نەمزانی چۆن ڕەشەبا دەلاوێندرێتەوە … شوان حەسەن
ئێوارەیەک
خۆی بەدرەختی بەردەم ماڵەکەم هەڵواسی
خێرا، چاوی پەنجەرەکانم لێداخست
گوتم: نەبادە ڕوناکی ماڵەکەم ئەو دیمەنەیان بۆ بگوازێتەوە.
بە دەم خواردنەوەی چایەکی سەوز
خۆم دەخافڵاندو
دەمزانی تاریکی بە دوای درزێکدا دەگەڕێ
ناڵەی، دیوار و پەنجەرەکان پێیان دەگوتم
ترسنۆک بووم، بیرم لە خۆمدەکردەوە
فیلمێکم داگیرساند
وەرس بوونی ئەوم کرد بە ئامانجی ئەو شەوەم
نەمدەزانی، ڕەشەبا چۆن ژیر دەبێتەوە
٭٭٭
بە دیار ئاگاییەوە، دادەنیشم و
پرسیارێکانی ژوورە تاریکەکەم دەخوێنمەوە
دەرۆزەکەرەکەی بەردەرگای(Lidl) لە کێ دەخەوێ و چۆنیش دەخەوێ؟
دەبێ باڵدارو ئاژەڵەکان چۆن بخەون، بەدەم ئەو ڕەشەبایەوە؟
ئەرێ بەڕاست سێو و پرتەقاڵ چۆن دەخەون؟
بە مۆبایلەکەم سێرچمکرد
ئایە میوەکان، گژو گیایەکان، دەخەون؟
ئەوە بۆ ناخەویت؟
پرسیارەکان لە ئامێزی ئەو گرمۆلەبوون و
بەدزی منەوە چاویان لێک نا
٭٭٭
بۆ ساتێک بێ دەنگی، خۆی دەخواردەوە و
هەناسەش بۆنی خەوی لێدەهات
وێنەی شاعیرە ماسیگرەکە، کەوتە نێوانمان و
قولابە شیعرێکی لە چوارچیوەی خەیاڵم گیربوو
ئەرێ چۆن بزانم
کامەیان میهرەبان و هەست ناسکترن
ماسیەکە یاخود ماسیگرەکە!؟
ئەو درەختەی ڕووتکردەووە، ئاشقێ
تا لێی بنوسێ
هەموو شتێک بۆ من دووبارەبوونەوەی هەیە
تەنیا تۆ یەکجاریت
خەندەت وێنەی بەختەووەرترین ژنی دنیا دەچرکێنێ و
ناوە ناوە هاوڕێیەکانت، لە وشکایی ئەو درەختە دەڕوێنیت
تا ئەو کاتەی
لق و پۆپی سکالاکان بەری ترسیان لێدەڕوێ
شارەوانی ڕەوایی دەداتە مشار و
بۆ پاراستنی گیانی هاوڵاتیان دەیبڕنەوە!
لەوانەیە ئەو شەو چیرۆکێکیتری هەبوایە
٭٭٭
مەیشکێنە ئەی ئیبراهیم
تۆ لە کام بیابان هاتووی؟
تۆ لە مرۆڤی ناوئەفسانەکانیش ناچیت
دەزانی کە بەر لەوەی تۆ دەرگای مێژووم لێ بگریت؟
پرسیار و وەڵامەکان لە کۆلانەکانی ئەندێشەدا چاوشارکێیان دەکرد
لەبەرچاوم پرسیارەکانت لێ خنکاندم، قسەم نەکرد
هەر ئەوڕۆژە لەبەر زامی پەیکەرسازێكی ئەوساتە هاتمە لات و
لێم پرسیت بۆ ئەو پەیکەرانە دەشکێنیت؟
کێ بە تۆی گوتووە کە ئەوانە خودان؟
ئاخر خولقێنەر عاشقە، ئاشقە ئەی ئیبراهیم
هێندە مۆمیاکراویت، لەوانە سەرەتاییەکانی ئەشقیش ناگەیت
لەگەڵ دەنگی چەکوشەکەت دە خزێمە ناو زەمەنەت و
پارچەکانم کۆدەکەمەوە
جارێکیتر ئەو ڕەشەبایە بێ شەرمه!
کراسی خەوم دەدزێ و
لە ڕۆخ تارمایی ئەو ئێوارەیە بە جێمدەهێڵێت
زەردەپەڕ کەی دێیت؟
دەمژمێرەکەم بەرگەی ئەم شەوە ناگرێت
لە هەورازی نیگەرانی من، تووشی هەناسەبرکێ بووە
تاپێت دەکرێت زوو وەرە
کەمێک (با) ی بەردەرگای ماڵەکەی منیش بلاوێنەوە
ماندووبووم بەدەست، ململانێ خۆم و تلانەوەی ئەو
نامەوێت بمکات بە شەوێ و
درەختێ خۆیم پێ هەڵواسێ!
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
