورمەت… پشکۆ ناکام

Closed
by كانونی یه‌كه‌م 5, 2016 General

….هەر هاوار هاوارییانە، پارە یۆخ..بەلوعەی بودجە لە بە بەغاوە گیراوەتەوە..نەوت لە کەرامەتی ئینسان هەرزانتر ئەفرۆشرێت..داعش گیرفانی بڕیوین.. جگەلەوەی مووچە نیە باسیشی بکەیت وەک مەکرەمەیەکی دەسەڵاتی کوردی بە سەوز و زەردییەوە شەق ئەخۆیت و بەدەردەکەی مامۆستیانی ناڕازیت ئەبەن، لە پاڵ ئەو هەموو پاڕانەوە و فرمێسکی تیمساحاوییەوە بۆ بێ داهاتی، ئەبینین لەولاوە سەرۆکی بنەماڵە و فەرهادی عاشقی کورسیە’ شیرین’ەکە، چوار هەزار عەرەبی عەشایەری لە سەر بنەمای برایەتی !کورد و عەرەبەوە بە مووچەی نیو ملیۆن دینار بۆ هەر یەکێکیان دائەمەزرێنێت، کەسیش نوتق ناکات بڵێ کە ئێوە بنەماڵە و حکومەتە برازاکەی ، دەوڵەت نەماوە بە ناوی کوردەوە پارەی لێوەرنەگرن و کەسیش نازانێت شنەی شەماڵی کام قاسە وونی ئەکات بە کام پارە و بودجە و داهات ئەو مووچەیە دابین کراوە ؟ لە هەموویشی هەزەلی تر ئەوەیە لەسەر میلاکی وەزارەتی پێشمەرگە ئەو برا عەرەبانەمان گیرفانیان گەرم ئەکرێتەوە ، پێشمەرگەی قوڕبەسەری خۆشمان تا معاشێک وەرئەگرێت :ئاشتی هەورامی ئەڵێت چەق.. جگە لەوەش سوپایەکی گەورە و زەبەلاحیان بە ناوی’ زێرەڤان’ یەوە دروست کردوە کە ڕێک کۆپی (حەرەس جەمهوریەکەی) بەعسە، بە مەرجێک فاشیل و ترسنۆک ترین هێزە کە تا ئێستا لە کوردا دروست بوبێت، ڕاکردنی نەجمە و ئەستێرە بەشانەکانیان لە ‘ شەنگار’ شایەتی بودەڵەیی ئەو هێزەیە کە بە نەزەرییەی ‘ شەڕ ڕاکردنیشی تیایە’ ناوی دەرکردوە، ئەی یەپارە و داهاتی ئەو هێزە بێ هێزە چۆن و لەکام داهات مسوگەر ئەکرێت؟ کە چەکی تازە و جل و بەرگ و ئالیاتێکی زۆر و زەبەندیشیان لەبەر دەستایە جگە لە ڕەسم گرتنی جەبهە خەلفیەکانی پشتەوەی شەڕ نەبێت لە هیچ کونێکی ترەوە دەرناکەون!..
ئەی پارە و موچەو نەسرییەی ئەو هەموو ئەو هەموو بەر پرسە لە ژماردن نەهاتوانەی کە هی وایان هەیە کاروانی سەیارەکانی حیمایاکانی لە کەژاوەی دەرزەنێک بوک زیاترە، مەکتەب سیاسی، سەرکردایەتی، ئەندامی بنەماڵە، لق ، مەڵبەند، ئەنجومەن، ناوچە، کۆمیتە، بەڕیۆەبەرەکانی پۆلیس بە هەموو بەشەکانیەوە، بە بەشی تێهەڵانی خەڵکیشەوە، ئاسایش و پراستن و زانیاری سکرتاریەت و دژە تیرۆر و کۆشک و تەلارەکانی خانەوادەی سەرۆکەکان ووەزیر و معاون و کوڕە باشەکانی حاشیەو..هتد…تا فەوجە تایبەتیەکانی بەرپرسە تایبەتیەکان ..کەس نیە بپرسێت بڵێ پارە بۆ ئەو هەموو لەشکر و هێزە چەکدارانەی حیزب بەردەوام هەبێت ،بێ پارەیی و قەیران یەک ڕۆژ ئەوان ناگرێتەوە،بەڵام مامۆستا و موچەخۆرێک چوار هەفتە بە چارەکە معاشێک بڵێ مەمنون کە ئەو چارەکەش بە چارەکە ساڵێک وەرئەگرێت..بۆ ئەو قەیرانە کۆمەڵێکی لە نیعمەتی ژیان بێ بەش نەکردوە و لە ما باقی خەڵکیش ژیانی لێ کردون بە دۆزەخ ..! سوسیال-دیموکراتی بەرپرسی وامان هەیە پارەی سەفەر و میهرەجان و کۆنفراس و مایک و دەعوەتەکانی ڕەنگە بەشی موچەی سەدان مامۆستا و فەرمانبەر بکات، ئەو مەسئولەی ووتبوی: هیچ قاتێک دوو جار لەبەر ناکەمەوە، ئەبێ بزانێ خێزانی وا هەیە دوو مانگ جارێک پڕ بەسکی خۆیان تێر ناخۆن. …
