Skip to Content

ترسی دەسەلات لە رۆشنبیران … هێلین

ترسی دەسەلات لە رۆشنبیران … هێلین

Closed
by تشرینی دووه‌م 2, 2019 General, Opinion

كێشەی نێوان دەسەڵات و ڕۆشنبیر كێشەیەكی یەكجار كۆن و لەمێژینەیە. ھەر لە ئازار و دەردەسەریەكانی ئەحمەدی خانی و حاجی قادری كۆیی و بێكەس و پیرەمێرد و گۆران..تاد، ھەریەكەیان بەشێوەیەك لە شێوەكان توشی ئازار و تۆقاندن و تیرۆر ھاتن.
جا ھۆی بنەرەتی ئەم كێشەیە لەوەدا خۆی بەرجەستە دەكات كە ڕۆشنبیرانی راستەقینە ھەموو كاتێك خۆیان بە دەمراستی بێدەسەڵاتان زانیوە لە بەرامبەر ستەم و زۆردارییەكانی دەسەڵاتداران كە دەرحەق بە چینی ژێرەوە و ناوەراستی كۆمەلگەی ئەنجام دەدەن.
ھەردەم دەسەڵاتدارەكانی ڕۆژھەڵات، ھەرچەندە لە ناوەوەی وەڵاتدا بە ھێزیش بووبن. بەڵام، بەرامبەر بە بێگانان كەسانی بێتوانا و بێ ھێز و دەست لەسەر سینە بوون. ئەوان بۆ مانەوەی خۆیان ھەموو جۆرە ئەرك و كارێكیان لە بێگانان پێ پەسەند بووە و ھەمیشە گوێرایەڵی فەرمانەكانی ئەوان بوون. بەڵام، لە بەرامبەر دەنگی كەسانی خۆ وەڵاتی ھەمیشە شمشێر بە دەست و ئامادە و لەسەرپێ بوون بۆ لەناوبردنی ھەر نوزەیەكی نارەزایی. ئەم دووفاتی و دووڕووییە لە كۆمەلگەی ڕۆژھەڵات بەگشتی و ھی كوردەواریی بەتایبەتی ھەر لەسەردەمی شاعیری پایەبەرزی كورد (ئەحمەدی خانی)یەوە، زۆر بە ئاشكرا ھەستپێكراوە. ھەر وەك لەم نموونە شیعریەی خوارەوە دیارە، خانی واتەنی:-

ئەمما ژ ئەزەل خودێ وەساكر
ئەڤ ڕۆم و عەجەم لەسەر مەراكر
تەبیعەتی وان ئەگەر چی عارە
ئەو عارە ل خەلقێ نامدارە
ناموسە ل حاكم و ئەمیران
تاوان چییە شاعیر و فەقیران

سەرچاوەی ئەم جۆرە كارانەش لە ئەنجامی ژێردەستەیی و گرێی خۆ بەكەمزانینەوە بووە بەرامبەر بە ھەموو شتێكی بێگانە كە بە درێژایی مێژوو بە گرانی باجەكەی دراوەتەوە و تا ڕۆژی ئەمرۆش ئەم باجە قورسە ھەر دەدرێتەوە.
لە كاتێكدا ڕۆشنبیران ھەمیشە قیبلەنومای ڕێگای ئازادی و سەرفرازی بوون بۆ میللەت و دەسەڵاتداران و ھەمیشە ویستویانە تۆوی ئازادی و سەربەخۆیی لە ناوەوەی وەڵات و مێشكی یەكە بە یەكەی نەوەكانی سەردەمی خۆیان و ھی دواڕۆژ بچێنن.
دەسەڵاتداران چونكە خۆیان بە ڕێبازی سەركردە-كۆیلە پەروەردەكراون، ھەمیشە ویستویانە لە ڕێگای خزم خزمێنە و پەیڕەوكردنی سیاسەتی”كێ باشتر نۆكەریم بكات ئەو دڵسۆزترین كەسمە” خەڵات و بەرتیل و پشت بەستن بە چینی بە كرێگیراوی گۆشكراو بە فیكری بێگانە پەرستییەوە دەرفەتە زێرینەكانی سەربەخۆبوون و پێشكەوتنی كۆمەلگەیان بەفیڕۆداوە. چونكە، ئەوان وایانكردووە كەسانی ناشایستە لە پلەی شایستەدا دابمەزرێنن. ئەمەش ئەو پەری نادادپەروەریە كۆمەڵایەتیان لە كۆمەڵگەدا بەرپاكردووە. ئەگەر مرۆڤ ئازادی و دیموكراسی بە ژێردەستەكانی خۆی نەدات، چۆن دەتوانێت داوای ئازادی و دیموكراسی لە دوژمنەكەی خۆی بكات؟

—————————————————–

بۆ ئەم بابەتە سودم لە سەرچاوەكانی:-
١-د. ئازاد حەمە شەریف(زنجیرەی شاكارنوسەكانی كورد لە سەدەی بیستەم).
٢-سەردار گەردی(ڕەخنەی ئەدەبی).

Previous
Next
Kurdish