ئەو هەموو چەکانە ئەدرێن بە هەرێم و لە هەولێر’ خەشنۆش’ ئەکرێت، ئەو هەموو پارەیەی بەناوی پێشمەرگە و شەڕی داعش و ئەملا و لاوە، جگە لە ڕژێمەکەی هەولێر بۆ خەڵک و پێشمەرگە وەک جنۆکە وایە ناوی هەیە و دیار نیە ، ئەو هەموو قسەیە بە بەغا ئەڵێن و لە هەولێرەوە وەک جامانەکانیان چاو ‘سوور’ ئەکەنەوە، بەڵام کە ئەچن بۆ ئەوێ وەک مجەور و ئەوقاف یەکسەر دەست پان ئەکەنەوە، لە ئەمریکاوە و بە تەیارەی تایبەت بە حکومەت ئەکتەری جل تەنک دەعوەت ئەکرێت و کەسیش نەیزانی هاتنی ئەو ئەکتەرە بە زەوقە چ کاریگەرییەکی هەبوو لەسەر قەیرانی بێ پارەیی لە هەرێم ! ئاخۆ ئەو خوشکەدەرەش چارەکێکی بەخشیشەکەی خۆی وەرگرت یان سیستەمی پاشەکەوت کردن ئەوی نەگرتەوە و هەمووی وەرگرت ؟ کوڕی سەرۆکی بنەماڵە کە فڕی بەسەر میدیاوە نیە کەناڵێکی تەلەفزیۆنی دائەنێ کە هەقه ناوی’ ئەستەمبوڵ 24′ بوایە، بەکام پارە و کام داهات ئەوەی کردوە؟ جگە لە برازاکەی کە ئەویش ئیمپراتۆریەتێکی میدیایی بۆ خۆی داناوە، ئەی پارە و موچە و داهات بۆ لەوان نابڕێت ؟ئەوترێت گوایە ئەو دوو ئامۆزایەی بنەماڵە لە ڕقی یەکتری کەناڵیان داناوە، وەزع وابڕوات ئەوەنەی تر قوڕ ئەکرێت بەسەرمانا، ئەوان کە بە قسەی خۆیان عەشیرەتێکی هەزار کەسین و لە ڕقی یەکتر کەناڵ دانێن، ها کا بوین بە ساحێبی پێنج سەد کەناڵی تەلەفزیۆنی سەر بە بنەماڵە، ئەی ئەگەر دزینی داهات و قوتی خەڵک نەبێت چۆن ئاوا یاری بە پارەوە ئەکەن ،، ئەوە بۆ قەیرانی دارایی و هەرزان بونی نەوت و شەڕی داعش بنەماڵەی دەسەڵاتدار لە هەرێم ناگرێتەوە و هەر خەریکی جرت و فرتی خۆیانن ؟
دەسەڵاتی کوردی و ڕژێمەکەی هەولێر ئەبێت زۆر زۆر مەمنونی ئەو خەڵکە بن کە تەنهابە هاتنە سەر شەقام ناڕەزایی خۆی دەرئەبڕێت، دەنا قەوارە و قورسایی و کاریگەریی نا عەدالەتیەکانی مەسروفات و داهات و دەغیلەی نێوان حیزب و خەڵک لە ئاستێکایە کە ئەبوایە ئەو دەربڕینی ناڕەزایەتیە زۆر توند و فروان تر بوایە و هیچ لێبوردنێکی لە خۆ نەگرتایە، بەڵام دیارە ئەو ڕۆژەش یەت ..سبەی بۆ ئەوەی چاوەڕوانی ئەکات، نزیکە….
من بەش بەحاڵی بە دووری نازانم دامەزراندنی ئەو عەشیرەتە عەرەبانە سەرەتایەک نەبێت بۆ مسۆگەر کردنی چەن هەزار دەنگێک لە هەڵبژاردنەکانی ئایندەیا، قەیچێکە، کە مردوو دەنگ بات بۆ زیندو نەیکات، هەمووی بڕیارێک و گۆڕینی چەن هەزار دەفتەر نفوسێکە، کەی لەو هەرێمەی ئێمە و لە سایەی سەری ئەو دەسەڵاتەوە ئەوە کارێکی زەحمەتە….
…..بەڕاستی لەوەتەی کورد هەیە و پێی ئەوترێت میللەت، تا ئیستا لە لایەن هیچ کەس و تاقم و ستەم کارێکی ناوخۆیی و دەرەکییەوە ئە ئاوا سوکایەتی و بێ حورمەتی پێ نەکراوە….بەڵام هەمیشە دەسەڵاتی دوور لە حورمەتی نیشتمانی و ئینسانی ئەڕوات و میللەت بە حورمەتی خۆیەوە ماوەتەوە و ئەمێنێت،،،،،،،،

Previous
Next
Kurdish